Jer. 32 - BUKO SIPUNENAN

Pasisakiat mone sibailiu toggaiat ka tuaaraunia Jehuda ka sibabara

¹ Tiboiet siooi sibara kai Tuhan katubut Jeremia kabagat rura sikapulu puparentaat Zedekia, rimata Jehuda, iate rura sikapulu balu puparentaat Nebukadnezar.

² Kateteret nenda saladdut rimata Babel masigoilik Jerusalem, samba nabi Jeremia tuariake ka laibokat pujagoat ka purimataat rimata Jehuda.

³ Aipoi si Zedekia, rimata Jehuda, aiukumannia sedda kalulut rasuksuknia: “Angoi nupusibalat: Kise le' ngangan Tuhan: Bulatnia, Kukakau le' laggai nene ka kabei rimata Babel, bule ikudduijinia;

⁴ si Zerdekia, rimata Jehuda, ta'bebelania ka kabeira tai Kasdim, tapoi tusegeake geti nia ka kabei rimata Babel, bule oinangan ipatiboakenia ngungu ka ngungun samba masiitconia mata ka mata;

⁵ Lepa geti ambit si Zedekia ka Babel samba kuddunia sedda teret Kupasikelinia, kise le nganga Tuhan. Ke' pasaggak bai kam masisaggangi tai Kasdim nenda, ta'mauuktuk kam!”

⁶ Kuanangan si Jeremia: “Amoi tiboiet Tuhan katubuku, ngangania:

⁷ Bulatnia, si Hanameel, togat kammannu si Salum, momoi te nia katubum masitiddou: Saki le' monengku ka Anatot nenda, Aipoi ekeu le' ai bakkat panebui addeat masisakinia.

⁸ Lepa geti, siripot ngangan Tuhan, oi le' si Hanameel togat kammanku ka tubuku ka laibokat pujagoat, samba itiddou katubukku: Saki le' monengku ka Anatot ka kupkumen Benjamin nenda, aipoi ekeu le' ai bakkat panebui; saki le' nenda! Iageti agaikungan, nenda iate ngangan Tuhan.

⁹ Oto sakikungan mone ka Anatot nenda kai Hanameel, togat kammanku, samba masikilo bulagatnia: pulu pitu bulagat perak.

¹⁰ Galaikungan surat pasakiat, sibara materai, sogai sipamoiliat samba kilokungan perak nenda pasamba kikilo.

¹¹ Lepa geti alakungan surat pasakiat sipubaga enungan ukkaakenen samba siteuakenen nenda, sibara materai samba leu et surat sitaanai meterai sitububuka;

¹² Ia geti kaukungan surat pasakiat nenda katubut Barukh togat Neri togat Mahseya, kamatat Hanameel, togat kammanku, kamatadda sipamomoiliat sipasiteteken surat pasakiat nenda, samba kamatat sangamberi sikuddu kalaibokat pujagoat nenda.

¹³ Kamatadra parentaakekungan kai Barukh, kuakungan:

¹⁴ Kasenen le' ngangan Tuhan Sebaot, Taikamanuan Israel: Ala' le' sangamberi surat nene, kau le' sangamberinia nenda kabagat sara tampaian polak, bule imatom.

¹⁵ Aipoi kasene le' ngangan Tuhan Sebaot, Taikamanuan Israel: Lalep, mone samba monen anggur tusasaki le' geti ka laggai nene!

¹⁶ Lepat akukau sangamberi surat panakiat polak nenda kai Barukh togat Neria, panindoukungan kai Tuhan kuakungan:

¹⁷ Ale, Tuhan Taikamanua! Bulatnia, Ekeu le sipasibabaraake manua samba polak, ka gegeM sabeu pasamba paraM sipurerepa. Ta'anai sita'ioi Nugalai!

¹⁸ Ekeu le' sipatoila' nuntut bagaM ka sipuriribu sirimanua samba sipasisisiliake puseselet ukkui ka tatogania siooi lepa geti. Ale Taikamanua siabeu samba simagege, oniM iate' Tuhan Sebaot,

¹⁹ mabeu ka pinatuM samba tuabeuake ka pugagalaiNu; mataM tubuka le ka sangamberi paraboat tatogat sirimanua pasamba nusuliake katubutra siripot puparaboananda samba siripot buat sigalainia;

²⁰ Ekeu le' sipatoila sangamberi toggaiat samba sangamberi pukerengan ka laggai Misir, teret kineiget ka tai Israel samba ka sirimanua, bailiu Nugalai le' oniM, kele simakokoinong ka gogoi nene.

²¹ Anuambitnan paamianNu Israel bela ka laggai Misir pasamba sangamberi toggaiat samba pukerengan pasamba kabei simaron samba para situtototoi pasamba puroron siabeu.

²² Samba Anukauan ka sia laggai nene, kele sipalelekNu pasamba suppa katubut taikebbukatra addeat masikaunia katubutra, sara laggai simalilimai susu samba suat maninia.

²³ Lepa geti gurukirangan samba kudduijirangannia, tapoi ta'araarepi ngangaM samba galai tubutra ta'siripokat surukatNu; ta'aragalaiake sangamberi aponia addeat tugalaiake. Lulut nenda Nukau le' katubutda senengamata pugejaatbaga nene.

²⁴ Bulatnia, sangamberi irip pakeiet masialou laggai aian mamalegre; kalulut lanjau, pulajeat samba besi sipamamatei iageti laggai nenda atukaunia ka tai Kasdim sisagganginia. Iageti aponia sitiboakenenNu nenda amuailingan; bulatnia Ekeu le' amasiitconia.

²⁵ Tapoi Ekeu, ale Tuhan Taikamanua amanibongan katubukku: Saki le' mone nenda pasamba perak samba sogai le' sipamomoiliat! – beringan laggai nenda atukauania ka kabeira tai Kasdim.”

²⁶ Tiboiet Tuhan moi katubut Jeremia, ngangania:

²⁷ “Bulatnia, Aku te' Tuhan, Taikamanuan kasenen sipungongoingoi; aileupa' sitaiooi Kugalai”

²⁸ Lulut nenda kasenen le' ngangan Tuhan: Bulatnia, Kukau le' laggai nene ka kabeira tai Kasdim samba ka kabei Nebukadnezar, rimata Babel samba alaunangannia.

²⁹ Tai Kasdim sisaggangi laggai nene momoi le' geti sia masilabo samba masisapruakenia pasamba sangamberi lalep ka laprania sirimanua masilabo buluakenen ka Baal samba masipanguruatnake buluakenen siuruakenen ka taikamanua bagei addeat masibaraake besit paatuatKu.

³⁰ Aipoi tai Israel samba tai Jehuda sarat masigalaiake sikatai kamataKu le sia kateteret sibau tubunia; bulatnia, tai israel sarat masibaraake besit paatuatKu pasamba sigalai kabeira, kise te' ngangan Tuhan.

³¹ Oo, laggai nene, aisuruakean golu samba oloi guluKu barania ka gogoi aturioakenia teret gogoi nene, bailiu Kuareuakenia ka mataKu,

³² kalulut senengamata pukakatai sigalaira tai Israel samba tai Jehuda sibaraake besit paatuatKu, kalulut sia, tairimatatda, sangamberi siukebbukatda, tai imamda, tai nabitda, tai Jehuda samba sipulalaggai ka Jerusalem.

³³ Arakateiteiakeaan Aku samba ta'an momoi sia masialiake Aku, samba kenanen bai Kugelaiake sia, simariuriu, ta'raoba masiarepi ele masisilo ukuman.

³⁴ Rapagalak le' sabulunganda ka sitsitnakenen ka lalep ka uddutnia oningKu tusogaake addeat masikasitsitnakenia.

³⁵ Rarioake le' sangamberi tinambu pasibuluat addeat ka Baal ka Peleu Ben-Hinom, addeat masipanguruatnake tatogatra taimanteu samba tainanalep katubut Molokh sibailiu buluakenen kabagat obengan. Kenanen bai ta' Akukoiniakenia katubutra samba kenanen bai nenda ta'anai muontou ka paatuatKu, iate pagalaiat kasitsitnakenen nene, bailiu tugirisitnangan Jehuda kabagat jo.

³⁶ Kalulut nenda, kasenen le' ngangan Tuhan, Taikamanuan Israel, pagalaiat laggai nene sukuam atukauan ka kabei rimata Babel kalulut lanjau, pulajeat samba besi sipamamatei:

³⁷ Bulatnia te' Kururuake le sia ka sangamberi laggai, kaipa kudduat Akupasaragai sia kalulut goluKu, oloi goluKu samba ngoingoibagaKu sabeu, samba Kutotoiliake le' sia ka kudduat nene samba Kubailiuake le' sia mukuddu ka bagat sanang puririmanua.

³⁸ Iageti bailiu sia paamianKu, samba Aku ibailiu Taikamanuanra.

³⁹ Kukau geti ka sia pukekeretbaga samba sara galai tubu, bailiu malotorangan katubukKu kasangantat tetere addeat pueerura samba tatogatra siooi lepa geti.

⁴⁰ Kuaapra le' geti palelengan sitaitatata' pasamba sia. Ta' geti Kukateteiteiake sia, tapoi simaeru le' geti tugalai katubutra; Kukakau le' ka paatuatra puloloto katubukKu, bule bui ratuareu katubukKu.

⁴¹ MaangkabagaKu kalulut sia addeat masigalai simaeru katubutra samba Kubabailiuake le' sia mutu'tu ka laggai nene kabagat putotopit, ka muinen paatuatKu samba ka munen ketsatKu.

⁴² Aipoi kasenen le' ngangan Tuhan: Kele Akubaraakean ka bangsa nene sangamberi pugejaatbaga sabau nene, kise te' Kubaraake katubutra puangkakatbaga sipinalelekKu katubutda.

⁴³ Rasaki le' geti minca sirimanua mone ka laggai nene sikuam: Nenda iate kudduat simagarak sitaanai sirimanua samba tarimeu; nenda atukauan ka kabeira tai Kasdim!

⁴⁴ Sangamberi mone rasaki le' sirimanua pasamba perak, masigalai surat pasisasaki, masikau matereinia samba masisogai sipamoiliat ka kupkumen laggai Benjamin, kalegret Jerusalem, ka sangamberi laggai Jehuda, ka sangamberi laggai paleleuleleu, ka sangamberi laggai ka kupkumen Tinambu samba ka sangamberi laggai ka polak Negep. Aipoi Kupaaeru le' puririmanuanda, kise te' ngangan Tuhan.