Jer. 15 - BUKO SIPUNENAN

¹ Kuanangan si Tuhan katubukku: “Kenanen bai murio si Mose samba si Samuel ka mataKu, paatuatKu geti taiolei ka bangsa nene. Tuituiake' le' sia ka mataKu, eddangania raei!

² Dan ke'rarereake katubum: Kaipa kueikai?, iageti aleginungan sia: Kasenen le' ngangan Tuhan: Si ei ka kamateiat, ka kamateiat le'! Si ei ka lanjau, ka lanjau le'! Si ei ka pulajeat, ka pulajeat le'! samba si ei kakabekat, ka kakabekat le'!

³ Kubabaraake le' geti epat ukuman ka sia, Kise le' ngangan Tuhan: lanjau iate pamatei, sangamberi jo'jo iate masipagirit, sangamberi uma' katei manua samba sangamberi tarimeu ka polak iate masikom samba masisapruake.

⁴ Kasenen te' Kugalai sia ibailiu pulotokat kasangamberi purimataat ka polak, kalulut sangamberi aponia sigalaiakenen Manasye togat Hizkia, rimata Jehuda, ka Jerusalem.

Pulotokat kalulut pasaggangan

⁵ Kasei pa' sipununtuki ekeu baga, ale Jerusalem, samba kasei pa' sioba' mureureu baga pasamba ekeu? Kasei pa' sioba tusappai addeat masiparereake pagalaiat puroron tubum?

⁶ Ekeu le' amasikeraake Aku, kise le ngangan Tuhan, ameian ekeu nukaddiuake Aku. Iageti Kutotoiake' le' kabaiKu samba masimateiake ekeu; amagelangan Aku masiopmake golu.

⁷ Kuso'so'ake le' sia pasamba soso'so ka laggai sabau; Kugalai le' paamianKu imapepe togania samba Kusubuake sia kalulut ta'atoili sia rasili puparaboananda.

⁸ Sangamberi silumang ka talagatda Kugalai le' bulat ramaigi bele pei ngai koat. Kubabaraake le' ka saina samba ka sibau tubu sara sipamamatei kateteret sinago'. Sinulut Kubeleake le' ka sia pukaranan baga samba katuge'ge'kat.

⁹ Iageti mangorik le' sinanalep sipususuruket pitungaminca engania soak, ka sia sulu abelan le' kenanen matago pei le', ibailiu le' imaila samba tupakaila. Sia sipulelegei Kukau le' sia ka lanjau ka matatda tai saggakda, kise te' ngangan Tuhan.”

Soubagat Jeremia

¹⁰ Paan te' kaku, ale inangku, situ'tu'ake mataku, sara sirimanua sibailiu paukelat, samba pagolukat ka sangamberi laggai. Aku ta' sirimanua sipasiutakake ele sirimanua sipuutak katubut kasei pa', tapoi sia sangamberitda masipaloloi aku.

¹¹ Bulatnia, ale Tuhan, akupasikelingan Ekeu simakolou, samba ta'akuromake saggak ka mataM kateteret iorak sia pasisiboat samba pangoringan!

¹² Momoi leu pa' rabakbakake laba sirimanua, laba' sibara ka bare samba tembaga.

¹³ “Pukayoatnu samba sangamberi pubulagananu Kukau le' geti ituraurau sibailiu ukuman ka sangamberi jom ka sangamberi kupkumen laggainu.

¹⁴ Kubailiuake' le' geti ekeu pakoiniet saggaknu ka kupkumen laggai taiaagaietnu, aipoi ka goluKu amujulungan obengan sitaipepe katubum.”

¹⁵ Nuagaian le'; ale Tuhan, repdep le' samba lelekake' le' aku, galai le' lumun ka sangamberi sirimanua sikukru aku. Ba' obaake raala aku, kalulut ombagaM, agai le' kipa ioi kubairat paloloi kalulut Ekeu!

¹⁶ Ke' bai paaili aku ka sangamberi tiboietNu, iageti kunanam le': TiboietNu nenda ibailiu le' siangkaake bagakku, samba ibailiu le' obakat paatuatku, kalulut oniM atusogaakean kaku, ale Tuhan Taikamanua sebaot.

¹⁷ Ta'amukudduaku muoba' tubu ka paruru'ru sangamberi sirimanua sipaukelet nganga; Kalulut neneinei kabeiNu pukuddukungan, aipoi Nusunake le' aku ka golu.

¹⁸ Angoi pa' ta' ipuaari pangoringanku, samba mauju'ku makokope le' samba ta'iagai tualeake? Bulatnia, Ekeu kele bagat oinan simatajuat le' kaku, oinan sitaioi tukatonemi.

¹⁹ Kalulut nenda kasene le' alegiat Tuhan: “Ke'bai nuoba toili, Kutoiliake le' geti ekeu, bailiu pagugulet kamataKu, samba ke'bai nutiboake aponia sibara paluluat samba ta' tiboiet siboboi, iageti bailiunangan ekeu situppai titiboatKu. Kenanen bai toili sia minca katubum, tapoi ta'an leu tototili ekeu katubutda.

²⁰ Katubut bangsa nene Kubailiuake' le' geti ekeu, sibailiu kele irip laggai sibara tembaga; rasaggangi le geti ekeu, tapoi ta'momoi rakalaake ekeu, aipoi Kupaalei le' ekeu addeat masipaarau samba masibelaake ekeu, kise te' ngangan Tuhan.

²¹ Kubelaake le' geti ekeu ka kabei sangamberi sirimanua sikatai samba siobaake ekeu ka rarakkutda sangamberi sirimanua simakatai golu.”