Jer. 22 - BUKO SIPUNENAN

¹ Kasene le' ngangan Tuhan: “Kenan ka kudduat purimataat rimata Jehuda samba segeake sedda nganga nene!

² Kua le': Arepmake ngangan Tuhan, ale rimata Jehuda sipukukuddu kauddut uddenan purimataat David, ekeu, sangamberi sipaguguletnu samba taikaumam situguguru ka matat baliu gugurukat nene!

³ Kasene le' ngangan Tuhan: Galaiake le' puroipoat samba pubulanan, obaake le' sirimanua siraurau kakabei sirimanua sipasirarauraunia, bui nuorei samba bui nugalai pugege katubut sirimanua siooiake, siputata' ina, samba sipululumang samba bui numateiake sirimanua sita'sele ka kudduat nene!

⁴ Aipoi ke'sibulatnia nuenungakekam sangamberinia nenda, iageti ka matat baliu gugurukat kudduat purimataat nene mukununung le ratuguru tai rimata sikukuddu ka kudduat purimataan David sialei mukereta samba mukuro': sia nenda, sapagugulet samba taikaumania.

⁵ Tapoi ke' ta'nuarepikam sangamberi tiboiet nene, iageti amusuppangan Aku ka tubuKu, kise le' ngangan Tuhan, uma purimataat nene ibailiu geti karagatat.

⁶ Aipoi kasene le' ngangan Tuhan pagalaiat siakauman rimata Jehuda: Ekeu kele Gilead le' kaku, kele tu'tut leleu Libanon! Tapoi bulatnia le' Kugalai le ekeu ibailiu su'su simatangeu, ibailiu laggai sitaikukudduijiet sirimanua.

⁷ Kuteuake le' sipakatai ekeu, senenda pasamba pamateira; ratadde te geti loinat sileu sipilim samba ribbaiakerangannia le' ka obengan.

⁸ Samba ke' maigi bai bangsa situsabau ka laggai nene, iageti manibo le sia ka sara sirimanua: Angoi igalaiake si Tuhan kele nenda ka laggai sabeu nene?

⁹ Raalegi geti sirimanua: Kalulut arakalipogingan poi palelengan Tuhan, Taikamanuanda, samba amanindouan sia ka taikamanua bagei samba musuru' katubunia.”

Patonekat masisaggangi rimata Salum

¹⁰ Bui nusoibikam sirimanua simamatei samba bui nupureureubaga kalulut nia. Maeru peile nusoibikam nia situtuitui, aipoi taan geti totoilinia minca, ta'an geti iitco minca polak putu'tukat matania.

¹¹ Aipoi kasene le' ngangan Tuhan pagalaiat si Salum, togat Josia, rimata Jehuda, sibailiu rimata sipasisiliake si Josia ukkuinia, samba sikaddiuake kudduat nene: Ta'an geti totoilinia sene',

¹² tapoi mamatei le getinia ka kudduat katuribbaiatnia, samba ta'aan iitco minca laggai nene.”

Patonekat masisaggangi rimata Joyakim

¹³ Pa'an te nia sipasigagalai uman purimataatnia siripokat ka sitaimaroipo samba pukudduanan simalainge siripokat pubuangan paatuat, sipasikakau rapugalai saaleinia sita'upah;

¹⁴ sipasikukua, “Kuoba masirioake uma purimataat sabeu simalio samba kudduat simalainge simalio!”, lepa titinangan rupit uma purimataat bule igalai jandela, tulapriji kudduat purimataat nenda pasamba loina sileu samba cetnangannia simabonan.

¹⁵ Nukua le' rimata pa' ekeu, ke'patakai bai ekeu kapasipapakei loina pinilok? Ta'pa mukokom samba mulolo leu ukkuinu samba ibakkati pusanangan? Tapoi igalai puroipoat samba pubulanan,

¹⁶ pasamba masiparoipo pakarot sirimanua sipangongorik samba simageba' kabagat roipo. Ta'pa nenda oninia pasiaagai Aku? kise te' ngangan Tuhan.

¹⁷ Tapoi matam samba paatuatnu sarat masibesiake ka pasikukukru uktuk le', ka pasimamateiake sirimanua sita'sele, ka pasiraraurau samba ka pasioorei!

¹⁸ Lulut nenda kasene le' ngangan Tuhan pagalaiat si Joyakim togat Josia, rimata Jehuda: “Ta'an rasosoibinia geti sirimanua: Ale kebbuku! Ale maniuku! Ta'an rasosoibinia geti sirimanua: Ale tuan! Ale rimataku!

¹⁹ Turateiakenia geti kele turatei kaliddei, tugirit samba turibbaiake ka ujat matat baliu gugurukat Jerusalem.”

Patonekat masisaggangi rimata Konya

²⁰ Tusakai le' ka leleu Libanon samba pugerei le'! Paarep le' ngangam ka paleleuleu Basan! Pugerei le' barania ka paleleuleu Arabim, aipoi sangamberi simanuntubagam amakataian!

²¹ Amanibongan Aku katubum aipeile ekeu maeru puririmanua, tapoi anukua le': Ta'kuoba masiarepmake!” Nenda te' galaitubum kateteret bau tubum, aipoi ta'anuoba masiarepi ngangangKu!

²² Sangamberi sirimanua sipasijago kam itataake geti rusa simapiret, samba sangamberi simanuntubagam tuambit geti itukabe'. Kateteret nenda geti ibailiu le' ekeu maaila samba malolit kalulut sibara kasangamberi pukakatainu.

²³ Ale ekeu sipukukuddu ka leleu Libanon, samba sipururumun ka sangamberi loinat pinilok! Makope le' nupungu'ngu' kateteret iorak ekeu besi' besi' kele bairanen sinanalep sipususule!

²⁴ Kululut Aku sipuririmanua, kise te' ngangan Tuhan, kenenen bai si Konya togat Joyakim, rimata Jehuda, iate kele sipsip Meterai kakabei sikattoetKu, tapoi Kububurau le' ekeu!

²⁵ Kukau le' ekeu ka kabei sangamberi sirimanua sipasibebesiake masiala' engam, ka kabei sangamberi sirimanua kalotoakenennu, ka kabei Nebukadnezar, rimata Babel, samba ka kabeira tai Kasdim.

²⁶ Kuriribbbaiake le ekeu samba inam situ'tuake matam ka laggai bagei, ta' kalaggai pututukat matam; sedda te' numamatei kam.

²⁷ Tapoi ka laggai repdemenbagatda ratoili sedda, ta'an geti totoili sia!”

²⁸ Aileu pa' si Konya nene sara bibilet loloiet, ragatakenenda sirimanua, ele sara pario' taioobaket sirimanua? Angoi tugiggikngake samba turibbaiakenia ka laggai taiaagaietnia?

²⁹ Ale laggai, laggai, laggai! Arepmake ngangan Tuhan!

³⁰ Kesene le' ngangan Tuhan: “Suratnake sirimanua nene sibailiu sirimanua sita'toga, sibailiu simanteu sitaimaungtuk tubu kabagat puririmanuania; aipoi beri sara kamuntogatnia simaungtuk tubu mukuddu ka kudduat purimataat David samba muparenta minca ka Jehuda.”