Jer. 19 - BUKO SIPUNENAN

Gelaiet sibara ka buli-buli simararagat

¹ Kasene le' ngangan Tuhan katubuku: “Kenan le' masisaki buli-buli sigalai sibara ka polak, lepa na'na' le pasamba ekeu piga pa' sikebbukat bangsa samba piga pa' taiimam simabaja,

² lepa geti ei kam ka Peleu Ben-Hinom ka ipot Matat baliu Gugurukat Karagatat katca! Sogaake le' sedda sangamberi tiboiet segeakenKu geti katubum!

³ Kua le': Arepmake ngangan Tuhan, ale tai rimata Jehuda samba sipulaggai ka Jerusalem! Kasene le' ngangan Tuhan Sebaot, Taikamanuan Israel: Bulatnia te' Kubabaraake le' geti pugejaatbaga ka kudduat nene, bailiu talingan sirimanua sipasiaarepnia mungepngep!

⁴ Aipoi arakaddiuakean Aku, atukauan kudduat nene ka taikamanua siooiake samba atulaboan buluakenen sene' ka taikamanua siooiake sitaiaagaietda samba taikebbukatda samba tai rimata Jehuda. Aragalaian kudduat nene sun le' logau sirimanua sita'anai sele.

⁵ Ararioake patinambu-tinambu pasibuluat kai Baal addeat masilabo' tatogatda sibailiu buluakenen silabo katubut Baal, sara galaiakenen sitaiparentaakenenKu ele sitaikukuanenKu samba taanai muontou ka paatuatKu.

⁶ Kalulut nenda, bulatnia te' babara geti teterenia, kise te' ngangan Tuhan, ka kudduat nene taan tuooniake minca: Tofet samba Peleu Be-Hinom, tapoi tuoniake le' Peleu Pamateiat.

⁷ Kuariake geti sangamberi pinaatutda tai Jehuda samba Jerusalem ka kudduat nene samba Kuparappo le' sia kalulut lanjau kamatat saggakda samba kalulut kabei sangamberi sirimanua sioba masiala enganda. Kuobaake le' geti tubutda simatei ikomnia sangamberi uma' ka tei manua samba sangamberi tarimeu ka polak.

⁸ Kugalai geti laggai nene, bailiu pukarananbaga samba ibailiu kalotoakenen. Senen sirimanua sisabaunia geti ibailiu makaratbaga samba maloto' kalulut sangamberi silippanan sioriknia.

⁹ Kugalai geti rakom akkulat sangamberi tatogania simanteu samba sinanalep, samba senen sirimanua masikop akkulat saaleinia, kabagat pangoringan samba besit tubu sibaraakenen saggaknia ka tubutda samba kalulut sangamberi sirimanua sioba masiala enganda.”

¹⁰ Lepa geti ragatnake le' buli-buli nenda ka matat sangamberi sirimanua siooi pasamba ekeu.

¹¹ Kua le' katubutda: Kasene le' ngangan Tuhan Sebaot: Kise te geti Kuragatnake bangsa nene ka laggai nene, kele sirimanua masiragatnake pugalai siagai mugalai pario', pat taioinangan tupaeru' minca. Samba Tofet ibailiu le' geti kudduat purateiat, kalulut taanai kudduat bagai pasirateiat.

¹² Kisedda te' kugagalai geti ka kudduat nene, kise le' ngangan Tuhan, samba ketubut silaggaijinia. Kugalai le' geti nene kele Tofet:

¹³ sangamberi lalep ka Jerusalem samba sangamberi lalepda tai rimata Jehuda ibailiu geti kasitsitnakenen kele kudduat Tofet; iate senen kabubuk lalep nenda aralaboan sirimanua buluakenen ketubut sangamberi saladdut manua samba masipanguruatnake buluakenen siuruakenen ka taikamanua bagei.”

¹⁴ Kateteret aitoili si Jeremia barania ka Tofet, ka kudduat aikoiniakenia si Tuhan masegeake patonekat, purionangan ka laibokat umun Tuhan samba panibonangan ka sangamberi sirimanua simigi:

¹⁵ “Kasene le' ngangan Tuhan Sebaot Taikamanuan Israel: Bulatnia te' Kubabaraake te' ka laggai nene samba kasenen laggai pabebebakenennia sangamberi pugejaatbaga sikuaKu iorak le geti sia, aipoi makela' le paatuatda samba ta'araarepi sangamberi tiboietKu.”