Jer. 16 - BUKO SIPUNENAN

Ukuman Taikamanua ka bangsa nenda

¹ Panibonangan si Tuhan katubukku, ngangania:

² “Bui nusinanalep samba bui' ibara tatoga simanteu samba tatoga sinanalep ka kudduat nene.

³ Aipoi kasene le' ngangan Tuhan pagalaiat tatoga simanteu samba tatoga sinanalep sipututu'tu' mata ka kudduat nene, pagalaiat sainanda situtu'tuake matatda samba pagalaiat saukkuira siputatogasia ka laggai nene:

⁴ Matei le' geti sia kalulut sangamberi besi sibaraake kamamatei; sia geti ta'tusosoibi samba ta' turarateiake; ibailiu le' geti sia pasiramo ka mone'; sapru le' geti sia kalulut lanjau samba pulajeat; tubutda simamatei geti ibailiu le' komen sangamberi uma' ka tei manua samba sangamberi tarimeu ka polak.

⁵ Bulatnia, kasene le' ngangan Tuhan: Ba' tuguguru' ka lalep purereureubaga, samba ba' ei mugeri samba ba' purereurau baga pasamba sia, aipoi Akutiktikan aban sikauKu ka bangsa nene, kise te' ngangan Tuhan, samba leu pununtuat baga samba pukatekat bagaKu.

⁶ Sirimanua sabeu ele sigoiso mamatei le' geti ka laggai nene; ta'turarateiake sia, samba ta'anai sirimanua geti sisoibi sia; ta'anai geti sirimanua siorei tubuna samba sipasiguguluk ute' kalulut sia.

⁷ Ta'anai sirimanua sipaabbo roti ka sirimanua sipurereureu baga addeat masipusuibinia kalulut ka mamatai nenda. Beri sara sirimanua sipasikakau lo'nia sibara kapulokat pusuibiat kalulut ka mamatei ukkui ele inania.

⁸ Bui' nutuguru ka lalepda sirimanua sipupupunen addeat mukuddu, mukom samba mulo pasamba sia.

⁹ Aipoi kasene le' ngangan Tuhan Sebaot, Taikamanuan Israel: Bulatnia te', ka kudduat nene, ka matamui samba kateteremui, Kuaariake' le geti nganga gorat baga samba puangkakat baga, ngangan talimouakenen simateu samba sinanalep.

¹⁰ Ke'bai nusegeake sangamberi tiboiet nenda katubut bangsa nene samba kuarangan katubum: Angoi iloto' kai si Tuhan pasamba sangamberi pugejaat baga nene “Apoinia puseleatmai samba aponia jo sigalaiamai katubut Tuhan, Taikamanuamai?

¹¹ Iageti kuanungan katubutda: Kalulut taikebbuakatmui arakaddiuakean Aku, kise le' ngangan Tuhan samba kalulut aratutnan taikamanua bagei, addeat mupagugulet samba panindou katubunia. Rakaddiake le' Aku samba ta'an araukkake surukatKu.

¹² Samba nugalaiake kam simakope katai bele pei taikebbukatmui. Itco, sene-senemui masitutake pukelakat paatuatmui sikatai bele pei le masiarepi Aku.

¹³ Oto Kuriribbaiake' le' geti kam baramui ka laggai nene ka laggai taiagaietmui ele taikebbukatmui. Sedda le' geti nupanindou kam katubut taikamanua bagei sinago samba sinoibi, kalulut ta'an geti Kupukakateki baga kam minca.

¹⁴ Kalulut nenda, kasenen le' ngangan Tuhan, “Bulatnia te', babara geti teterenia, ta'an rakukua minca sirimanua: Ka onin Tuhan sipuririmanua, sipalului tai Israel bela ka laggai Misir!,

¹⁵ tapoi: Katubut Tuhan sipuririrmanua, sipalulu tai Israel bela ka laggai ka bare' samba sibara kasangamberi laggai kaipa aipasabu sia! Kalulut Kuambit geti sia minca toili ka laggai sikauKu ka taikebbukatda.

¹⁶ Bulatnia te' Kuoba le' masikoiniake migi sipasigagaba iba, kise te' ngangan Tuhan, sipasilalaba sia, lepa nenda Kuoba masikoiniake migi sipangungungkru masikukru sia ka senen leleu samba uddut sangamberi leleu, samba ka sangamberi polou leleu bukku.

¹⁷ Aipoi Kulelekake le' senen bakkou rereda; sangamberinia nenda ta'anai malipput kaKu, samba puseleatda leu atusakkeri ka mataKu.

¹⁸ Kululumunake le' geti Jo samba puseleatda ruang minca rua, kalulut arapalolitnan laggaiKu pasamba tubut simamatei sabulunganda kasitsitakenen samba arasunakean polak bakkatKu pasamba galai tubutda sikatai.”

¹⁹ Ale Tuhan, puronanku samba iripku, kudduat katuituiatku ka gogoi pusaggoat! KatubuM le' geti raoi sangamberi bangsa sibara katutut polak masikua: “Bulatnia, taikebbukatmai sarat masibakkati sabulungan sipatataju sabulungan siboboi berisara ta'anai paluluatnia.

²⁰ Momoi leu pa' igalai taikamanuania sirimanua? Sigalainia nenda ta' taikamanua.”

²¹ Kalulut nenda, agai le', Kuoba le' masipaagai katubutda, sangaminca nene Kupaagai le' katubutda gegeKu samba ronKu, bule raagai, oningKu iate Tuhan.”