Jer. 14 - BUKO SIPUNENAN

Pagalaiat teteret legeu

¹ Tiboiet Tuhan siooi katubut Jeremia pagalaiat teteret legeu.

² Jehuda mureureu baga, sangamberi mata baliu gugurukatnia bukkat samba ka sou baga turapdapnangan ka polak; gerei Jerusalem sakai ka pata.

³ Sangamberida siabeu tiboi tubunia masikoiniake sapakoinienda masigaba oinan; sege sia ka sangamberi uggungan, tapoi ta'arasese oinan, bailiu toili sia sarat tappatat sita'kabaga le'. Maaila le' sia, pumataatda ibailiu mabonan, pat tabborangan ute'ra.

⁴ Galaiakenen ka mone amuaringan, kalulut taibebelet urat ka laggai, iageti sipumomone mabelenangan bagatda samba tabborangan ute'ra.

⁵ Beringan simatsura sinanalep ka su'su, kaddiuakenangan togania sibau mutu'tu'mata, aipoi ta'anai parou siputututu' sibau.

⁶ Murio sangamberi kaliddei leleu ka uddut leleu simagarak, ipaengai le' nia kele lamusek, matania ibailiu le masulei, kalulut tatat parou.

⁷ “Kenanen bai sangamberi puseleatmai masimuneng masisaggangi kai, ropmake le' kai, ale Tuhan, kalulut oniM! Aipoi maigi akutuareukai amajongankai katubuM.

⁸ Ale Karonien Israel, Sipasiroromnia keteteret puokkiman! Angoi kele sirimanua sioiake le' Ekeu ka laggaimai nene, kele sirimanua sipueppak sipugogoi sangasoibo lepe tuitui?

⁹ Angoi kele simaingo le' Ekeu, kele pahlawan sitaiom parop? Tapoi ai Ekeu katalagamai, ale Tuhan, samba oniM tusogaake ka tubumai; ba' kaddiuake kai!”

¹⁰ Kasene le' tiboiet Tuhan pagalaiat bangsa nene: Maangka bagatda muteba' samba ta'raomake reretda. Kalulut nenda ta' ioba sia si Tuhan; tapoi kineiget Ioba le' iparepdep puseleatda samba masiukum jotda.”

¹¹ Kuanangan si Tuhan katubukku: “Bui'an nupanindou pueerut bangsa nene!

¹² Kenanen bai ai sia mupuaso, ta'Kuaarepi geti rapusoga; kenanen bai rapangunguruatnake buluakenen silabo samba buluakenen sitotoiakenen, ta'mamakikiliu bagaKu geti ka tubutda, tapoi Kusubuake le' geti sia pasamba lanjau, pulajeat samba besi sipamamatei.”

¹³ Lepa kuakungan: “Ale, Tuhan Taikamanua! Ta' pa' arakuangan tai nabi ka tubutda: Ta'an nuenungikam geti pasaggangan, samba pulajea ta'aan ioorakkam, tapoi Kuake le' geti katubumui aban simariuriu ka kudduat nene!”

¹⁴ Alegiat Tuhan katubukku: “Tai Nabi nenda mupoilianan sipatataju ka oningKu! Ta' Akukoiniake sia, ta' Akuuparentaake sia samba ta' manibo Aku katubudra. Rapoiliat le' katubum itcot mata paboboko, patuptupman siboboi samba patajuat sipabaratda saratda.

¹⁵ Kalulut nenda kasenen le' ngangan Tuhan pagalaiat tai nabi sipamomoiliat ka oningKu, tapoi ta' Akukoiniake sia, samba masikua: Pasaggangan samba pulajeat ta' iorak laggai nene –: Tai nabi nenda geti matei sapru le' kalulut pasaggangan samba pulajeat!

¹⁶ Samba bangsa kudduatda rapamoiliat nenda tuparibbai le' geti sia ka sangamberi enungan Jerusalem, kalulut pulajeat samba pasaggangan, samba ta'anai sirimanua sirateiake sia: sia saratda le', tainanalepda, tatogatda taimanteu samba tainanalep. Kise te' Kupiliake pukakataira ka tubutda.”

¹⁷ Kua le' tiboiet nene katubutda: Muguruk le' eluku, sinago samba sinoibo sitaipuaari, aipoi toga sinanalep, okkot bangsaku tumaujuki mauju' simakope, mauju' sitaioi tualeake'.

¹⁸ Ke'bai belaaku ka su'su', sedda ai sirimanua simateiakenen lanjau! Ke'bai tuguruaku kabagat laggai, sedda ai sirimanua simabesi pulalalaje'! Nabi samba imam masigejengi laggai taiaagaietda.”

¹⁹ Anukeraakean pa' Jehuda? Amasitsinan pa' Ekau ka Sion? Angoi Nulippat kai makope ron, pat taibaranangan katualeat ka kai? Kukaroni le' kai aban, tapoi ta'amoi sara simaeru; masikaroni tetere katualeat, tapoi ai sarat polotokat le!

²⁰ Ale Tuhan, kuagaikai pukakataimai samba puseletda taikebbukatmai; bulatnia, amajongan kai katubuM.

²¹ Buian Nukeraake kai, kalulut oniM, samba buian Nupaloloi kudduat pulatsananNu! Repdep le' palelenganNu pasamba kai, buian Nulepaakenia!

²² Ai leu pa' sioi masibeleake' urat katalagat taikakamanua siboboi bangsa nenda? Ele' momoi pa' manua masiake' urat simatirit? Ta' pa' sarat Ekeu le', ale Tuhan Taikamanuamai, karonanmai, sigalai sangamberinia nenda?