Jer. 28 - BUKO SIPUNENAN

Nabi Jeremia masisaggangi nabi Hananya

¹ Ka rura nenda leuet, ka panandaat puparentaat Zedekia, rimata Jehuda, ka laggo sikalima rura sikaepat, kuanangan nabi Hananya togat Azur sibara ka Gibeon nenda katubuku ka uman Tuhan, kamatadda tai imam samba sangamberi taikauma:

² Kasene' le' ngangan Tuhan Sebaot, Taikamanuan Israel: Aku takkiakean loina bairanen rimata Babel nenda.

³ Kabagat ruangarura nene Kutotoiliake le' ka kudduat nene sangamberi pugalai lalep Tuhan sialat Nebukadnezar, rimata Babel samba siambitnia ka Babel.

⁴ Samba leu si Jokhoya togat Joyakim, rimata Jehuda, pasamba sangamberi sirimanua siribbaiakenen sibara ka Jehuda siambit ka Babel Kutoiliake le' ka kudduat nene, kise te' ngangan Tuhan! Bulatnia te', Kutatakkiake le' bairanen rimata Babel nenda!

⁵ Iageti panibonangan nabi Jeremia kai nabi Hananya kamatatda tai imam samba kamatat sangamberi taikauma sipuririo ka uman Tuhan nenda,

⁶ kuanangan nabi Jeremia: Amen! Kepei igalai si Tuhan kele nene! Kepei isunnake le' sangamberi tiboiet sisibalaakenennu nenda pasamba totoiliakena sangamberi pugalai uman Tuhan samba sangamberi sirimanua situriribbai nenda ka Babel ka kudduat nene.

⁷ Sarat, arepi le tiboiet sitiboakenenku geti ka talingam samba ka talingan sangamberi taikauma nene:

⁸ Sangamberi tai nabi sibabara ke pei aku samba siburu amusibalangan sia ka sangamberi laggai samba katubut sangamberi purimataat sabeu pagalaiat pasaggangan samba pugejaat baga sabeu samba besi sipamamatei.

⁹ Tapoi pagalaian sara nabi sipusisibala pagalaiat paabanan, ke sibalat nabi nenda isunnale, iapei te maagainangan, nabi nenda sibulatnia sikoiniakenen Tuhan.

¹⁰ Lepa geti alanangan nabi Hananya bairanen ka tetekat nabi Jeremia, lepa takkiakenangannia.

¹¹ Kuanangan si Hananya kamatat sangamberi taikauama nenda: Kasene le' ngangan Tuhan: Kabagat ruangarura nene kasedda leu te' Kutakkiake bairanen loina Nebukadnezar, rimata Babel nenda, ka tetekatda sangamberi bangsa! Tapoi tuitui le' nabi Jeremia barania sedda.

¹² Iageti lepat aitakkiake si nabi Hananya bairanen loina ka tetekat nabi Jeremia, oi tiboiet Tuhan kai Jeremia:

¹³ “Kenan masisegeake katubut nabi Hananya: Kasene le' ngangan Tuhan: Anutakkiakean bairanen loina, tapoi Kugagalai le geti bairanen sibara ka laba sibailiu silinia!

¹⁴ Aipoi kise le tiboiet Tuhan Sebaot, Taikamanua Israel: Bairanen sibara ka laba Kukakau le ka tetekat sangamberi bangsa nene, bailiu makalarangan kai Nebukadnezar, rimata Babel; sibulatnia, sia geti makala le ka tubunia! Sangamberi tarimeu ka susu leu Akukauan ketubunia.

¹⁵ Lepa kuanangan nabi Jeremia kai nabi Hanaya: Arepmake, ale Hananya! Si Tuhan taaikoiniake ekeu, tapoi anubailiuakeaan bangsa nene motonembaga kapatajuat.

¹⁶ Aipoi kasenen le' nagngan Tuhan: Bulatnia te, Akukoiniakeaan ekeu masikaddiuake polak. Rura nene leuet mamatei le' ekeu, aipoi anukoiniakeaan bangsa nene masisaggangi si Tuhan.

¹⁷ Iageti matei le' nabi Hananya ka rura nenda leu et, ka laggo sikapitu.