Jer. 27 - BUKO SIPUNENAN

Tukoiniake masibairat bairanen Babel

¹ Ka panandaat puparentaat Zedekia, togat Josia rimata Jehuda, oi tiboiet Tuhan nene kai Jeremia.

² Kasene' le' ngangan Tuhan katubukku: Galai le' pengampra samba bairanen, lepa apraakenungannia ka tetekatnu!

³ Lepa geti kaunungan patonekat ka rimata Edom, ka rimata Moab, ka rimata Amon, ka rimata Tirus samba ka rimata Sidon ka paneiteiat sapakoinien siooi ka Jerusalem masiailiake si Zedekia, rimata Jehuda.

⁴ Parentaake le sia masisegeake ka tai tuanda: Kasene le' ngangan Tuhan Sebaot, Taikamanua Israel: Bui ta kasene' le' nukua ka tai tuanmui:

⁵ Aku le' aibaraakei polak, sirimanua samba tarimeu sibabara ka uddut polak pasamba ronKu sabeu samba parakku sipurerepa, samba Kukau le' ka sirimanua simaroipo kamataKu.

⁶ Samba kineiget, Kukakau le' sangamberi laggai nene kakabei paguguletKu, iate Nebukadnezar, rimata Babel; samba leu et tarimeu ka su'su Akukauan bule imareddet katubunia.

⁷ Sangamberi bangsa makala le' geti katubunia, ka tagogania samba kasapunuteteunia, teret iaili leu teteret ka laggainia, iageti maigi le' bangsa samba tai rimata sabeu geti masikalaakenia.

⁸ Tapoi bangsa samba purimataat sitaioba makala katubut Nebukadnezar, rimata Babel, samba sitaioba masikau tetekatnia masibairat bairanen rimata Babel, iageti bangsa nenda Kuukun geti pasamba lanjau, pulajeat samba besi pamamatei, kise' te' nganang Tuhan, teret Kusegeake sia kakabeinia.

⁹ Pagalaiat kam, bui nuarepikam tai nabimui, siagai tawa, siagai mupangamutet, siagai masipatuptup gogoi samba siagai mugaut sipasikukua kamatamui: Bui nuobakam makela ka rimata Babel!

¹⁰ Aipoi sia masisibalaake patajua le' katubumui bule nutuareukam ka polakmui, bailiunangan Kupasaragai kam samba masubumuian.

¹¹ Tapoi bangsa sioba masikau te'tekatnia katei bairanen rimata Babel samba simakala katubunia, iageti obaakekungan sia ka polakda, kise te' tiboiet Tuhan samba galairangannia samba kuddu sia sedda.”

¹² Katubut Zedekia, rimata Babel, aku tiboakean simakere, kuakungan: “Kau le' tetekatnu masibairat bairanen rimata Babel, kaunumakala ka tubunia samba ka takaumania, iageti purimanuanungan.

¹³ Angoi ekeu pasamba taikaumam bui tamatei kalulut lanjau, ka pulajeat samba ka besi sipamamatei kele sitiboakenen Tuhan pagalaiat bangsa sitaioba' makala katubut rimata Babel nenda?

¹⁴ Bui nuarepi tiboietda tai nabi sipasikukua katubum: Bui nuoba makala ka rimata Babel! Aipoi sibalatda patajuat le' katubum.

¹⁵ Aipoi ta Akukoiniake sia, kise' te' ngangan Tuhan, tapoi sibalatda patajuat le' ka oningKu, bailiu Kupasagai le' kam samba ibailiu le' masubu simakere' pasamba tai nabi sipusisibala katubumui nenda.

¹⁶ Ka tai imam samba ka sangamberi taikauma nenda leuet kupaninibo, kuakungan: Kise' le' ngangan Tuhan: Bui nuarepikam tiboietda tai nabimui sipusisibala katubumui: Bulatnia te, sangamberi pugalai ka uman Tuhan taan mauuju tuambit geti minca barania ka Babel! Aipoi sibalat sigalaira patajuat le' katubumui.

¹⁷ Bui nuarepikam sia, makala le' ka rimata Babel, iageti murimanua le' kam. Angoi laggai nene ibailiu le' karagatat?

¹⁸ Kebai bulatnia sia nenda nabi samba ke ai tiboiet Tuhan katubutra, kauan ratiddou kai Tuhan Sebaot, bule sangamberi pugalai sipulelegei ka uman Tuhan samba ka uma purimataat rimata Jehuda samba ka Jerusalem nenda buian ituambit ka Babel.

¹⁹ Aipoi kasene' le' ngangan Tuhan Sebaot pagalaiat sangamberi arigi, tappaiat koat, samba kalak, pugalai sipulelegei ka laggai nene,

²⁰ sitaiaalaket Nebukadnezar, rimata Babel, kateteret aiambit si Jekhonya togat Joyakim, rimata Jehuda ka turibbaiat pasamba sangamberi sipuute' ka Jehuda samba ka Jerusalem, barania ka Jerusalem ka Babel, –

²¹ bulatnia, kasene le' ngangan Tuhan Sebaot, Taikamanua Israel, pagalaiat pugalai sipulelegei nenda ka uman Tuhan samba ka uma purimataat rimata Jehuda samba ka Jerusalem:

²² Sangamberinia tuaambit le' ka Babel samba tugagalakngake le' sedda teret gogoi Kupuletseinia minca, kise le ngangan Tuhan, lepa ambitkungannia minca ka kudduat nene.