Jer. 36 - BUKO SIPUNENAN

Rimata Joyakim masolaboake buko sibalat Jeremia

¹ Ka rura sikaepet puparentaat si Joyakim togat Josia, rimata Jehuda, oi tiboiet nene sibara kai Tuhan katubut Jeremia, ngangania:

² “Ala le' buko pupurunan samba suratnake kabagania senengamata tiboiet sinegeakenenKu katubum pagalaiat Israel, Jehuda samba sangamberi bangsa, barania kapanandat Akupanibo katubum iate barania ka puparentaat rimata Josia teret gogoi nene.

³ Ke' bai raarep tai Jehuda pagalaiat sangamberi pugejaatbaga kaunenKu katubutra, iageti senenda masibauake paatuat ka galaitubutda sikatai nenda, bailiu Kuappeake le' pusesele samba pujojotda.”

⁴ Iageti sogainangan si Barukh togat Neria si Jeremia, lepa suratnakenengan si Barukh kabagat buko pupurunan nenda sibara ka ngungun Jeremia iate sangamberi tiboiet sitiboakenen Tuhan katubutnia.

⁵ Ka sara teteret kaunangan parenta si Jeremia kai Barukh: Masaila le aku, ta'momoi kuei ka uman Tuhan.

⁶ Oto ka gogoi pupuasoat, ekeuan le' mei masibasaake sangamberi tiboiet Tuhan katubut sirimanua simigi ka uman Tuhan, sibara ka pupurunan sinuratnakenennu sibara ka ngungungku nenda; katubut sangamberi tai Jehuda sioi sibara ka sangamberi laggai buita'nubasaake leuet.

⁷ Baleu panindougatda sege ka matat Tuhan samba senenda masibauake paatuatnia ka galai tubu sikatai nenda, aipoi bulat abeu le' golu' samba oloi golu' siisiakenen Tuhan katubut bangsa nene.”

⁸ Iageti basaakenangan si Barukh togat Neria sangamberi tiboiet Tuhan sibara ka buko nenda ka uman Tuhan, kele siparentaakenen Jeremia katubunia. –

⁹ Ai leu ka rura sikalima puparentaat Jojakim togat Josia rimata Jehuda, ka laggo sikasiba, sirimanua masigalaiake puaso kamatat Tuhan addeat sengamberi taikauma ka Jerusalem samba addeat sangamberi taikauma siooi sibara ka sangamberi laggai Jehuda ka Jerusalem. –

¹⁰ Iageti basaakenangan si Barukh ngangan Jeremia sibara ka buko nenda kasangamberi taikauma, ka uman Tuhan, ka bilit Gemarya togat sipanunurat Safan, ka laibokat kapata ka matat baliu gugurukat sibau ka uman Tuhan.

¹¹ Kateteret aiarep si Mikhaya togat Gemarya togat Safan sangamberi tiboiet Tuhan sibara ka buko nenda,

¹² gorosotnia iei uma' purimataat rimata, kabilit sipanunurat. Sedda matoila mukuddu sangamberi sikebbukat laggai, iate sipanunurat Elisama, Delaya togat Semaya, Elnatan togat Akhbor, Gemarya togat Safan, Zedekia togat Hananya samba sangamberi sikebbukat laggai bagei.

¹³ Lepa paagainangan si Mikhaya ketubutra, sangamberi tiboiet siarepinia, kateteret aibasaakenen Barukh buko nenda katubut sirimanua simigi.

¹⁴ Lepa geti sangamberi saute nenda masikoiniake si Jehudi togat Netaya togat Selemya togat Kusyi kai Barukh masikua: “Ambit le' buko pupurunan sibasaakenennu kamatat sirimanua simigi nenda samba konan sene!” Iageti ambitnangan si Barukh togat Neria buko pupurunan nenda katubutda.

¹⁵ Kuarangan katubutnia: “Kudduake ekeu samba basaake nenda katubumai!”. Lepa basaakenangannia si Barukh katubutda.

¹⁶ Lepa araarep sangamberi tiboiet nenda, iageti tugegerangan samba patiborangan ka pasasambatda: “Bui tatapaagai le' simaruei sangamberi tiboiet nene; katubut rimata!”

¹⁷ Parererangan katubut Barukh, kuaranga: “Paagai le' katubumai, kipa enungnia anusuratnake sangamberi tiboiet nene!”

¹⁸ Aleginangan sia si Barukh: “Sangamberi tiboiet nene sibara ka ngungun Jeremia segeakenangania ka tubuku, samba suratkungannia pasamba lei kabagat buko.”

¹⁹ Lepa kurangan sikebbukat laggai katubut Barukh: “Kenan le', lipputnake le' tubum pasamba si Jeremia! Bui ibara sirimanua siagai kaipa kudduatnu!”

²⁰ Lepa ei sia masiailiake rimata ka laibokat, lepat arakoiriake pupurunan nenda ka bilit Elisama sipanunurat. Paagairangan sangamberi tiboiet nene katubut rimata.

²¹ Rimata masikoiniake si Jehudi masiala purutnakenen nenda, lepa alanangannia ka bilit Elisama sipanunurat nenda. Basaakenangannia si Jahudi katubut rimata samba kasangamberi sikebbukat laggai sipuririo kabebet rimata.

²² Teteret nenda iate' laggo sikasiba samba rimata ainia mukukuddu ka uma kateteret gogoi simaleppet, ka ipotnia ai oobek obengan ka puobenganan.

²³ Senen ke'bai ilepaake si Jehudi masibaake telu ele epatnga elau', iageti pabiritnangannia si rimata pasamba balugui, lepa ribbaiakenangannia ka obengan ka puobenganan nenda, pat sangamberi pupurunan nenda sapru ilabonia obengan ka puobenganan nenda.

²⁴ Rimata samba leu sipugagalainia, sipasiaarep sangamberi tiboiet nene, berisara sia atugege' samba ta'arapabirit leppeira.

²⁵ Elnatan, Delaya samba Gemarya masitiddou kai rimata, bele bui tulabo pupurunan nenda, tapoi ta'aiarepi sia si rimata.

²⁶ Ikoiniake le' rimata togania iate si Jerahmeel, Seraya togat Azirel samba Selemya togat Abdeel, bule ralaba Barukh sipanunuratnia samba si Jeremia, tapoi ailipputnake le' sia si Tuhan.

²⁷ Lepat ailabo rimata buko purunen sinurat Baruk iate tiboiet sibara ka ngungun Jeremia nenda, iageti kuanangan si Tuhan kai Jeremia, ngangania:

²⁸ “Ala le' buko purunen bagai, suratnake le' kabagania sangamberi tiboiet sitususurat ka buko purunen siboiki silabot Joyakim, rimata Jehuda.

²⁹ Pagalaiat si Joyakim rimata Jehuda, bui tanukua: Kasenen le' ngangan Tuhan: Anulaboan buko purunen nene pasamba masikua: Angoi nusurat kabagania, rimata Babel momoi te' geti nia masipakatai laggai nene samba masimateiake sirimanua silaggaijinia pasamba sangamberi tarimeunia?

³⁰ Lulut nenda kasenen le' ngangan Tuhan pagalaiat si Joyakim, rimata Jehuda: Ta'babara geti muntogatnia sikukuddu ka kudduat purimataat David, samba tubunia simamatei turiribbaiake le' geti, bailiu oloinangannia sulu kateteret sinago' samba leppet kateteret sinoibo.

³¹ Kuukum le' nia, muntogatnia samba sapaguguletnia kalulut seletra; Kubabaraake le' katubutra, kasangamberi sipulalaggai ka Jerusalem samba ka tai Jehuda sangamberi pugejaatbaga siisiakenenKu katubutda, sia sitaioba masiarepinia.”

³² Iageti alanangan si Jeremia buko purunen bagei samba kaunangannia kai Barukh togat Neria sipanunuratnia sipasisusuratnake kabagania sibara kangungun Jeremai sangamberi titiboat bagat buko silaboakenen Jojakim, rimata Jehuda kabagat obengan nenda. Samba leuet maigi leu tutuppai titiboat kele nenda.