Jer. 34 - BUKO SIPUNENAN

Si Jeremia masipaagai kalepakat puririmanuan rimata Zedekia

¹ Tiboiet siooi sibara kai Tuhan katubut Jeremia, kateteret si Nebukadnezar, rimata Babel samba sangamberi saladdunia, sangamberi purimataat ka polak ka paneineiatnia purimataatnia, samba sangamberi bangsa masisaggangi Jerusalem samba sangamberi laggainia.

² Kasenen le' ngangan Tuhan, Taikamanuan Israel: Kenan le' patibo kai Zedekia, rimata Jehuda, kua katubunia: Kise' le' ngangan Tuhan: Bulatnia, Kukau le' laggai nene kakabei rimata Babel, bule ilabonia itata pasamba obengan.

³ Samba ekeu leu ta'bebela ka kabeinia, tapoi tulaba samba tukau le ekeu ka kabeinia; nuitco le' geti rimata Babel sipamamatai mata samba manibo le' getinia katubum sipamamatai ngungu. Lepa geti ei ekeu ka Babel.

⁴ Tapoi arepmake le' ngangan Tuhan, ale Zadekia, rimata Jehuda, kise le' ngangan Tuhan pagalaiat ekeu: Taan geti matei ekeu lulut lanjau!

⁵ Mamatei le' geti ekeu pasamba aban. Kele kipa tuobekake obengan addeat masisuru' taikebbukatnu, tai rimata sipuboboiki, sipuririmanua kepei ekeu, kise te' raobekake geti obengan addeat masisuru' ekeu, samba masisoibi ekeu pasamba masikua: Ale, tuan! Bulatnia, Aku te' sipasititiboake nganga nene, kise' te' ngangan Tuhan.”

⁶ Nabi Jeremia masisegeake sangamberi tiboiet nene kai Zedekia, rimata Jehuda, ka Jerusalem,

⁷ kateteret saladdu rimata Babel ai sia masisaggangi Jerusalem samba sangamberi laggai Jehuda sipulelegei, iate' Lakhis samba Aseka, aipoi sangamberi laggai nenda te sipulelegei ka talagat sangamberi laggai Jehuda sibailiu sangamberi laggai sipuirip.

Palelengan ka sapagugulet Ibrani ta'atugalaiake

⁸ Tiboiet siooi sibara kai Tuhan katubut Jeremia, pasat aiapra palelengan si rimata Zedekia pasamba sangamberi taikauma sipukukuddu ka Jerusalem mesipaagai palelengan pasibelaiat,

⁹ bule senen sirimanua masibelaake paguguletnia tai Ibrani, taimanteu samba leu tainanalep sibailiu sirimanua situuja bailiu berisara sirimanua masipaguguleni sara tai Jehuda, sasarainania.

¹⁰ Iageti sangamberi sikebbukat laggai samba sangamberi taikauma sioi kapalelengan nenda masisilo, senen sirimanua masibelaake sapaguguletnia taimanteu samba sinanalep sibailiu sirimanua situuja, bailiu berisara sipaguguleni sia minca. Sangamberi sirimanua nenda masisilo, lepa obaakerangan sia.

¹¹ Tapoi lepa nenda oleinagan paatuatda, lepa alarangan minca sirimanua pagugulet simanteu samba sinanalep sibelaakenda sibailiu sirimanua sipuuja nenda samba besiakerangan sia minca ibailiu sia pagugulet taimanteu samba tainanalep.

¹² Lepa oi tiboiet Tuhan kai Jeremia, ngangania:

¹³ “Kise' le' ngangan Tuhan, Taikamanua Israel: Akuaprangan palelengan pasamba taikebbuakatmui kateteret Akuambit sia bela ka laggai Misir, ka kudduat pupapagulenan, bagania:

¹⁴ Kapangampulat pitunga rura kam sangamberimui bui tanubelaakekam sasarainania bangsa Ibrani sisakiake tubunia katubumui; mugalai le' getinia katubum enemngarura ujunia, lepa geti bui tanubelaakenia sibailiu sirimanua sipuuja. Tapoi taikebbukatmui ta'araarepi Aku samba ta'arapuletsei Aku.

¹⁵ Gogoi nene anubauakean paatuatnu samba masigalaiake aponia simaroipo kamataKu kalulut senen sirimanua masipaagai pasibelaiat ka sasarainania, samba anugalaian kam palelengan ka mataKu ka uma pasisoaagat oningKu.

¹⁶ Tapoi aioleian paatuatmui samba anupalolitnan kam oningKu; senesenemui anualaankam minca sapaguguletmui taimanteu samba tainanalep, sibelaakenenmui sibailiu sirimanua situuja siripot obaket bagania samba atukalaakean sia, bule ibailiu sia minca sapaguguletmui taimanteu samba tainanalep.

¹⁷ Aipoi kise le tiboiet Tuhan: Ta'anuarepi kam Aku, bule senen sirimanua masikau kabelaiat kapasasambania samba ka sasarainania, Iageti bulania, Aku masiake katubumui kabelaiat, kise te ngangan Tuhan, addeat tukau ka lanjau, besi simasappo samba pulajeat. Kubabailiuake le kam kalotoakenen simakope ka sangamberi purimataat ka polak.

¹⁸ Kukakau le' sangamberi sirimanua, sipasabau palelenganKu samba sitaiagalaiake bagat palelengan siappratda kamataKu, pasamba masijaja' togat jaui simanteu ibailiu rua addeat muenung ka oggak sinilakatnia;

¹⁹ sikebbukat laggai Jehuda samba Jerusalem, sipugagalai ka uma purimataat, tai imam samba sangamberi siberikabaga sipueenung ka oggak sinilakat togat jaui simanteu nenda,

²⁰ Kukakau le' sia kakabei saggakda samba kakabeira sirimanua sibesiake masiale enganda, pat tubutra simamatei bailiu komen sangamberi uma' ka tei manua samba sangamberi tarimeu ka polak.

²¹ Zedekia rimata Jehuda, pasamba sikebbukat laggainia Kukakau le' sia kakabai saggakra samba kakabeira sibesiake masiala enganda samba kakabeira saladdu rimata Babel, kineiget amutuiutian sia ka tubumui.

²² Bulatnia, kise' te' ngangan Tuhan, Kukau le' parenta samba Kuambit le' sia minca ka laggai nene addeat masisagganginia, masialau samba masilabonia pasamba obengan. Kugagalai le' sangamberi laggai Jehuda ibailiunia simagarak sita'anai sikudduijinia.”