Jer. 33 - BUKO SIPUNENAN

Palelengan masipaeru poroipoat Jerusalem samba Jehuda

¹ Iageti oi le' tiboiet Tuhan sikaruangamincania katubut Jeremia, kateteret aipeilenia tupatpanan ka laibokat pujagoat nenda, ngangania:

² “Kasene le' ngangan Tuhan, sibaraake polak samba sipasigagalainia samba rioakenangannia – Tuhan iate oniNia –:

³ Pusoga le' katubukKu, iageti Kualegi le' ekeu samba masipaagai geti katubum pagalaiat siabeu samba sitaioi nusinogi, iate pagalaiat taiaagaietnu.

⁴ Aipoi kasene le' ngangan Tuhan, Taikamanuan Israel, pagalaiat sangamberi lalep ka laggai nene samba pagalaiat uma purimataat rimata Jehuda sibukkatnakenen bule tupakei ka sangamberi irip pasialougat samba lanjau:

⁵ Tuguguru le' geti sirimanua pasaggak masisaggangi tai Kasdim samba laggai nene geti sut le' tubut sirimanua simamatei simateiakenenKu kalulut goluKu samba oloi goluKu, aipoi Akulipputnakean pumataatKu ka laggai nene kalulut senangamata pukakataira.

⁶ Bulatnia te', Kubaraake le' geti ka sia puaaroi tubu samba katualeat, samba Kuaaleake le' sia samba masibukaake ka sia sut puririmanua samba pusanangan simariuriu.

⁷ Kupaaeru le' geti erut puririmanuan Jehuda samba Israel samba masipaeru sia geti kele siburu':

⁸ Kupalilina le' geti sia ka senengamata puseleat sigalaira pasamba pujojo' katubukKu, samba Kuappeake le' sia ka senengamata puseleat sigalaira pasamba pujojo' samba pukelakatpaatuat katubukKu.

⁹ Laggai nene geti ibabailiu le' puangkakatbaga: tuoni, tuumun samba tuabeuake kaKu kamatat sangamberi bangsa ka polak sipasiaarep pagalaiat sangamberi pueeru sigalaiKu katubunia; tugege'ge' le' sia samba mugegeret le' tubutra kalulut sangamberi pueeru samba sangamberi sun puririmanua sigalaiKu katubunia.

¹⁰ Kasene le' ngangan Tuhan: Ka kudduat nene, sikuamui aibailiuan siragatat ta'anai sirimanua samba ta'anai tarimeu, ka sangamberi laggai Jehuda samba ka sangamberi enunggan ka Jerusalem simasaingere' nenda ta'anai sirimanua, ta'anai sikudduijinia samba ta'anai tarime,

¹¹ maarep le minca ngangan angkatbaga goratbaga, ngangan simanteu siputatalimou samba ngangan sinanalep siputatalimou, ngangan sangamberi sirimanua sipasikukua: Pusura' kam katubut Tuhan Sebaot, aipoi maeru le' si Tuhan nenda, nuntutbagaNia sitaimasususu teret buruburu, sialei masipanguruatnake buluakenen pusurakat ka uman Tuhan. Aipoi Kupaeeru le' geti puririmanuan laggai nene kele siburu, ngangan Tuhan.

¹² Kasenen le' ngangan Tuhan Sebaot: Ka kupkumen laggai nene, silepa ibailiu siragatat, ta'anai sirimanua samba ta'anai tarimeu, samba sangamberi laggainia babara le minca su'su simase'se' addeat ka sipasijajago terimeu masiperepmake biribiri sedda.

¹³ Ka sangamberi laggai ka paleleuleleu, ka sangamberi laggai ka kupkumen Tinambu, ka sangamberi laggai ka Polak Negep, ka kupkumen Benjamin, kabebet Jerusalem samba ka sangamberi laggai Jehuda, biribiri tusasabau le' minca kakabei sirimanua sipasiaaddenia, kise te' ngangan Tuhan.”

¹⁴ “Bulatnia, babara geti teterenia, kise te' ngangan Tuhan, Kusunnake le' palelengan sikuaKu ka muntogat Israel samba kamuntogat Jehuda.

¹⁵ Kateteret nenda samba gogoi nenda Kututu'tuake le' geti sinula simaroipo kai David. Igalaiake le' geti puroipoat samba pubulanan ka laggai.

¹⁶ Kateteret nenda Jehuda geti tuobaake le', samba Jerusalem geti murimanua le' sipulelek. Samba ka oni nene te' geti tusosogai sia: Tuhan puroipoatta!

¹⁷ Aipoi kasene le' ngangan Tuhan: Muntogat David ta'tatakki mukuddu kudduat purimataat paamian Israel!

¹⁸ Samba muntogatda tai imam sibara ka suku Lewi ta'tatakki rapanguruatnake panguruat silabo ka mataKu samba masilabo buluakenen pusuakat samba panguruat sija'ja kasanganantat tetere.”

¹⁹ Kuanangan si Tuhan katubut Jeremia, ngangania:

²⁰ “Kasenen le' ngangan Tuhan: Ke' moi nupasabaukam palelenganKu ka sita'go samba palelenganKu ka sinoibo', bailiu sinago' samba sinoibo ta'an momoi minca siripot puteteratnia,

²¹ Ia leuet palelenganKu pasamba paguguletKu si David momoi tupasabau, bailiu ta'an babara minca togania sipupaparenta ka kudduat purimataatnia; kasedda leuet palelenganKu pasamba tai Lewi, iate tai imam sibailiu sipuuku Aku.

²² Kele saladdut manua sitaioi tuadde samba kele igit ngai koat sitaioi tukireki, kisedda te' Kubailiake imaigi muntogat paguguletKu si David samba tai Lewi sipuuku Aku.”

²³ Kuanangan si Tuhan katubut Jeremia, ngangania:

²⁴ “Ta' pa' anupulelek aponia sikuatda sangamberi sirimanua nene: Karua muntogat sipilit Tuhan nenda aitataakean” Kalulut nenda ragegei le' paamianKu, ta'an iaddeakenia sara bangsa.

²⁵ Kasene le' ngangan Tuhan: Ke'bai ta' tuuddetnake palelenganKu pasamba sita'go' samba sinoibo, samba enung galaikenen ka manua samba polak,

²⁶ iageti Aku leuet masitata'ake muntogat Jakob samba paguguletKu si David, bailiu muari le' tuuddetnake sibara ka muntogatnia sirimanua sipupaparenta ka mutogat Abraham, Ishak samba Jakob. Aipoi Kupaeeru le' puririmanuanda samba Kupunununtuki baga le' sia.”