Jer. 20 - BUKO SIPUNENAN

Pateleiat kai Pasyhur kalulut pasitatangsiake si Jeremia

¹ Pasyhur togat Imer, imam kateteret nenda sipasiuteake umun Tuhan, masiarepmake si Jeremia masipatone sangamberi tiboiet nenda.

² Lepa si Pasyhur bo'bonangan si nabi Jeremia samba kabeakenangannia ka matat baliu gugurukat Benjamin karubeiat ka pata ka uman Tuhan.

³ Tapoi kele aimapato si Pasyhur belaakenangan si Jeremia ka kakabekat nenda, kuanangan si Jeremia katubunia: “Si Tuhan masisogai onim ta'an si Pasyur, tapoi Kalotoakenen kasangamberi tutut polak.

⁴ Aipoi kise le' ngangan Tuhan: Bulatnia te', Kugagalai le' ibailiu ekeu pukarananbagam samba ka sangamberi sasuruaknu; tubukat matei le sia kalulut lanjau saggaknia kamatam. Samba sangalio Jehuda geti Kukau le' ka kabei rimata Babel geti ka pasiribbaiat ka Babel samba bo'bo' matei le' sia pasamba lanjau.

⁵ Samba leuet pukayoat laggai nene, sangamberi buat saggot tubutda, sangamberi bibilet simakeppu saki samba sangamberi pubulagananda tai rimata Jehuda Kukakau le' geti ka kabei saggaknia, sipasiraraurau, sipasirururuake samba masiambit sangamberinia nenda ka Babel.

⁶ Pagalaiat ekeu, ale Pasyur, samba sangamberi sirimanua sipukukuddu ka lalepnu, tuambit le' geti ekeu labaket; sege le' geti ekeu ka Babel samba matei sedda samba turateiake sedda: ekeu nene pasamba sangamberi suruaknu ka tubutda anusegeake patonekat patajuat.”

Hoihoi Jeremia kalulut sanenia puukuketnia

⁷ Anupusumingan aku, ale Tuhan, samba akuobaakean tubukku tupusumi; Ekeu pei le makope ron kaku samba anukalaakean aku. Aibailiuan le' aku ga'gatiet kasanganantat gogoi, sangamberi sirimanua masigegei aku.

⁸ Apoi senen kupanibo, bui tamugerei le' aku bui tamosoga: “Pugegeat! Paoreat!” Aipoi tiboiet Tuhan, aibailiuan paloloiet samba gegeiet kaku ka sanganantat gogoi,

⁹ Tapoi ke'bai mupaatuatku: “Ta'kuoba masirepdepNia samba ta'kuoba masitiboake tiboiet minca ka oniNia, “Iageti kabagat paatuatku ai sara kelean le' obengan sipujujulu, tuluplup ka sangamberi tolatku; masasaggo le' aku masiopmakenia, tapoi taanai ronku.

¹⁰ Akuarepman ngunyut sirimanua simigi: “Moi le' pulotokat sibara ka sangamberi tutut polak! Nganduake le' nia! Taoba le' masinganduakenia!” Sangamberi sirimanua sasuruakku masitaiko bebele' leu pa' aku kutusoksok: “Baleu iobaake tubunia itupusum, bailiu oinangan tukalaakenia, samba moi tugalai lumunta katubunia.”

¹¹ Tapoi ipaalei le' aku si Tuhan kele saladdu simagege, kalulut nenda sangamberi sirimanua sipasikukukru aku tusoksok bele le' samba ta'momoi ragalai aponia pa'. Bulat makope le' ailatda, aipoi ta'mariuriu pinaatutda, sara lolit teret buruburu tatukakalipogi!

¹² Ale Tuhan Sebaot, sipasisisibo sirimanua maroipo, sipasiitco paatuat, eddangannia kuitco lumunNu katubutda, aipoi katubuM le kusegeake pakaroku.

¹³ Puurai le' kai Tuhan, umun le' si Tuhan! Aipoi aibelaakean engan sirimanua simageba ka kabei sangamberi sirimanua sikatai.

¹⁴ Tutelei le' gogoi kateteret aiputu'tu' mataku! Eddangannia bui ipanukani gogoi kateteret aitutuake mataku inangku!

¹⁵ Tutelei sirimanua sipasiaambit katuaggaiat ka ukkuiku pasamba masikua: “Sara toga simanteu atututuakean kekeu!” sikaunia muangkabaga simakope.

¹⁶ Muaili te' ka gogoi nene kele ka sangamberi laggai sikataiakenen Tuhan ka tatat nuntut baga! Iarepi le' gerei kateteret simanceman samba gau'gau' ka teteret sina'go'!

¹⁷ Kalulut gogoi nenda ta'aimateiake aku aipei le aku ka suruket, pat inangku bailiu rateiku, samba musuruket le nia teret buru!

¹⁸ Angoi kubela ka suruket, masiitco pangoringan samba pureureugatbaga, bailiu sangamberi gogoiku sapru tusabau kabagat puaaila?