Jer. 31 - BUKO SIPUNENAN

Pakerekatbaga sibau

¹ “Kateteret nenda, kise te ngangan Tuhan, Ibabailiu te' Aku Taikamanua sangamberi muntogat Israel samba ibabailiu le' sia paamianKu.

² Kasene le' ngangan Tuhan: Bara le' katubunia kiliubaga ka simatangeu, iate bangsa sibebela ka lanjau nenda! Muenung le' tai Israel masigaba pasiaroiat tubunia!

³ Barania kasareunan pakoinongan tubunia si Tuhan katubunia: Kupununtuki baga le ekeu pasamba nuntut baga sitaitatata, lulut nenda Kuriuriuake le nuntut bagaKu katubum.

⁴ Kuririoake le' ekeu minca, bailiu purionungan, ale okko Israel! Nupalainge le' geti minca tubum pasamba rebana samba makoinong le' ekeu ka pututuru'ra sipuangka baga.

⁵ Nugagalai le minca monen anggur ka sangamberi leleu Samaria; Oo, sangamberi sirimanua sipasigagalai mone masimomonei leu geti buania.

⁶ Bulatnia, babara geti gogonia, sipujajago mugegerei geti ka leleu Efraim: Kauan, konan tapanatra ka Sion, kai Tuhan Taikamanuanta!

⁷ Aipoi kesene' le' ngangan Tuhan: “Pusoga le' kai Jakob pasamba angkatbaga puangkabaga le' kalulut siuteake sangamberi bangsa! Paagai, umun, samba kua le': “Aipaarauan si Tuhan paamianNia, iate tai Israel sipulelegai!

⁸ Bulatnia te, Kuaambit le' geti sia baratra ka polak ka bare' samba turururuake le' geti sia barania ka tutut polak; ka talagatra ai sirimanua simapeset samba simasakit, ia tainanalep sipususuruket pasamba parurukat sipususule'; kabagat mungkuat sabeu toili le' geti sia minca sene!

⁹ Kabagat pusosou oi sia kabagat pusuibiatbaga Kuambit le' sia; Kupaneinei le' geti sia ka sangamberi bagat oinan, ka enungan simagaktuk, kaipa ta' ratusoksok; aipoi aibailiuan Aku ukkui Israel, Efraim iate toga sikebbuakatKu.

¹⁰ Arepmake le' ngangan Tuhan, ale sangamberi bangsa, paagai le' nenda kasangamberi polak puriringan simareunan, kua le': Nia amasisaragaiake Israel irururuake geti sia minca, samba ijagonia kele sipasijajago ka mungkuat tarimeunia!

¹¹ Aipoi si Tuhan aibelaakean si Jakob, aitebuiannia kakabeira simagege peile ka tubunia.

¹² Momoi te' geti sia musoga angkatbaga ka uddut leleu Sion, pumataatda malatsat kalulut pusisikut patuat Tuhan, kalulut gandum, anggur samba tula, kalulut sangamberi togat biribiri samba jaui; puririmanuanda geti kele mone sisuaiji simakolou, ta'an geti mululu'baga sia minca.

¹³ Kateteret nenda sangamberi tai okko' muangkabaga geti muturu simakere, sangamberi tailainge samba sikebbukat geti mugora' baga le', Kusisili le' geti pureureugatbagatra bailiu angkatbaga, masipusuibi geti sia samba masiangkaakebagatda pasat reureubagatda.

¹⁴ Kusesegeake le' bagatra tai imam pasamba komen sipususukra; samba paamianKu ibailiu maengtek pasamba pusikuat paatuatKu kise te' ngangan Tuhan.

¹⁵ Kasene' le' ngangan Tuhan: Arep! Ka Rama maarep le' geri, sou simakope besi': Si Rahel masisoibi tatogania ta' ioba tupusuibinia kalulut tatogania, aipoi ta'ananai sia

¹⁶ Kasene te' ngangan Tuhan: Kera le' tubum musou samba ipubaibai elu ka matam aipoi besit tubum ai silinia, kise te' ngangan Tuhan; toili le' geti sia baratda ka laggaira taisaggak.

¹⁷ Ai pei le karonannu ka gogoi sibabara, kise te' ngangan Tuhan: tatoga toili le' geti sia ka kupkumen laggaira.

¹⁸ Akuarepman, simakolou, ipugeri Efraim: Anulisongan aku, samba akusiloan liliso, kele togat jaui taigegelaiakenen. Ambit le' aku minca, bule kutoili, aipoi Ekeu le' Tuhan, Taikamanuangku.

¹⁹ Bulatnia, atoilingan aku, aioleianbagaku, samba kele akuagainia pagalaiat tubukku, pabo'bo'kungan kabei ka tengangku sibailiu toggaiat purereureubaga; amailangan aku samba malolitnan, aipoi akubairatnan lolit kateteret mabau peile tubukku.

²⁰ Toga kilibetbaga pa' Efraim kaKu ele toga obaket le'? Aipoi senen Kugolunia, ta' takki Kurepdepnia; kalulut nenda mangeleibangakKu katubunia; taiagai ta' imakiliubagaKu katubunia kise te' ngangan Tuhan.

²¹ Rioake' le' panausau enungannu galai le' kekeu toggaiat enungan; puletsei le' simakolou enungan sabeu, iate enungan sienungiennu! Toili le', ale sioko Israel toili le' ka sangamberi laggaimui nene!

²² Pigamoian le' ujunia ipururua paatuatnu, ale toga sinanalep sitaimeretdet? Aipoi igagalai le' si Tuhan sara sibau ka laggai: tainanalep masilakkaiake taimanteu.”

²³ Kasene' le' ngangan Tuhan Sebaot, Taikamanuan Israel, “Sirimanua masitiboake toboiet nene minca ka polak Jehuda samba ka sangamberi laggainia, ke'bai Akutoiliakean puririmanuanra: Bule ipanukani ekeu si Tuhan, ale kudduat pubulanan ale leleu sipunenen!

²⁴ Sedda mukukuddu le' geti Jehuda samba ka sangamberi laggainia iate sipumomone samba sirimanua sipusisila pasamba tarimeunia.

²⁵ Aipoi Kuparorokdang le' geti sirimanua simasaggo, samba senen sirimanua simabele baga Kusesegeake le' bagatra'.

²⁶ Kalulut nenda suru aku samba masiitco; peperepku masanang le'.

²⁷ “Bulatnia, babara te' teterenia, kise te' ngangan Tuhan, Kususunake le ka tai Israel samba ka tai Jehuda sirimanua samba tarimeu.

²⁸ Iageti kele siboiki Akujago sia, masiburau, samba masibukkatnake, masiibuake samba masipakatai samba masisubuake samba masib esiki kisedda te Kujago sia geti addeat masigalai samba mangurep, kise te' ngagan Tuhan.

²⁹ Kateteret nenda ta'an te' rakukua minca sirimanua, Saukkui masikom bua simata', samba sonda tatogania ibailiu maseret,

³⁰ tapoi: Senen sirimanua mamatei le'; kalulut puseleatnia; senen sirimanua sipasikokom bua simata', sonnia le' ibailiu maseret.

³¹ Bulatnia te', babara te' geti gogoinia, ngangan Tuhan, Kubabarake te' palelengan sibau pasamba paamian Israel samba Jehuda,

³² ta' kele palelengan sigalaiKu pasamba taikebbukatra kateteret Akuukkaake kabeira addeat masiambit sia bela ka laggai Misir; PalelenganKu nenda arapasabauan, kenenen bai ibailiu Aku tuan simagege ka sia, kise te' ngangan Tuhan.

³³ Tapoi kasenen le' palelenga sibaraakenenKu pasamba muntogat Israel pasat gogoi nenda, kise te' ngangan Tuhan: Kukakau le' surukatKu ka tubutra samba masisuratnakenia ka paatuatra; Iageti bailiunangan aku Taikamanuanra samba sia ibailiu geti paamianKu.

³⁴ Samba ta'an pangangatru sia ka pasasambatda, sasaraina ka sasaraina masikua: agai le' si Tuhan! Aipoi sangamberitra, sabeu taigoiso raagai le Aku, kise te' ngangan Tuhan, aipoi Kuaappeake le' seletra samba taan masirerepdep minca jotra.”

³⁵ Kasene le' ngangan Tuhan, siake sulu masitiroiji sina'go, sipasiteteuake laggo samba panyanyat addeat masitoroiji sinoibo', sipasigogojou limun koat pat sangamberi lektuknia maonu, – Tuhan Sebaot, le' oniNia.

³⁶ “Bulatnia, kele sangamberi siteuakenen nene ta mututuitui ka mataKu, kiste te' ngangan Tuhan, kisedda leuet muntogat Israel ta' muaari ibailiu bangsa ka mataKu kasanganantat tetere.

³⁷ Kasenen le' ngangat Tuhan: Bulatnia, kele manua ka pata ta'momoi tukireki, samba saisai polak ka epe' ta'momoi tulelekngake, kasedda leuet ta'an Kukekeraake sangamberi muntogat Israel, kalulut sangamberi aponia sigalaiaakenenra, kise te' ngangan Tuhan.

³⁸ Bulatnia, babara te gogoinia, ngangan Tuhan, laggai nenda tugalai le minca addeat kai Tuhan, barania ka kudduat pujagoat Hananeel teret ka Taiming Matatbalui Gugurukat;

³⁹ lepa nenda tali kirekat nenda mariuriu le ipukilitik pat aili ka leleu Gareb, lepa bilu' ka Goa.

⁴⁰ Samba sangamberi peleu nenda, pasamba tubu simamatei samba abunia, samba sangamberi polak ka bebet bagat oinan Kidron teret ka Taiming Matatbaliu Gugurukat Kuro ka isit kabelaiat sulu, ibailiu sipunenan kai Tuhan. Ta'an rapapabubukat ele rapapakakatai minca sirimanua sedda teret buruburu.”