Jer. 18 - BUKO SIPUNENAN

Gelaiet sibara ka siagai mugalai pario'

¹ Tiboiet siooi sibara kai Tuhan katubut Jeremia, ngangania:

² “Kenan le' simaruei ka lalep siagaimugalai pariok! Sedda te' Kupaarep geti sangamberi tiboietKu katubum.”

³ Lepa ei aku kalep siagaimugalai pariok, samba maeru ainia masigagalai pariok.

⁴ Ke'bai tappaian, galaietnia nenda makatai kakabeinia, iageti sipugagalai pario nenda masigalainia minca bailiu tappaian bagei siripot aponia simaeru siobatbagania.

⁵ Lepa oi tiboiet Tuhan katubuku, ngangania:

⁶ “Iangan pa' ta' momoi kugalai katubum kele sigalai pariok nene, ale kam muntogat Israel! kise le ngangan Tuhan. Bulatnia, kele polak kakabei sipasigagalai pariok, kasedda leu te kam kabeiKu, ale muntogat Israel!

⁷ Ai teterenia Kutiboake pagalaiat sara bangsa samba pagalaiat sara purimataat, Kuburau geti, Kubukkatnake samba Kusubuakenia.

⁸ Tapoi ke'bai bangsa katubut kasei pa' Kukua kise aibauakean paatuatnia ka katainia, iageti oleinanganbagaKu, kalulut Aku pugejaatbaga sipinaatuaKu nenda katubutda.

⁹ Ai teterenia Kutiboake pagalaiat sara bangsa samba pagalaiat sara purimataat, Kugalai samba Kuurep geti sia.

¹⁰ Tapoi ke'bai ragalaiake aponia si katai kamataKu samba ta'raarepi ngangangKu, iageti oleinanganbagaKu, kalulut Aku masibaraake puuktungan sipinalelekKu nenda katubutda.

¹¹ Kalulut nenda, kua le katubudra tai Jahuda samba katubut sipulalaggai ka Jerusalem: Kasene le ngangan Tuhan: Bulatnia te', Aku nene aikupatatarek pugejaatbaga katubumui samba masiisiake pinaatu katubumui. Kauan senemui masibauake puparaboananmui sikatai, samba paerukam pubaraboananmui samba galaitubumui!

¹² Tapoi rakua le': Ta'anai lulunia! Aipoi kuoba le' kai mugalaitubu masitut pinaatumai senemai samba senenda masigalaike masitut pukelakat paatuatnia sikatai.”

¹³ Aipoi kasene le' ngangan Tuhan, “Sibo le' parereake kasenen tai bangsa kasei pa' amasiarep pagalaiat kele nene? Tatoga sinanalep Israel aragalaiakean pagalaiat bulat kalotoakenen!

¹⁴ Iangan bai isisili geti tinobut simabulau sibara ka leleu bukku Siryon? Iangan bai sasapru oinan leleu; oinan simasasau samba sipuguguruk.

¹⁵ Tapoi paaminKu arakalipogingan Aku, aralabo' le' buluakenen katubut taikamanua pusiboboiat; atusoksokan sia bele' ka sangamberi enunganda, iate sangamberi enungan baranangan kasiburu pei le', samba tusoip ka enungan, iate enungan sitaigagaktukngakenen.

¹⁶ Iageti rabailiuake le' laggainia ibailiu kalotoakeken bailiu le' gegeiet teret buruburu. Senen sirimanua sipasisasabaunia ibailiu le' maloto', samba rapagilik le' geti utera.

¹⁷ Kele rusa sikalaut, Kukau sia kamatat saggaknia. Kupakokoinong le' geti teiteiKu katubutda samba ta' pumataatKu kateteret gogoi pangoringanda.”

Panindougat Jeremia masitiddou pasilulumun ka saggaknia

¹⁸ Kuarangan: “Konan le' tagalaikam pukerekatbaga katubut Jeremia, aipoi imam ta'sasapru gelaiakenennia, sirimanua simasiku paatuat ta'sasapru nganturatnia samba nabi ta'sasapru tiboiet. Konan le' tabo'bo'kamnia pasamba ngangania samba bui tulelekngake senen sukuania!”

¹⁹ Puletsei aku, ale Tuhan, samba arepmake le' ngangan panganduatku!

²⁰ Isisiliake leu pa' puerukat pasamba pukakatai? Tapoi aragaigaian guluggu le' addeat kaku! Repdep le', amurioan aku ka mataM, samba amanibongan aku masiropmake sia, bule goluNu tuareuake ka sia.

²¹ Kalulut nenda kau le' sangamberi tatogadra ka pulajeat, samba obaake le' ite'te' sia lanjau! Eddangnia tainanalepdra imapepe toga samba taimanteura; eddangania ramatei taimanteu kalulut besi' simalangoket samba sangamberi matei kalulut lanjau ka pasaggangan!

²² Eddangannia imaarep katsi ka sangamberi lalepda, Ke'bai sinulut Nubaraake mungkuat sipasiraraurau katubutda! Aipoi aragaigaian uggungan masilaba' aku, samba aragalaian sesere masisere rereku.

²³ Tapoi Ekeu, ale Tuhan, Nuagai le' sangamberi sipinaatutdra masimateiake aku. Ba' appeake puseseletda, samba ba' poposa jotda kamataM, tapoi eddangania ratusoksok ka mataM; galaiake' le' katubutda ka gogoi pugolukatNu.”