Jer. 25 - BUKO SIPUNENAN

Jehuda turiribbaiake le' geti ka Babel pitu pulungarura ujunia

¹ Tiboiet siooi katubut Jeremia pagalaiat sangamberi muntogat Jehuda kabagat rura sikaepat puparentaat Joyakim togat Josia, rimata Jehuda, iate ka rura siboiki puparentaat Nebukadnezar, rimata Babel.

² Tiboiet nenda aisegeakean nabi Jeremia ka sangamberi muntogat Jehuda samba kasangamberi sipulalaggai ka Jerusalem, kuanangan:

³ Barania ka rura sikapulutelu puparentaat Josia togat Amon, rimata Jehuda, teret gogoi nene, oto ruapulu telungarurangan ujunia, aioi tiboiet Tuhan katubukku samba mariuriu le' kutiboakenia katubum, tapoi ta'nuoba masiarepinia.

⁴ Mariuriu leu et ikoiniake si Tuhan katubum sangamberi paguguletNia, iate tai nabi, tapoi ta'nuobamasiarepi samba masilelekngakenia.

⁵ Kuarangan: Bauakekam paatuatmui senesenemui ka paraboatmui sikatai samba ka galaitubumui sikatai; Iageti mariuriunangan nupukuddukan ka polak siaket Tuhan kakam samba kataikebbukatmui, barania siburu' teret buru'buru.

⁶ Bui leu nututkam taikamanua bagei addeat mupagugulet samba masipanindoginia; bui nubaraakekam basit paatuatKu pasamba sigalai kabeimui, bule bui Kubaraake pugejaatbaga katubumui.

⁷ Tapoi ta'nuarepikam Aku, kise te' ngangan Tuhan, bailiu baraakemuian besit paatuatKu pasamba sigalai kabeimui addeat pugejaatbagamui saramui.

⁸ Kalulut nenda kasene le' ngangan Tuhan Sebaot: Kalulut ta'anuarepikam sangamberi tiboietKu,

⁹ bulatnia te', Kusogai le' geti sangamberi muntogat sibara ka Bare – kise te' ngangan Tuhan – masikoiniake masisogai si Nebukadnezar, rimta Babel, paguguletKu nenda; Kusosogai le' sia masisaggangi laggai nene, masisaggangi sikudduijinia samba masisaggangi sangamberi bangsa kabebenia nene, Kususubuaake le' geti samba Kugalai ibailiu kalotoakenen, ibailiu paloloiet samba ibailiu simagarak teret buruburu.

¹⁰ Kutataake le' geti katalagatra angkatbaga samba nganga goratbaga, ngangan talimouakenen simantau samba sinanalep, nau lasung samba torot alito.

¹¹ Iageti sangaliot laggai nene ibailiu geti siragatat samba magarak, samba sangamberi bangsa nene ibailiu geti pagugulet katubut rimata Babel pitu pulungarura ujunia.

¹² Pasat nenda muine ka pitu pulungarura nenda, kise te' ngangan Tuhan, Iageti Kugalai le' lumun katubut rimata Babel samba ka bangsa nenda kalulut puseleatra, kasedda leu et ka laggaira tai Kasdim, pasamba masigalai ibailiunia sangamberi kudduat simagarak teret buruburu.

¹³ Kusaksakngake le' ka laggai nene sangamberi aponia sikuaKu pagalaiat nia, iate sangamberi aponia sitususurat kabagat buko nene seperti sipatonet Jeremia pagalaiat sangamberi bangsa nenda.

¹⁴ Aipoi sia leu et geti ibailiu le' pagugulet ka sangamberi bangsa simigi samba tai rimata sabeu, samba Kululumunake le' sia siripot sigalaira samba siripot sigalai kabeira.”

Pulokat golut Tuhan ka sangamberi bangsa

¹⁵ Kasene le' ngangan Tuhan, Taikamanuan Israel, katubuku: “Ala' le' kakabeiKu pulokat ai kabagania anggur oloi golu' nene samba bagania kauralonia sangamberi bangsa kaipai Kukoiniake ekeu,

¹⁶ bule' ralonia, Ke'bai ralonia, ipakaddo samba ipaingo sia kalulut lanjau kaunenKu geti katalagatra.

¹⁷ Iageti alakungan pulokat anggur nenda kakabei Tuhan, kaukungan ralonia sangamberi bangsa kaipa aikoiniake aku si Tuhan,

¹⁸ iate katubut Jerusalem samba ka sangamberi laggai Jehuda pasamba sangamberi rimatania samba sangamberi sautet laggaira, addeat masigalai sangamberinia nenda ibailiu siragatat, pugarangan samba paloloiat samba telei kele pagalaiat ka gogoi nene;

¹⁹ katubut Firaun, rimata Misir, pasamba sipugagalainia, sautet laggai samba sangamberi taikaumania,

²⁰ samba katubut sangamberi sirimanua sipagagalalu sibara ka senen bangsa; katubut sangamberi rimata laggai Us; katubut sangamberi rimata laggai Filistin, iate Askelo, Gaza, Ekron samba sangamberi sirimanua sipuririmanua sikuddu ka Amon;

²¹ katubut Edom, Moab samba tatogat Amon;

²² katubut sangamberi rimata Tirus, sangamberi rimata Sidon samba katubut tai rimata ka polak puriringan ka silat koat;

²³ katubut Dedan, Tema, Bus samba katubut sangamberi sirimanua sisapu bebet sangalio bebet alainia;

²⁴ katubut sangamberi rimata Arab sikukuddu ka simatangeu;

²⁵ katubut sangamberi rimata Zimri, katubut sangamberi rimata Elam samba katubut sangamberi rimata Madai;

²⁶ katubut sangamberi rimata sibara ka bare, kalegre samba kasareunan, pasasara, samba katubut sangamberi purimataat polak sibabara ka uddut polak samba rimata Sesakh ilo' leuet lepat ka sia.

²⁷ Lepe buitanukua katubutda: Kasene' le' ngangan Tuhan Sebaot, Taikamanuan Israel: Lokam teret ipuinengkam samba nupugelekam! Maibu le' samba ba'an tususuru minca, kalulut lanjau akenenKu katalagamui!

²⁸ Tapoi ke'bai maaila sia masisilo pulokat nenda ka kabeinu bule ralo' bagania, iageti buitanukua katubutda: Kasene le' ngangan Tuhan Sebaot: Buitanu lo' le'!

²⁹ Aipoi bulatnia ka laggai sisogaiakenen oningKu, ka laggai nenda Kutataddaake geti masibaraake pugejaatbaga; bebelangan pa' ekeu nene ka ukuman? tabebela ekeu ka ukuman, aipoi Kuiipoake le' lanjau katubut sangamberi sikuddu ka polak, kise te' Tuhan Sebaot.

³⁰ Samba ekeu nene, patone' le' sangamberi tiboiet nene katubutda. Kua katubutda: mugerei sialei golu le' geti si Tuhan barania ka kudduat simabuak samba masipaarep ngangaNia barania ka kudduat pukunemanNia sipunenan; Murorou le' Nia simakope ka kudduat pujagoatNia, sara gerei, kele gereira sipasipipiot buat anggur, katubut sangamberi sikukuddu ka polak.

³¹ Ukkut pasaggangan geti pat aili ka tu'tut polak, aipoi si Tuhan ai panganduat ka sangamberi bangsa. Pakakaro le' geti Nia pasamba sangamberi sipungongoingoi: Sangamberi sirimanua sikatai kaunangan sia ka lanjau, kise te' ngangan Tuhan.

³² Kasene le' ngangan Tuhan Sebaot: Bulatnia te' Pugejaatbaga geti irararat le' barania ka bangsa ka bangsa, sara rusa simapiret geti muungku; barania kasangamberi tu'tut polak.

³³ Iageti ka gogoi nenda tubut sirimanua simamatei, simateiakenen Tuhan murapi le' barania ka tu'tut polak teret ka tu'tut polak. Sia geti ta'tusosoibi, ta leuet geti turururuake samba ta' turarateiake; ibailiu geti sia pasiramo polak ka mone.

³⁴ Pungunyu le' samba pugerei le, ale sipasijajago! Paguilukam tubumui ka abu, ale sangamberi siuteake muangkuat kambing samba biribiri! Aipoi amamuinean teterenia tuja'ja kam, samba mabubukat gati kam kele biribiri simanteu sipili.

³⁵ Iageti ka sipasijajago ta'ananai kabelaiat, samba ka siuteake mungkuat biribiri ta'ananai kabebela.

³⁶ Arep! rapugerei si pasijajago, sipasiuteake biribiri mungunyu'! Aipoi aipakataian si Tuhan su'su pujagoadra,

³⁷ samba saingere le' su'su parou simalainge, kalulut golu' Tuhan sipujujulu nenda.

³⁸ Kele singa Ikaddiuake bakkat se'se pulippunanNia, aipoi laggaira aibailiaun simagarak, kalulut kopet geget lanjau, kalulut goluNia sipujujulu.”