Jer. 35 - BUKO SIPUNENAN

Purereddetda tai Rekhab

¹ Tiboiet siooi sibara kai Tuhan katubut Jeremia kateteret si Joyakim togat Josia, rimata Jehuda, ngangania:

² “Kenan le' ka muntogat Rekhab panibo le' ka sia samba ambit le' sia ka uman Tuhan, ka bagat sara bilik, lepa kaunungan lo'ra anggur!”

³ Iageti alakungan si Jaazanya togat Jeremia togat Habazinya pasamba sangamberi sasarainania samba sangamberi togania simanteu, sitetenia sangamberi muntogatda tai Rekhab.

⁴ Kuambit le' sia ka uman Tuhan, kabagat bilit tatogat Hanan togat Jigdalya, pagugulet Taikamanua; iate' bili' ka isit bili siabeu tiboitubu, ka patat bilit Maaseya togat Salum, sipasijajago matatbaliu.

⁵ Ka ipot sangamberi muntogatda tai Rekhab nenda galakngakekungan sangamberi pulokat sisusut anggur samba sangamberi pulokat sigoiso, lepa kuakungan katubutra: “Kauan lo' kam anggur!”

⁶ Tapoi alegirangannia, “Ta'kulo' kai anggur, aipoi taikebbukatmai si Jonadab togat Rekhab aiakean parenta kakai, ngangania: Kam samba tatogamui ba' lolo'kam anggur teret buruburu;

⁷ ba' ririoake kam lalep, ba' kakarepmake kam karamen; ba' gagalai kam ele masibakkati monen anggur, tapoi kau le' nupukuddu le' kam ka sangamberi sapou ujut purimanuaiatnu, bule imauju nupurimanua ka polak, kaipa nukuddukam sibailiu sirimanua siooiake!

⁸ Kureddet le' kai ngangan Jonadab togat Rekhab, taikebbukatmai ka sangamberi siparentaakenennia ka kai, bule bui kulo'kai anggur ka ujut puririmanumai, iate kai saramai, tainanalepmai, tatogamai taimanteu samba tainanalep;

⁹ bule bui kurioake kai lalep kudduat mai, ta'kubakkati kai monen anggur ele mone pasamba uremen,

¹⁰ tapoi mukuddu le' kai ka sapou samba mureddet masigalaiake simariuriu kele siparentaakenen taikebbukatmai si Jonadab katubumai.

¹¹ Tapoi kateteret Nebukadnezar, rimata Babel, masigaja tubu moi masisaggangi laggai nene, iageti kuamaian: Sitakam mujaujau ka Jerusalem, kalulut saladdutda tai Kasdim samba saladdutda tai Aram nenda! Kasedda te' akukuddukai ka Jerusalem.”

¹² Kateteret nenda oi tiboiet Tuhan kai Jeremia, ngangania:

¹³ “Kise' le' ngangan Tuhan Sebaot, Taikamanuan Israel: Kenen le' samba segeake le' ka tai Jehuda samba ka sipulalaggai ka Jerusalem: Ta' pa' nuobakam masisilo panganturat, iate masiarepi sangamberi tiboietKu”

¹⁴ Kirenangan parentat Jonadab togat Rekhab nenda aipei le' tueenungake; aiparentaakean ka sapunuteteunia, bule bui ralo' anggur, samba teret kineneiget ta'ralolo' anggur, aipoi araarepi le' parentat taikebbukatda. Mariuriu le' kupanibo katubumui, tapoi ta'anuarepikam Aku.

¹⁵ Akukoiniakean sapagguletKu katubumui, iate tai nabi, mariuriu le rakuania: Senemui, galakngakekam galaitubumui sikatai nenda, paerukam galaitubumui, ba tututnakekam taikamanua bagai addeat masipanindogi sia, iageti mariuriunangan nukuddukam ka polak siakeKu katubumui samba ka taikebbukatmui. Tapoi ta'nuobakam masilelekake samba masiarepi Aku.

¹⁶ Bulatnia, muntogat Jonadab togat Rekhab masireddet parenta sikaura taikebbukatda, tapoi bangsa nene ta'raoba' masiarepi Aku!

¹⁷ Kalulut nenda kise' le' ngangan Tuhan, Taikamanu Sebaot, Taikamanuan Israel: Bulatnia te', Kubaraake le' senengamata pasisiboat siteuakenKu ka tai Jehuda samba kasangamberi sipulaggai ka Jerusalem; kalulut amanibongan Aku katubutda, tapoi ta'raoba masiarepi, samba amusogangan Aku katubutda, tapoi ta'raoba' masialegi.”

¹⁸ Tapoi kuanagan si Jeremia ka samuntogat Rekhab: Kise' le' ngangan Tuhan Sebaot, Taikamanuan Israel: Kalulut anuarepingan poi kam parentat Jonadab, taikebbukatmui, anuukkaakean kam sangamberi parenta samba anugalaiakeankam simakolou kele siparentakenennia katubumui,

¹⁹ iageti kasene' le' ngangat Tuhan Sebaot, Taikamanuan Israel: Sapunuteteu Jonadab togat Rekhab ta'tatakki rapuuku Aku kasangantat tetere.”