Jer. 24 - BUKO SIPUNENAN

Pomoilianan pagalaiat rua gara'ga buat sileu

¹ Itcoan, aipakoinonggan si Tuhan katubukku ruangara'ga buat sileu murio kamatat uman Tuhan. Ai puaili nenda lepat aiambit ka pasiribbaiat si Jekhonya togat Joyakim rimata Jehuda pasamba sikebbukat laggai Jehuda, simaagaimugalai samba siagai musipaddai laba' sibara ka Jerusalem si Nebukadnezar rimata Babilonia, samba leu ambitnangan sia ka Babel.

² Gara'ga sisara bagania buat sileu bulat simalainge, kele buat sileu ka panandat aipubu, tapoi gara'ga bagei bagania buat sileu simakatai, sitaioi tukom kalulut katainia.

³ Lepa kuanangan si Tuhan katubukku, “Aponia anuintco, ale Jeremia?” Iageti alegikungannia, “Buat sileu! Buat sileu simaeru nenda bulat maeru, samba buat sileu simakatai, sitaioi tukom kalulut katainia.”

⁴ Lepa geti oi tiboiet Tuhan katubukku, ngangania:

⁵ “Kasene' le' ngangan Tuhan, Taikamanuan Israel: Makere' le' kele buat sileu simaeru nene, kise' te' Kulelekngake geti pueerura tai Jehuda siambitKu sibara kakudduat nene ka turibbaiat, ka laggaira tai Kasdim.

⁶ Iageti Kuipoake le' mataKu katubutda addeat pueerura, samba Kuambit le' geti sia toili minca ka laggai nene. Kurioake geti sia, ta' masibukkatnakenia; Kuurep le' geti, ta' masiburaunia.

⁷ Kukau geti ka sia paatuat addeat masiagai Aku, iate' Aku te Tuhan. Ibabailiu le' geti sia paamianKu, samba Aku nene ibailiu le' Taikamanunra, aipoi arabauake le' geti paatuatra toili katubukKu kamuinet paatuatnia.

⁸ Tapoi kele buat sileu simakatai nenda, sitaioi tukom kalulut taimaerunia – bulatnia, kasene le' ngangan Tuhan – kise te' kugagalai katubut Zedekia, rimata Jehuda, pasamba sikebbukat laggai, pasamba tai Jerusalem sipulelegei sikuddu ka laggai nene samba sangamberi sirimanua simariuriu mukuddu ka laggai Misir.

⁹ Kubabailiuake geti sia kalotoakenen ka sangamberi purimataat ka polak, ibailiu simalolit samba pasikat, ibailiu sailuket samba telei ka sangamberi kudduat kaipa Akupasaragai sia.

¹⁰ Samba Kuaake le' geti pasaggangan, pulajeat, samba besi' sipamamatei katalagatra, pat sapru sia itutataake ka uddut polak sikauKu katubutra samba ka taikebbukatra.”