Jer. 30 - BUKO SIPUNENAN

Palelengan masipaeru minca Israel

¹ Tiboiet siooi sibara kai Tuhan katubut Jeremia, ngangania:

² “Kasene le' ngangan Tuhan, Taikamanuan Israel: Suratnake le' kam sangamberi tiboiet sitiboakenenKu katubumui nenda kabagat sara buko.

³ Aipoi, bulatnia te, babara geti teterenia, kise te ngangan Tuhan, Kupaeru le' geti minca puririmanuan paamianKu Israel samba Jehuda ngangan Tuhan samba Kutotoiliake geti sia ka laggai sikauKu ka taikebbuakatra, samba bakkatirangannia.

⁴ Nene te' sangamberi nganga sitiboakenen Tuhan ka pagalaiat tai Israel samba Jehuda:

⁵ Bulatnia, kasene le' ngangan Tuhan: Akuarepman kai gerei kalotoakenen, kopet pukakarat baga samba tatania aban.

⁶ Sibo pei parereake samba gaba, ai leu taimanteu sipususule? Angoi senen taimanteu Kuitco kabeinia ka tengania kele sara sinanalep sipususule? Angoi senen pumataat isili le' bailiu mamusi?

⁷ Oo, bulat makope katai le' gogoi nenda, taanai pakirekatnia; nenda te' teteret pangoringan kai Jakob, tapoi tupaaraunia geti ka tubunia.

⁸ Iageti ka gogoi nenda, kise le' ngangan Tuhan Sebaot, Kubakbakngake geti loina bairanen katetekatda samba pangamprada Kutakkiake le' samba ta'an mupagugulet sia minca ka sangamberi sirimanua siooiake.

⁹ Mupagugulet geti sia kai Tuhan, Taikamanuanra, samba kai David, rimatatra, sisuruakenenKu ka sia.

¹⁰ Iageti Ekeu, ba'maloloto, ale paguguletKu Jakob, kise te' ngangan Tuhan, bui imakarat bagam, ale tai Israel! Aipoi bulatnia te', Kupaarau le' ekeu ka kudduat ka sareunan samba samuntogatnu ka laggai katuribbaiatra. Totoili le' geti si Jakob samba murimanua simakolou samba masanang, samba ta'anai katuge'ge'kat.

¹¹ Aipoi Kupaalei le' ekeu, kise te' ngangan Tuhan addeat masipaarau ekeu: katalagat sangamberi bangsa sikauKu ekeu Kutatataake le', tapoi ekeu nene geti ta' Kusasapruake. Kuliliso le' ekeu siripot surukat, tapoi ta Kuaddeake ekeu kele sita sele.

¹² Bulatnia, kasene le' ngangan Tuhan: Oringennu bulat mabesi le', mauju'nu tamamale!

¹³ Ta'anai sipasirorop bakkatnu, ta'anai laggek appum, katualeat ta'anai ka tubum!

¹⁴ Sangamberi pununtukietbagam masikalipogi ekeu, ta'an raparerereake ekeu minca. Bulatnia, Aku boboan ekeu pasamba bobobora tai saggak, pasamba liliso ka golu simakope, kalulut maigi selemui, jomui bulat maigi.

¹⁵ Angoi nupugerei, kalulut besinu, kalulut pangoringannu bulat mabesi? Kalulut selem maigi, jomui bulat sabau, oto Akugalaian sangamberinia, nene katubum.

¹⁶ Tapoi sangamberi sirimanua sipasikoilok ekeu, tukokoilok le', samba sangamberi saggaknu tuguguru le' ka kakabekat; sangamberi sirimanua siraurau ekeu, ibabailiu le' raurauget, samba sangamberi sirimanua siorei ekeu, Kubailiuake geti oreiet.

¹⁷ Aipoi Kubabaraake le' geti katualetnu, Kulalaggek le' geti sangamberi maujunu, kise te' ngangan Tuhan, aipoi arakungan ekeu: sirimanua siribbaiakenen iate legei sitainonounouget berisara sirimanua.

¹⁸ Kasene le' ngangan Tuhan: Bulatnia te', Kupaeru le' minca sangamberi sapou Jakob, samba masipununtukibaga sangamberi kudduatnia, laggai nenda turirioake le minca ka uddut siragatatnia, samba kudduat purimataat turirioake le' ka kudduatnia siboiki.

¹⁹ Urai pusurakat maarep geti katalagatda, samba leuet nganganra sipuangka baga. Kutuppai le geti igitra, samba taan geti tubebeleki sia minca; Kugagalai le' geti tuabeuake sia samba ta'an tupalololoi sia minca.

²⁰ Tatogatra ibabailiu le', kele siburu, samba parurukatra mariuriu le' kamataKu; Kuukum le' geti sangamberi sirimanua siorei sia.

²¹ Sirimanua sipupaparenta katubutda tuottou geti katalagatda, samba simagege ka sia, tususuru geti katalagatda; Kubabailiuake le nia mariuriu, samba mulegre katubukKu, aipoi kasei pa simaeme masibuluake engania addeat masilegreake tubu katubukKu? kise te' ngangan Tuhan.

²² Iageti bailiunangan geti kam paguguletKu, samba Aku ibailiu Taikamanuamui.

²³ Itco pei, rusat katai manuan Tuhan, iate olo golu, abelangan masilalau, – kasou baliok – samba bele masisaksak utera sangamberi sirimanua sikatai.

²⁴ Golut Tuhan sipujujulu nenda tapepe teret igalaiake samba masitubuake aponia sipinaatuNia kabagat paatuatNia; ka gogoi ka kalepakatnia agaimuian geti pagalaiat nenda.