Jer. 26 - BUKO SIPUNENAN

Si Jeremia tumateiake kalulut aipatone kakakatainia Uman Sipunenan Nabi Uria tuukum simateiakenen

¹ Kapanandaat puparentaan Joyakim togat Josia rimata ka Jehuda, oi tiboiet nene sibara kai Tuhan, ngangania:

² Kasene le' ngangan Tuhan: “Purio' le' ka laibokat uman Tuhan samba kua le' katubutda sipulalaggai ka Jehuda siooi manindou ka uman Tuhan, sangamberi tiboiet siparentaakenKu segeakenennu katubutda. Bui nukibele' berisangatako'.

³ Kepei raoba masiarepi, samba senenra raoba masikaddiuake paraboatra sikatai, bailiu oleinanganbagaKu masigalaiake pugejaatbaga nenda katubutra kalulut sangamberi galaitubutda sikatai.

⁴ Oto kua le' katubutda: Kasenen le' ngangan Tuhan: Ke'bai ta'nuoba' masiarepi Aku, ta'nuoba' masitut surukatKu singananggakenenKu kamatamui,

⁵ samba ta'nuoba' masiarepi tiboietda sapaguguletKu, tai nabi simariuriu Kukoiniake katubum – tapoi ta'nuoba'kam masiarepi –

⁶ iageti Kugalai le' geti uma nene makere le' kele Silo, samba laggai nene ibailiu le' telei kasangamberi bangsa ka polak.”

⁷ Tai imam, tai nabi samba sangamberi taikauma masiarepi itiboake tiboiet nenda si Jeremia ka uman Tuhan.

⁸ Kele ailepa aitiboake si Jeremia sangamberi aponia siparentaakenen Tuhan bule tusegeake ka sangamberi taikauma nenda, iageti tai imam, tai nabi samba sangamberi taikauma nenda masilabania samba kuarangan: “Bui tamatei le ekeu!

⁹ Angoi nupupatonekat ka onin Tuhan pasamba masikua: Uma nene makere le' geti kele Silo, samba laggai nene ibailiu le' geti siragatat, pat taibaranangan minca sikudduijinia?” Samba sangamberi taikauma paruru masipurut si Jeremia ka uman Tuhan.

¹⁰ Kateteret araarep pagalaiat nene sautet laggai Jehuda, ei sia baratda ka uma purimataat rimata ka uman Tuhan, iageti kuddu ka matat baliu gugurukat sibau ka uman Tuhan

¹¹ Lepa panoborangan tai imam samba tai nabi nenda katubut sangamberi sautet laggai samba ka taikauma nenda, kuarangan: “Sirimanua nene mateu le' ituukum matei, aipoi nia aipotonean pagalaiat laggai nene, kele siarepit talingamui.”

¹² Tapoi kuanangan si Jeremia katubut sangamberi sautet laggai samba ka sangamberi taikauma nenda, kuanangannia: “Tuhan le' amasikoiniake aku bule tupatone pagalaiat uma samba laggai nene addeat masisegeake sangamberi tiboiet siarepimui nenda.

¹³ Kalulut nenda, paerukam paraboatmui samba galaitubumui, samba arepikam ngangan Tuhan Taikamanuamui, bailiu oleinanganbagania si Tuhan pagalaiat pugejaatbaga akenenNia katubumui.

¹⁴ Tapoi aku nene, bulatnia, ai aku ka kabeimui, galaiake le' kam katubukku aponia simaeru samba simaroipo ka matamui.

¹⁵ Sarat agai le' kam sibulatnia, ke'bai numateiake kam aku, oto kam le' sibaraake logau sirimanua sita'sele ka tubumui samba ka laggai nene samba ka silaggaijinia, aipoi sibulatnia si Tuhan le' masikoiniake aku mesisegeake sangamberi tiboiet nene katubumui.”

¹⁶ Lepa kuarangan sautet laggai samba taikauma nenda katubutda tai imam samba tai nabi nenda: “Sirimanua nene ta'mateu tuukum matei, aipoi amanibongannia katubutta ka onin Tuhan, Taikamanuanta.”

¹⁷ Kerenangan aipiga pa' sikebbukat laggai nenda murio leu kamata samba masikua katubut parurukatda taikauma nenda, kuarangan:

¹⁸ “Si Mikha, tai Moresyet nenda, aipoiliatnan ka teteret Hizkia, rimata Jehuda. Aikuangan katubut sangamberi bangsa Jehuda: Kasene' le; ngangan Tuhan Sebaot: Sion tupapakru le' geti kele mone samba Jerusalem ibailiu le' parurukat siragatat samba leleu Uman Sipunenan ibailiu le' geti tinambu simaigi loina.

¹⁹ Aimateiake leu pa' nia si Hizkia, rimata Jehuda, pasamba tai Jehuda? Ta'pa' maloto le' geti nia kai Tuhan, pat tiddounangan pukatekat Tuhan, bule ioleibagania si Tuhan pagalaiat pugejaatbaga akenenNia ka sia? Samba sita, taoba pa' masibaraake pugejaatbaga bulat sabeu katubutta saratta?”

²⁰ Ai leu sirimanua bagei sipupapatone ka onin Tuhan, iete si Uria togat Semaya, sibara ka Kiryat-Jearim. Ipatone pagalaiat laggai nene kere kele sikuat Jeremia.

²¹ Kateteret rimata Joyakim, pasamba sangamberi saladdunia samba sangamberi sautet laggai, masiarepi tiboiet nenda, iageti rimata leu masigaba enungan itumateiakenia. Masiarep pagalaiat nenda oto malotonangan si uria, lepa putuituinangan samba segenia ka Misir.

²² Lepa geti rimata Joyakim koiniakenangan sirimanua ka Misir, iate Elnatan togat Akhbor pasamba piga pa' sirimanua.

²³ Alarangan si Uria ka Misir samba ambinrangannia kai rimata Joyakim. Rimata masikoiniake masimateiakenia pasamba lanjau samba masiribbaiake tubunia simamatei ka rateira taikauma simaturere.

²⁴ Tapoi si Jeremia sakerinangannia si Ahikam togat Safan, bailiu ta'an atukaunia ka kabeira taikauma bule itumateiakenia.