Jer. 2 - BUKO SIPUNENAN

Israel mutuitui katubut Tuhan

¹ Oi tiboiet Tuhan katubuku, ngangania:

² “Kenan masipaagai ka sipulalaggai ka Jerusalem samba kua: Kise le tiboiet Tuhan: Kurepdep le' nuntut bagam kateteret mabau pei le tubum, kapunununtut bagam kateteret ai bailiu ekeu siputatalimou, kipa nutut Aku kasimatangeu, ka laggai sita'anai siuremannia.

³ Kateteret nenda Israel masipunenan le' kai Tuhan, sibailiu bua siboiki sibara ka polakNia. Sangamberi sirimanua sipasikokom buania ibailiu le' masele, paoreat iorak sia, kise' te' tiboiet Tuhan.

⁴ Arepake' tiboiet Tuhan, ale samuntogat Jakob, ale sangamberi samuntogat Israel.

⁵ Kise' le' tiboiet Tuhan: Aponia pa' pajoat arasese taikebbukatmui katubukKu pat tuareurangan katubukKu? Ratutnake' le' sabulungan siboboi, pat ibailiu le' sia siboboi?

⁶ Samba ta'an aparere' sia minca: Kaipangan si Tuhan, sipalulu sita bela ka laggai Misir; samba masipaneinei sita ka simatangeu, ka polak simagarak samba sitaimagaktuk, ka polak simakope garak samba magepgep, ka polak taisasabauget sirimanua samba taikukudduijiet sirimanua?

⁷ Akuambitnan kam ka polak simaramo' addeat masinanam bua samba senengamata simaeru ka tubunia. Kele anutuguru' kam, palolitmuian polakKu; bakkat polakKu anubailiuake kam kasitsitnakenen.

⁸ Tai imam ta'an aparere' sia minca: Kaipangan si Tuhan? Sangamberi sirimanua sigalaiake' surukat ta'an araagai Aku, samba sia sipasijajago muparaboat sikatai ka tubuKu. Kaonin Baal le' rapanibo tai nabi, ratut le' sita'anaipaluluat.”

⁹ Aipoi Kupaukleake le' kam minca, kise' te' tiboiet Tuhan, samba pasamba sapunuteteunu Kupaukleake' le'.

¹⁰ Putalipoan le' ka polak bebet koatda tai Kitim samba itco; koiniake sirimanua ka Kedar samba lelekngake' simakolou! Itco, aileu pa' sipuaaili kele nene:

¹¹ amuali leu pa' sara bangsa sipasisasaili taikamanuania kenanen nenda ta' taikamanua sibulatnia? Tapoi, paamianKu masipasiliake Pulatsanannia ka sita'paluluat.

¹² Lulut nenda, ale manua, pungeungeuan! mulopot samba mugeret tubu simakope le, kise te' tiboiet Tuhan.

¹³ Kalulut ruangaminca aragalai jo' paamianKu: rakateiteiake le' Aku, bubuakat oinan purimanuaiat, bule ragaigai le' uggungan rubeiatda saratda, iate uggungan sipukpuk sitaioi masiruruake oinan.

¹⁴ Ai pa' Israel nenda pagugulet ele togat pagugulet? Iageti angoi le' ibailiunia raurauget?

¹⁵ Murou le' sangamberi singa sibau tubu ka tubunia, nau ngangania iabeuake le'; ragalai le' sirimanua laggainia ibailiu magarak, sangamberi laggainia sabeu malabo', ta'ananai sikudduijinia.

¹⁶ Mandaan leu' tai Memfis samba Tahpanhes aragulukngan bukkut ute'nu.

¹⁷ Ta' leu pa' ekeu le' amasigalai nene katubum, kalulut kakaddiuakenu, Tuhan Taikamanuam kateteret Ipalulu ekeu ka enungan.

¹⁸ Samba kineiget, aponia uktuknu nuei ka Misir, mulo' oinan kabagat oinan Nil pa? Samba aponia uktuknu nuei ka Asyur, mulo' oinan kabagat ionan Efrat pa?

¹⁹ Pukakatainu ikukukru le' geti ekeu, samba tuaareunu kai Tuhan iorei le' geti ekeu! Agai samba itco le', kopet katai samba besinia nukaddiuake Tuhan, Taikamanuam, samba ta'an mugeret tubu katubukKu, kise' le' ngangan Tuhan Taikamanua sebaot.

²⁰ Aipoi kateteret siburu pei le' anubakbakngakean bairanennu, anutakkiakean sesere pangampram, samba masikua: Ta'akuoba minca tupaguguletnake Aku. Mandean leu ka senen uddut leleu sipununuinuiat samba ka senen tei loina simalibbut nuperep samba muolop tubu.

²¹ Tapoi Akutu'tu'akean ekeu sibailiu loinat anggur sipili, sibailiu karamen bulat simalainge. Tapoi kineiget aisilingan aibailiuan ekeu loinat simabute', loinat anggur taipasisikeliet!

²² Mandean bai nubui tubum pasamba oinan abu, samba sabun simigi, tapoi lolit puseleatnu mariuriu le' ai ka mataKu, kise le' ngangan Tuhan Taikamanua.

²³ Kipa numaeme masikua: Ta'akupalolit tubukku, ta'akutut tai Baal? Itco le' galaitubum ka paleu leleu, agai le' aponia sigalaiakenennu: ale, unta sinanalep simanangka rere sipababalau ka senen kudduat,

²⁴ sibelaake tubu pabalau ka simatangeu, kalulut oba' masiengai tinobut! Kasei pa' moi masiomake pubobotbot ka pusimanteuat? Sangamberi sipasigagabania, buian imasaggao tubu, rasesese le' geti nia kateteret gogoi pusimanteu.

²⁵ Jago le', bule bui tamutarangai rerem samba bule buita imaonggou tolou lolokkatnu! Tapoi kuanungan: Siboboi le'! Siboboi le'! Aipoi manuntu bagakku ka sangamberi sirimanua siooiake', oto kuoba le' masitut sia.

²⁶ Kele imaila sipanananggkou kateteret ituailinia, kise te' imaila muntogat Israel, iate tai rimatania, sikebbukat laggainia, tai Imamnia samba tai nabinia,

²⁷ sipaninibo ka sangate'te' loina: Ekeu te' ukkuiku! samba ka bukku: Ekeu te' situ'tuake matakku! Bulatnia, rateiteiake le' Aku samba ta' ramattai Aku, tapoi kateteret iorak sia pugejaat baga kuarangan: Surungan masipaarau kai!

²⁸ Kaipangan ta kamanuamui sigalaimui nenda? Eddangannia ratusuru, ke'bai moi rapaarau ekeu ka teteret pugejaat bagamui! Aipoi kele iginia laggainu kise te' iginia tai kamanuamui, ale Jehuda!

²⁹ Angoi nuoba kam paukle pasamba Aku? Kam sangamberimui masigalai sikatai katubukKu kise te' ngangan Tuhan.

³⁰ Siboboi le' Aku paboboki tatogamui, nganturat ta'arasilo': lanjaumui aipamateian tai nabimui kele singa sibau tubu ipasipakatai.

³¹ Muntogat aponia kam nene? Lelekngake le' tiboiet Tuhan! Aibailiuan lepa Aku su'su' simatangeu ka tai Israel ele polak simagepgep le'? Iageti angoi rakua sapaamianKu: Abelangan kai, ta'an kuoba kai moi katubuM?

³² Momoi leu pa' sara siokko ikalipogi pulalaingeannia, ele sara siokko siputatalimou ikalipogi akkik tengania? Tapoi paamianKu masikalipogi Aku, kateteret ta'an tuagai tuadde ujunia.

³³ Apate erunia nupagaba enungannu masigaba pualakat baga! Lulut nenda leu nuubui tubum ka senen enungannu sikatai.

³⁴ Pat bara ka leppeinu logau sangamberi sirimanua simageba sita' sele; ta' kateteret arapasiragat rapanangkou anusese sia! Kenanen bai sangamberinia nenda kise',

³⁵ kuanungan: Ta' amasele aku! Kirenangan, goluNia aikaddiuakean aku! Bulatnia Kuaambit le' geti ekeu ka pasiukuman, kalulut anukua: Ta' amajo aku!

³⁶ Makope le' labbei nuitco masisili galai tubum! Ia leuet kalulut Misir ibailiu numaila kele anumaila kalulut Asyur.

³⁷ Sedda leuet geti nubela pasamba masiakkatnake kabeinu, aipoi aikeraakean sia si Tuhan katonemiennu baga samba ta'mauktuk ekeu ka tubutda.”