Jer. 21 - BUKO SIPUNENAN

Katuribbaiat rimata Zedekia tupaagai

¹ Tiboiet sooi sibara kai Tuhan katubut Jeremia, kateteret rimata Zedekia masikoiniake si Pasyhur togat Malkia samba imam Zefanya togat Maaseya, katubunia pasamba patoneket:

² “Parere'ake le' enunggan Tuhan addeat ka sita, aipoi si Nebukadnezar rimata Babel, masisasaggangi kai! Baleu ioba si Tuhan masigalaiake katubumai siripokat kele sangamberi kerek sigalaiNia, bailiu soksoknia si Nebukadnezar ikaddiuake kai.”

³ Kuanangan si Jeremia katubutda: “Kasene le' nukuakam kai Zedekia:

⁴ Kasene le' ngangan Tuhan, Taikamanuan Israel: Bulatnia te', Kutotoiliake le' geti palittei pasaggak siukkaakenenmui, sipakeimui pasaggak masisaggangi rimata Babel samba masisaggangi tai Kasdim sigoilikkam ka ujat irip; Kururuake le' geti nia ka laggai nene.

⁵ Aku le' geti masisaggangikam pasamba kabei situtotottoi, pasamba para simaron, pasamba golu, pasamba oloi golu samba pasamba golu' siabau.

⁶ Kupaboboki le' sikudduiji laggai nene, sirimanuania samba leu tarimeu; matei le' geti kalulut besi' sipamamatei simakope.

⁷ Lepa nenda, kise le' ngangan Tuhan, iageti si Zedekia, rimata Jehuda, samba sapaguguletnia samba taikauma ka laggai nene, legei sipuririmanua ka besi' sipamamatei, sibara ka lanjau samba ka pulajeat, Kusesegeake le' geti ka kabei Nebukadnezar, rimata Babel, iate ka kabei saggakda sibesiake masimateiake sia; rabo'bo' le sia sirimanua matei pasamba son lanjau ka tatat nuntutbaga, tatat katetbaga samba tatat katuaappe'.

⁸ Tapoi katubut bangsa nene buita'nukua: Kasene le' ngangan Tuhan: Bulatnia te', Kuake le' katubumui enungan purimanuaiat samba enungan kamateiat.

⁹ Kasei pa' sikukuddu ka laggai nene matei le' geti kalulut lanjau, pulajeat samba besi' sipamamatei; tapoi kasei pa' sibebela sibara sene' samba masiobaake tubu katai Kasdim sigoilik kam, mariuriu le' geti ipurimanua; engania ibailiu geti raurauget ka sia.

¹⁰ Aipoi Akusaklangan laggai nene addeat masibaraakeoringan samba ta' masibaraake puuktungannia, kise te' ngangan Tuhan. Laggai nene tukau le' geti ka kabei rimata Babel sipasilalabonia teret sapru pasamba obengan.”

Patonekat masisaggangi rimata Jehuda

¹¹ Katubut taikauman rimata Jehuda. Arepmake ngangan Tuhan:

¹² “Kasene le' ngangan Tuhan, ale muntogat David: Beleake le' ukum simaroipo senen simancep samba obaake le' kakabei sipasirauraunia sirimanua sioppu pubabakkatnia, bule oloi guluKu bui ipasilabo' kele obengan samba ipujulu ta'anai sipe'akenia, kalulut sangamberi galaitubumui sikatai!

¹³ Bulatnia te' ibailiu le' geti aku saggaknu, ale laggai kauddut pengleu, leleu bukku ka su'su', kise le' ngangan Tuhan, ale kam sipasikukua: Kasei maeme togorosot katubumai samba kasei maeme tuguru ka kudduat pukunemanmai?

¹⁴ Kugagalai le' geti masisiliake katubumui siripokat buat sigalaimui, kise te' ngangan Tuhan. Kujujuluake te' geti obengan ka leleunia sipasilalabo' isapru senengamata sibabara ka bebenia.”