Jer. 17 - BUKO SIPUNENAN

Nabi mupatuat kalulut bangsa si jo

¹ “Jot Jehuda atusuratnakeaan pasamba susurat laba', sonnia sibara ka intan, tusuratnake ka lei paatuatda samba ka sangamberi ban kudduat pasibuluatda

² sibailiu repdemen ka sia! Sangamberi kudduat pasibuluatda samba sangamberi arigit buluatda kerenangan ai ka bebet loina simalibbut ka uddut leleu simabuak,

³ iate paleleuleleu ka simatangeu. – Pukayoatmui samba senenganta bibiletmui simakeppu saki Kukau le' geti ituraurau sibailiu ukuman ka jomui ka senen kupkumenmui

⁴ Nuobaake bakkat ikemennu siakeKu katubum, samba Kubailiuake geti ekeu pagugulet saggaknu ka kupkumen laggai sitaiagaietnu, aipoi goluKu kele obengan sipujujulu geti teteret buruburu.”

⁵ Kasenen le' ngangan Tuhan: Tutelei sirimanua siatciake sirimanua siatciake puroronnia sarania, samba paatuatnia tuareu kai Tuhan!

⁶ Makere le' geti nia kele siureman siputututu' ka su'su simase'se', ta'iagai geti ioi puerukat; mukuddu le' geti nia ka polak simakakasak ka simatangeu, ka laggai su'su simakalo sita'anai sikudduijinia.

⁷ Tusukatnake le' sirimanua sikaroni si Tuhan, sipukakaronan kai Tuhan!

⁸ Makere le' geti nia kele loina siurep ka bebet tikra oinan, sangamberi ungatnia mulalak ka bebet tikrat bagat oinan, samba ta'iagai ioi oloi rakat sulu, buluknia mariuriu le' ipulimun, sitaimakarat baga kabagat rurat legeu, samba taipuaari ibelaake buania.

⁹ Makope le' tajunia paatuat, bele pei le taju ka sangamberinia, paatuatnia aibauliuan bukku: kasei pa' moi masiagainia?

¹⁰ Aku, Tuhan, sipasikikinere paatuat, sipasisisibo ketsat, addeat masisisliake katubut senen sirimanua siripokat puparoboanannia' siripokat buat galaitubunia.”

¹¹ Kele gou'gou' leleu sikepkemi ta'kepkemiennia, kisedda sirimanua sigaigai pukayoat ka sitaimaroipo, kailet talaga rurania geti pepe le' sangamberinia, samba ka kalepakat rurania maagainangan sirimanua simakela paatuat le' nia.

¹² Kudduat pulatsanan, malina le' baranangan ka siboiki, kudduat uma sipunenanta!

¹³ Ale karonan bagat Israel, Tuhan, sangamberi sirimanua sikaddiuake Ekeu geti ibailiu le' maaila; sangamberi sirimanua situsosoip baratda katubuM tutataake le' geti ka laggai, aipoi arakaddiuakeaan bubuakat purimanuaiat, iate Tuhan.

¹⁴ Aleake le' aku, ale Tuhan, iageti malekungan aku; arauake le' aku, iageti maaraukungan, aipoi Ekeu le kuumunake!

¹⁵ Bulatnia te' rakua katubuku: “Kaipangan tiboiet Tuhan nenda” Eddangannia isege'!”

¹⁶ Tapoi ta'akubesiake katubuM bule Nubaraake pugejaat baga, ta'akukiddi gogoi pasisiboat! Ekeu le' sigainia aponia sibebela ka biboku, sangamberinia matoila' le' ka mataM.

¹⁷ Bui ibailiu Ekeu kalotoakenenku, Ekeu le sisakkeri aku ka gogoi pugejaat baga.

¹⁸ Eddangania sangamberi sirimanua sikukrua aku bailiu maaila, tapoi buian aku nene ibailiu maaila; eddangania ratuge'ge', tapoi buian aku tuge'ge'! Galai le' gogo pugejaat baga iorak sia, samba subuaake le sia pat sapru.

Gogoi Sabat bui' ta'tusipunenanake

¹⁹ Kasene le' ngangan Tuhan katubukku, “Kenan le' samba purio le' ka matat baliu gugurukat Togat Taikauma, enungienda rabela samba ratuguru tai rimata Jehuda, samba kasangamberi matat baliu gugurukat ka Jerusalem;

²⁰ kua le' katubutda: Arepikam ngangan Tuhan, ale tai rimata Jehuda, ale tai Jehuda samba sangamberi sipulalaggai ka Jerusalem situguguru ka sangamberi matat baliu nene!

²¹ Kasene le' ngangan Tuhan: “Pasikeli le' ka engam! Ba' pasiambit bibilet ka gogoi Sabat samba masiambitnia tuguru ka sangamberi matat baliu gugurukat Jerusalem!

²² Bui ambit bibilet ka lalepnu bela ka gogoi Sabat samba ba' gagalaiake sara galaiakenen, tapoi puneni le gogoi sabat kele siparentaakenenKu ka taikebbukatmui.

²³ Tapoi ta'raoba masiarepi samba masilelekake, makela' le' paatuatda, bailiu ta'raoba masiarepi samba masisilo patekakat.

²⁴ Ke'bai bulatnia nuoba kam masiarepi Aku, kise le ngangan Tuhan, samba ta' tuambit bibilet tuguru ka matat baliu sangamberi gugurukat laggai nene ka gogoi Sabat, tapoi masupuneni gogoi Sabat le' samba ta'tugagalaiake galaiakenen ka gogoi nenda,

²⁵ iageti ka matat baliu gugurukat laggai nene tuguguru geti sipumumungkuat tai rimata samba sangamberi sikebbukat laggaira, sikukuddu geti ka kudduat purimataat David, pasamba mukereta samba mukuro': sia samba sikebbukat laggaira, tai Jehuda samba sipulalaggai ka Jerusalem. Samba laggai nene geti rakuddiji le' sirimanua teret buruburu.

²⁶ Momoi geti sirimanua sibara ka sangamberi laggai Jehuda, samba sibara kasangamberi kudduat ka bebet Jerusalem, sibara ka polak Benjamin, samba sibara ka Sangalio Tinambu, sibara ka paleleuleu samba sibara ka polak Negep, pasamba masiambit buluakenen laboket, buluakenen ja'jaket, buluakenen sitotoiakenen samba kemeyan, masiambit buluakenen pusurakat kabagat uman Tuhan.

²⁷ Tapoi ke'bai ta'nuarepi kam surukatKu addeat masipuneni gogoi Sabat samba ta' tuguguru' masiambit bibilet masienungi matat baliu gugurukat Jerusalem ka gogoi Sabat, iageti sangamberi matat baliu gugurukatnia Kuobekake le' geti obengan sipasilabo isapru geti sangamberi uma purimataat ka Jerusalem, samba sitaioi geti tupeake'.”