Jer. 3 - BUKO SIPUNENAN

Pasibaugat paatuat katubut Tuhan

¹ NgangaNia: “Ke' sara sirimanua masisaraake sinanalepnia, lepa sinanalep nenda tuitui katubunia samba bailiu sinanalepda sirimanua sabagei, totoili leu pa' simanteu siboiki ka sinanalep nenda? Ta' pa laggai nenda ama lolitnan? Amujongan ekeu ka umunnakenennu simigi, samba nuoba toili ka tubuKu? kise te' ngangan Tuhan.

² Papitsaake' pei matam ka sangamberi leleu sitaanai paloina loina samba itco pei! Kaipa' ta'araperemi ekeu? Ka sangamberi bebet enungan nukuddu masingena umunakenennu kele tai Arab ka su'su' simatangeu. Anupalolit laggai ka paeletnu samba ka pukakatainu.

³ Kalulut nenda jaijai urat ta'bebele' samba kabuttet gogoi urat ta'bebele'. Tapoi baranu iate bara sinanalep simaolop tubu, sitaiagai aila le' ekeu.

⁴ Ta'pa simaruei le' anusogai Aku: Ukkuiku! Ekeu le' aleiku ka sule'ku!

⁵ Teret buruburu pa' Ipugolu ele mulaga baga simariuriu? Kise le' nukukua, teret siooi nugalaiake sikatai.”

Israel samba Jehuda tunana' toili katubut Tuhan

⁶ Tiboiet Tuhan katubuku kateteret puparentaat rimata Josia: “Anuitcoan leu aponia sigalaiakenen Israel, sinanalep sitaimatopit nenda, kipa ioi itusakai ka senen uddut leleu simabuak samba iei ka senen tei loina simalibbut muoloptubu.

⁷ Kupaatu le': Lepa igalaiake sangamberinia nene, toili le geti nia minca ka tubuKu, tapoi ta'atoilinia. Pagalaiat nenda aiitcoaan si Jehuda, sarainania sitaimatopit.

⁸ Itconangannia, kalulut paelenannia Kupasaraake le' Israel, sinanalep sitaimatopit nenda, samba masikau katubunia surat pasaraat; tapoi Jehuda, sarainania sinanalep sitaimatopit nenda ta'molotonia, tapoi mei leuetnia muolop tubu.

⁹ Ka oloptubunia sita'lulu nenda ipalolit le' laggai samba paelet pasamba masipanindogi bukku samba loina.

¹⁰ Ka sangamberinia nene leu et Jehuda, sarainania sinanalep sitaimatopit nenda ta'atoili nia katubukKu kalinan paatuatnia, tapoi ta'kasibulatnia, kise te' ngangan Tuhan.”

¹¹ Samba tiboiet Tuhan katubuku: “Israel, sinanalep siareuake Aku nenda, masipakoinong tubunia sineseat bele pei Jehuda, sitaimatopit nenda.

¹² Kenan le' masigereiake sangamberi tiboiet nene ka bare' kua le': Toiliangan le' ale Israel, sinanalep siareuake Aku, kise le ngangan Tuhan. PumataatKu ta'masusulei katubumui, aipoi Aku nene simaanggai baga le, kise le ngangan Tuhan, ta'an mugogolu Aku teret buruburu.

¹³ Sarat seseake le', puseselem, anusaggangingan Tuhan, Taikamanuam, anusunakeaan nuntut baga kaolop tubu ka siooiake ka senen tei loina simalibbut, samba taanuarepikam ngangangKu, kise te' ngangan Tuhan.”

Paamian siooi geti ka Sion

¹⁴ Toiliake kam, ale tatoga situaareu katubukKu, kise te' ngangan Tuhan, kalulut aibailiuan Aku tuan ka kam! Kuala te' geti kam, sara sirimanua kasenen laggai, rua sirimanua kasenen muntogat, samba masiambitkam ka Sion.

¹⁵ Kuuddetnake te' geti katubumui sangamberi sipasijago siripot ka paatuatKu; Rajago te' kam ka sikut paatuat samba ka puaagai.

¹⁶ Iageti ke' kateteret aituppaian igimui samba mupunuteteu ka laggai nene, kise le' ngangan Tuhan, iageti ta'an rapatitiboiji sirimanua pagalait Peti PelelenganKu. Nenda ta'an tuottou rapatua ele rererepdep sirimanua, taan ragagaba ele ragalainia minca.

¹⁷ Kateteret nenda Jerusalem tuoniake le' geti “Kudduat purimataat Tuhan', samba senen bangsa paruru le' geti sedda, ka onin Tuhan ka Jerusalem, samba taan ratututnake siripot pukelakat paatuatnia sikatai.

¹⁸ Kateteret nenda mei le' geti muntogat Jehuda ka muntogat Israel, samba moi le' sia simakere baratda ka laggai ka isit ka bare ka laggai siparubeiKu ka taikebbukatmui sibailiu bakkat ikepmakenen.

¹⁹ Siboiki Kupaatu: Bulatnia Kuoba le' masikudduake' ekeu katalagatda tatogaKu samba masiake katubum laggai simalainge, bakkat ikepmakenen bulat simakope sanang bele pei le' ka sangamberi bangsa. Kupaatu, nusogai le' Aku: Ukkuiku, samba ta'mutuitui minca kapasitututmui Aku.

²⁰ Tapoi bulatnia, kele sara sikalalep sitaimatopit ka saaleinia, kise' te' taimatopitmui katubukKu, ale muntogat Israel, kise te' ngangan Tuhan.

²¹ Arep! Kasangamberi tu'tut leleu sitaanai paloina-loina maarep le' sou rapasitiddou tatogat Israel, aipoi aratutnakean enungan kapepeat, samba arakalipogingan Tuhan Taikamanuanda.

²² Toiliake kam, ale tatoga sipasikakaddiuake si Tuhan! Kuaaleake geti ekeu ka pasikakaddiuakenu si Tuhan.” Koi te' kai, amoian kai katubuM, aipoi Ekeu le' Tuhan, Taikamanuamai.

²³ Bulatnia, sangamberi tinambu pasibuluat iate patajuat le' iate pugaugaupat ka uddut leleu nenda! Bulatnia te', sarat kai Tuhan Taikamanuanta le ai puaraugat Israel!

²⁴ Tapoi sabulungan sipakaila nenda masiguk senen buat saggot tubuda taikebbukatta barania ka bau tubutta; kambing samba biribiritda samba sangamberi jauira, tatogatda simanteu samba tatogatda sinanap.

²⁵ Oto, eddangan taparep ka bagat aila, samba eddangania isobbeji sita lolitta, aipoi amajongan sita kai Tuhan, Taikamanuanta, iate sita samba taikebbukatta barania ka bau tubutta teret ka gogoi kineneiget; samba ta'an ataarep ngangan Tuhan, Taikamanuanta.”