Jer. 37 - BUKO SIPUNENAN

Rimata Zedekia masitiddou enungan katubut Jeremia

¹ Zedekia togat Josia sibaliu rimata masisiliake si Konya togat Joyakim; si Nebukadnazar, rimata Babel, arioakeannia ibailiu rimata ka laggai Jehuda.

² Tapoi si Zedekia, sangamberi sipugagalainia samba leu taikauma ka laggai nenda ta'araarepi tiboiet sinegeakenen Tuhan katubut Jeremia.

³ Ka sara tetere rimata Zedekia koiniakenangan si Jukhal togat Selemya samba Imam Zefanya togat Maaseya katubut Jeremia masitiddou: “Panindou le' addeat kakai kai Tuhan Taikamanuanta!”

⁴ Kateteret nenda si Jeremia momoi pei le' ipabela samba ipatuitui tubunia katalagatda taikauma; ta'pei araguruakenia kabagat tangsi.

⁵ Saladdut Parao amutuituian sia rabela ka Misir; masiarep katuareman nenda iageti tai Kasdim sipasigogoilik Jerusalem atca sia ka Jerusalem.

⁶ Lepa oi tiboiet Tuhan katubut nabi Jeremia, ngangania:

⁷ “Kasene le' ngangan Tuhan Taikamanunan Israel. Katubut rimata Jehuda, sipasikokoiniakekam katubukKu addeat masitiddou enungan, bui tanukuakam kasene: Itco, saladdut Parao situtuitui bela addeat masiropmake kam toili geti sia ka laggaira, ka Misir.

⁸ Tapoi tai Kasdim momoi geti sia siminca masisaggangi laggai nene, masikalaake samba masilobo'nia pasamba obenan.

⁹ Kasenen le' ngangan Tuhan: Bui nupatajukam tubumui masikua: Tai Kasdim nenda atuituian sia ka tubutta teret buru! Tapoi ta'atutuitui sia teret buruburu!

¹⁰ Ke'bai nukalaake sangamberi saladdutda tai Kasdim sisaggangi ekeu nenda, bailiu sipulelegai katalagatda sarat sirimanua sibara mauju, senenda ka sapoura tusuru sia samba laborangan laggai nene pasamba obengan.”

Tutangsiake si Jeremia

¹¹ Kateteret arakaddiuake saladdutda tai Kasdim Jerusalem, kalulut lotora ka saladdut Parao,

¹² iageti bela si Jeremia barania ka Jerusalem iei ka kupkumen Benjamin masipasikeli sedda parubeiat ikemen katalagat muntogat sipueepu.

¹³ Tapoi kele aisege ka matat baliu gugurukat Benjamin, iageti sedda ai sara utet sipujajago oninia si Jeria togat Selemya togat Hananya; labanangan si Jeremia sialei gerei: “Nuoba mutalipo ka tai Kasdim!”

¹⁴ Samba kenanen bai ialegi si Jeremia: “Nenda boko, ta'mutatalipo aku ka tai Kasdim!”, tapoi si Jeria ta'aiarepi, lepa labanangan si Jeremia samba ambinangannia kamatatda sikebbukat laggai.

¹⁵ Sia sikebbukat laggai nene bailiu magolu le' sia kai Jeremia; boborangannia samba guruakerangannia ka tangsi ka lalep Jonatan, sipanunurat ka purimataat nenda; Lalep nenda aragalaian ibailiu tangsi.

¹⁶ Kisedda leu te' ituguru si Jeremia kabagat bilit oinan sinarekaknenen ka tei polak nenda. Samba mauju ikuddu si Jeremia sedda.

Si Zedekia masiotcaake kudduat itutangsiake si Jeremia

¹⁷ Ka sara gogoi koiniakenengan sirimanua si Zedekia masiala si Jeremia. Lepa ka pinakele rerenangan rimata ka uma purimataatnia katubunia: Ai leu pa' amoi tiboiet sibara kai Tuhan?” Aleginangannia si Jeremia: “Ai!”. Kuanangannia minca: “ngangania: Tukakau le ekeu ka kabei rimata Babel!”

¹⁸ Lepa geti kuanangan si Jeremia katubut rimata Zedekia: “Aponia jo' sigalaiku katubum, katubut sangamberi sipugagalainu samba ka bangsa nene, bailiu guruakenungan aku kabagat tangsi”

¹⁹ Kaipa' sia tai nabim nenda sipusisibalat katubum, rimata Babel ta'an momoinia masisaggangi ekeu samba laggai nene?

²⁰ Kineneiget, arepmake, ale tuanku rimata! Eddangania isege panindogatku kamatam: Ba'an totoiliakeaku minca ka lalep Jonatan, sipanunurat, babara mamatei aku sedda.”

²¹ Kaunangan parenta rimata Zedekia, lepa tangsiakerangan si Jeremia ka laibokat pujagoat samba kaurangan senen gogoi katubunia sangaja'ja' roti sibara ka kudduat pasigalaiat roti, pat aili teterenia isapru senenganata roti ka laggai nenda. Kise te' aikuddu si Jeremia ka laibokat pujagoat nenda.