Jer. 29 - BUKO SIPUNENAN

Surat sikau katubutda sia siribbaiakenen ka Babel

¹ Kasene' le' ngangan surat Jeremia sibara ka Jerusalem katubutda sikebbukat katalagatda sia siribbaiakenen, ka tai imam, ka tai nabi samba katubut sangamberi taikauma siambit Nebukadnezar ka pasiribbaiat barania ka Jerusalem ka Babel.

² Aipuaili nenda lepat aibela si rimata Jekhonya pasamba inan rimata, sipugagalai ka kudduat purimataan, sautet Jehuda samba Jerusalem, siagaimugalai samba siagai laba abelangan ka Jerusalem.

³ Surat nenda tusegeake kapaneiteiat Elasa togat Safan samba Gemarya togat Hilkia sikoiniakenen Zedekia, rimata Jehuda ka Babel ketubut Nebukadnezar, rimata Babel. Ngangania:

⁴ Kasene' le' ngangan Tuhan Sebaot, Taikamanuan Israel, katubut sangamberi sirimanua siribbaiakenen siambit ka pasiribbaiat barania ke Jerusalem ka Babel:

⁵ Rioake le' lalep kudduijietmui; galai kam mone bule nunanamkam buania;

⁶ pusinanalepkam bule itutuakemata tatoga simanteu samba sinanalep; gabakam sinanapra tatogamui simateu samba simanteura tatogamui sinanalep, bule ioi ratutuake matat tatoga simanteu samba sinanalep bule tuppainangan igimui sedda samba bui ibelekinia!

⁷ Besiake kam erut puririmanuan laggai kai pa Kuribbaiake kam, samba panindou kam addeat ka laggai nenda kai Tuhan, aipoi erut puririmanua laggai nenda iate erut puririmanuamui.

⁸ Bulatnia, kise le tiboiet Tuhan Sebaot, Taikamanuan Israel: Bui ipatajukam tai nabimui sikuddu ka talagamui samba siagai tawa, samba bui nuarepikam pangamutet sipangamutda!

⁹ Aipoi musibala le sia sipatataju katubu mui ka oningKu. Ta Aku koiniake sia, kise te' ngangan Tuhan.

¹⁰ Aipoi kasene' le' ngangan Tuhan: ke bai amamuinean pitu pulunga rura rubeiat Babel, ia pei Kupuletsei kam. Kususunnake le' palelenganKu nenda katubumui samba tutoiliake le' kam ka kudduat nene.

¹¹ Aipoi Aku nene Kuagai le' sangamberi panaatu sibara ka tubuKu pagalaiat kam, kise te' ngangan Tuhan, iate pupaatuanan paabanan samba ta kakamateiat, tapoi addeat masiake katubumui gogoi sisun pukakaronan.

¹² Kebai musoga samba moi kam manindou katubukKu, iageti Aku masiaarepi geti kam;

¹³ Kebai nugaba kam Aku, sesemuian geti Aku; Kebai nurereake kam Aku kamuinet paatuamui,

¹⁴ Kuake geti kakam nusese kam Aku, kise te' ngangan Tuhan, samba Kupaeru geti puririmanuamui samba Kururuake geti kam katalagat senganberi bangsa ka senen kudduat kai pa Akupasabukam kise te ngangan Tuhan samba Kutoiliake geti kam ka kudduat kaipa' Akuribbaiakekam. –

¹⁵ Kerengan nukukuakam: Aisuruakean si Tuhan tai nabi kakai ka Babel. –

¹⁶ Bulatnia, kasene le' ngangan Tuhan pagalaiat rimata sikukuddu ka purimataat David samba pagalaiat sengamberi taikauma sikukuddu ka laggai nene, iate sasarainamui sitaibebela pasamba kam ka pasiribbaiat:

¹⁷ Kasene le' ngangan Tuhan Sebaot: Bulatnia te, Kuaake geti lanjau, pulajeat samba besi sipamamatei katalagadra, samba Kubailiuake geti sia kele buat sileu simabute samba kise le' katainia, bailiu ta momoi itukom.

¹⁸ Kukukukru le' geti sia pasamba lanjau, pulajeat samba besi sipamamatei samba Kugalai le ibailiu sia kalotoakenen sangamberi purimataat ka polak, ibailiu telei, katuge'gekat, gegeiet samba kalolinan katalagat sangamberi bangsa kai pa' Kupasabusia,

¹⁹ sibailiu ukuman taiaarepida tiboietKu, kise te' ngangan Tuhan, sinegeakenenKu katubutda simariuriu ka paneiteianda sapaguguletKu, iate tai nabi; tapoi taanuarepi kam, kise te' ngangan Tuhan.

²⁰ Tapoi arepikam ngangan Tuhan, ale kam sangamberi siribbaiakenen, siakeKu barania ka Jerusalem ka Babel!

²¹ Kasene le' ngangan Tuhan Sebaot, Taikamanuan Israel, pagalaiat si Ahab togat Kolaya samba pagalaiat si Zedekia togat Maaseya, sipusisibalat kapatajuat katubumui ka oningKu: Bulatnia te' Kukakau le' sia kakabei Nebukadnezar, rimata Babel, ite'te' sia ramatei ka matamui.

²² Iageti pagalaiat sia tubailiuake geti sara telei kalulut sangamberi sirimanua siribbaiakenen barania ka Jehuda sibabara ka Babel, kise te': Eddangania ibailiuake kam si Tuhan kele si Zedekia samba si Ahab sirarak rimata Babel ka obengan!,

²³ kalulut aragalaian pukakatai ka Israel, paelet kapasasamba tainanalepra samba ratiboake ka oningKu titiboat patajuat sitaitotoneakenenKu katubutda. Aku le' siagai samba masipoiliatnia, kise te' ngangan Tuhan.

Alegiet sara sirimanua siribbaiakenen kapagalaiat surat Jeremia

²⁴ Katubut Semaya, tai Nehelam nenda bui tanukua:

²⁵ Kasene le' ngangan Tuhan Sebaot, Taikamanuan Israel: Kalulut anukauan poi surat ka onim katubut sangamberi taikauma sikuddu ka Jeruselem, iate katubut imam Zefanya togat Maaseya samba katubut sangamberi imam, ngangania:

²⁶ Airioakeean ekeu si Tuhan, Zefanya, ibailiu imam masisiliake imam Joyada, bule ibailiu ekeu sipasikeli uman Tuhan addeat masikabe senen sirimanua siroro sipasiaaddeake tubunia nabi samba masingalou lolokkania pasamba laba.

²⁷ Tapoi kineiget, angoi taanuteka si Jeremia, tai Anatot nenda, sipasiaaddeake tubunia nabi katalagamui?

²⁸ Ta pa aiakeaan patonekat katubumai ka Babel, kuanangan: Katuribbaiatmui maburu pei le. Rioakekam lalep kudduatmui; galaikam mone addeat nukomkam buania!

²⁹ Surat nene ibasaake le' imam Zefanya ka talingan Jeremia.

³⁰ Iageti oi tiboiet Tuhan katubut Jeremia, ngangania:

³¹ “Kau le' patoneket katubut sangamberi sirimanua situriribbai nenda: Kasene le' ngangan Tuhan pagalaiat si Semaya, tai Nehelam nenda: Kalulut si Semaya amusibalangania ka tubum, kenanen bai ta Akukoiniakenia, samba aibailiuakean kam mutonembaga ka patajuat,

³² iageti kasene le' ngangan Tuhan: Bulatnia te, Kuukum le geti si Semaya, tai Nehelam nenda, samba muntogatnia: ta'anai berisara kamuntogatnia geti mukukuddu ka talagat bangsa nene masiitco simaeru sigalaiakenenKu ka paamianKu, kise te ngangan Tuhan, aipoi ai ainanaan sirimanua mutaimarereddet kai Tuhan.