Jer. 23 - BUKO SIPUNENAN

Palelengan pagalaiat Sinulat David simaroipo

¹ Paan te' kakam sipasijajago siobaake imalimai samba imasaragai biribiri jagoetKu!” – kise te ngangan Tuhan.

² Kalulut nenda kasenen le' ngangan Tuhan, Taikamanuan Israel, katubut sipasijajago sijago bangsaKu: “Anuobaakeankam imasaragai samba ipusabu biribiriKu samba ta'nujagokamnia. Iageti agaikam, Kusisisiliake geti katubumui sangamberi sigalaimui sikatai, kise te' ngangan Tuhan.

³ Samba sarakKu le' geti masirururuake biribiri-ku sipulelegei sibara kasenen laggai kaipa Akupasabu sia samba Kuambit le' sia minca geti ka laggaira: bara le' tuppai tubutda samba tuppainangan igitda.

⁴ Kurioake le geti katalagatda sipasijajago sijago sia, bailiu taimalotorangan, taituge'gerangan samba berisangamuneng leu simalilimai, kise te' ngangan Tuhan.

⁵ Bulatnia te', babara te' geti teterenia, kise te' ngangan Tuhan, Kutu'tu'tuake le' Sinula simaroipo kai David. Mupaparen le' nia sibailiu rimata simaroipo samba igagalaiake geti puroipoat samba pubulanan ka laggai.

⁶ Kateterenia Jehuda tubebelaake le', samba Israel muririmanua le' kabagat aban; samba nene le' ononia rakau sirimanua katubunia: Tuhan puroipoatta.

⁷ Kalulut nenda, kise te' ngangan Tuhan, bulatnia te', babara te' geti teterenia, sirimanua ta'an rakukua: Kai Tuhan sipuririmanua sipalululu tai Israel bela ka laggai Misir!,

⁸ tapoi: Kai Tuhan sipuririmanua sipalululu samba sipasiambit toili muntogat Israel bela ka laggai ka isit ka bare, samba sibara ka sangamberi laggai kaipa aipasabu sia!, iageti kudduat sia kapolakda senenda.”

Masisaggangi sangamberi nabi sipatataju

⁹ Pagalaiat sangamberi nabi. Bubu le patuatku ka kaukdukku, sangamberi tolatku magulu. Putubuatku kele sirimanua siroro' kele taimanteu simigi mulo' anggur, kalulut si Tuhan samba kalulut tiboietNia sipunenan.

¹⁰ Laggai asun sangamberi sirimanua sipaelet; bulatnia, kalulut pateleiat nene garak le' laggai samba laju' le sangamberi se'se' ka su'su; apa le' rakukru iate pukakatai, samba ronda iate ta'katuroipoat.

¹¹ “Bulatnia, nabi samba leu imam masigalaiake le'; ka lalepKu leu et Kuaili le' pukakataira' kise te' ngangan Tuhan.

¹² Lulut nenda, enunganda makere' le' geti enungan simalutlut ka sia; ka bagat pugepgeman tusosoksok le' sia samba bele' geti sia sedda; aipoi Kubabaraake le' geti pugejaatbaga katubutda, ka rura teteret tuukum sia, kise te' ngangan Tuhan.

¹³ Katalagatda tai nabi Samaria Aku itco ai sitaimateu': mupatoneket le' sia ka onin Baal samba masipapepe paamianKu Israel.

¹⁴ Tapoi katalagatda tai nabi Jerusalem Aku itco ai galai tubu kalotoakenen simakope katai: paelet le' sia samba muparoboat sitaimaroipo; raparon le' paatuat sangamberi sirimanua sigalai katai, bailiu berisara sia sirimanua sioba masibauake paatuat ka pukakatainia; sangamberitda aibailiuan le' kele Sodom kaKu samba sipulaggai kele Gomora le'.”

¹⁵ Kalulut nenda kasene le' ngangan Tuhan Sebaot pagalaiat tai nabi nenda: “Bulatnia te', Kukakau geti komenda simapongit samba mulo' tuba, aipoi barania ka tai nabi Jerusalem atusaluan pukakatai ka sangaliot laggai.”

¹⁶ Kasene le' ngangan Tuhan Sebaot “Ba' arepi tiboietda tai nabi sipupapatonekat katubumui! Sarat masiake pukakaronan siboboi katubum le' sia, samba sarat masitiboake itcot matat paatuatda saratda le', ta' aponia siooi sibara ka ngungun Tuhan;

¹⁷ mareirei le' rakua katubut sangamberi sirimanua masipataju ngangan Tuhan: Maarau geti kam! samba katubut senen sirimanua sipasitutut pukelakatnia kuarangan: pagejaatbaga geti ta'ioorak kam!”

¹⁸ Aipoi kasei pa' siooi kabagat parurukat pusaraat kai Tuhan, bailiu lelekakenangan samba arepinangan tiboietNia? Kasei pa' silelekake tiboietNia samba masiarepinia?

¹⁹ Itco pei, rusa talabarit Tuhan, iate oloi golu, abelangan masilalau, – kasou baliok – samba tugorosot isaksak ute'ra sangamberi sirimanua sikatai.

²⁰ Golut Tuhan ta, maleleppet teret Igalaiake samba Ipakoinong aponia pinaatuNia kabagat paatuatNia; kagogoi kalepakatnia agaimuian bulat simakolou pagalaiat nenda.

²¹ “Ta' Akukoniake tai nabi nenda, tapoi mangamang le' sia; ta' amanibo Aku katubutda tapoi mupatonekat le' sia.

²² Moibai sia kabagat parururkat pusaraatKu, bulatnia rapakakakra le' tiboietKu ka sapaamianKu ratoiliake sia minca baratda kapuparaboanannia sikatai samba kagalaitubunia sikatai.

²³ Iangan pa' Aku nene sarat Taikamanua sibara kalegre, kise te' ngangan Tuhan, samba ta' Taikamanua sibabara ka sareunan leu?

²⁴ Ke' bai ai sara sirimanua silipputnake tubuna ka kudduat pulippunan, iangan pa' ta'Kuiitconia? kise te' ngangan Tuhan. Ta' pa' Kususunnake manua samba polak? kise te' ngangan Tuhan.

²⁵ Akuarepman aponia sikuatda tai nabi sipupapatonekat ka patajuat ka oningKu pasamba masikua: Amangamutnan aku, amangamutnan aku!

²⁶ Teret pigamoi pagalaiat nenda ai kapaatuatda tai nabi sipupapatonekat patajuat samba mupatonekat patajuat sinandat paatuatnia sarania,

²⁷ sipaatu masibailiuake paamianKu masikalipogi oningKu pasamba sangamberi pangamutetnia sipungunguanakenda ka senenda, kele taikebbukatda rakalipogi oningKu kalulut Baal?

²⁸ Nabi sipangangamutet, eddangania ipungungunake pangamutetnia nenda, samba nabi sibakkati tiboietKu, eddangannia ipungunguake tiboietKu nenda simakolou! Aponia pa' patapinannia legei siperakat bera ka gandum? kise te' ngangan Tuhan.

²⁹ Ta'pa' TiboietKu kele obengan le', kise te' ngangan Tuhan samba kele panoko' sigatcaake leleu bukku?

³⁰ Kalulut nenda, bulatnia te', ibabailiu le' Aku saggakda tai nabi, kise' te' ngangan Tuhan, sinangkaou tiboietKu senenda sibara ka saleinia.

³¹ Bulatnia te', ibabailiu le' Aku saggakda tai nabi, kise' te' ngangan Tuhan, sipakei jalainia kasiobat bagania masitiboake tiboiet Taikamanua.

³² Bulatnia te', ibabailiu le' Aku saggakda sia sipatone sangamberi pangamutet patajuat, kise' te' ngangan Tuhan, samba sipungunguake samba sipepeake paamianKu pasamba patajuat samba titiboatnia simasaliu. Ta'pei Akukoiniake sia samba ta'pei atuparentaake sia. Bulat ta'anai lulutra ka bangsa nene, kise' te ngangan Tuhan.

³³ Ke'bai bangsa nene – sara nabi ele imam – masiparere katubum: Aponia Patoneket bairanen aiake si Tuhan? iageti alegunungan sia: Kam te' bairanen nenda! Kalulut nenda Kuriribbaiake geti kam kamataKu, kise' te' ngangan Tuhan.

³⁴ Ai leu bagei nabi ele imam ele taikauma sipasititiboake pagalaiat Panonekat bairanen siaket Tuhan, katubut sirimanua nenda samba muntogatnia Kugagalaiake geti lumun.

³⁵ Kasene' le' nukukuakam, senen-senen ka aleinia samba ka sasarainania: Aponia alegiet Tuhan ele Aponia tiboiet Tuhan?

³⁶ Tapoi Patonekat bairanen siaket Tuhan buian nukua minca, aipoi sibailiu bairanen ka senen sirimanua iate' tiboietnia sarania le', kalulut anupabailokngan kam sangamberi tiboiet Taikamanua sipuririmanua, Tuhan Sebaot, Taikamanuanta.

³⁷ Kasene' le' nukua katubut nabi: Aponia alegiat Tuhan katubum? ele: Aponia tiboiet Tuhan?

³⁸ Tapoi ke' aipeile nutitiboake pagalaiat Patonekat bairanen siaket Tuhan, iageti kasene' le' ngangan Tuhan: Kalulut aipeile nupapakeikam titiboat Patonekat bairanen siaket Tuhan nenda, kenanen bai Kukoiniake sirimanua manibo katubum: Bui'an nutiboake pagalaiat Patoneket bairanen siaket Tuhan,

³⁹ iageti bulatnia te' Kulalaba' le' kam samba Kuribbaiake le' kam kamataKu, kam samba leu laggai siakeKu katubumui samba ketubutda taikebbukatmui nenda.

⁴⁰ Kubabaraake le' katuailaatmui teret buruburu samba pulolinan lolit teret buruburu sitaioi tukalipogi.”