Jer. 13 - BUKO SIPUNENAN

Akkik tenga ibailiu mamumu'

¹ Kasene le' ngangan Tuhan katubukku: “Kenan le' masisaki akkik tenga sibara ka komak juto, kabeake le' nenda ka tengam, tapoi ta'momoi nusopmakenia ka bagat oinan!”

² Iageti sakikungan akkik tenga kele sikuat Tuhan, lepa kabeakekungannia ka tengangku.

³ Lepa nenda panibonangan si Tuhan katubukku sikarua mincania, ngangania:

⁴ “Ala' le' akkik tenga sinakim samba kineiget katengam nenda! Kenan le' simaola ka bagat oinan Efrat masilipputnake sedda ka paoggangan leleu bukku!”

⁵ Iageti ei aku, lepa lipputanakekungannia ka bebet bagat oinan Efrat kele siparentaakeken Tuhan katubukku.

⁶ Lepa pigapa' ujunia, panibonangan si Tuhan katubukku: “Kenen simaruei ka bagat oinan Efrat masiala sedda akkik tenga sikoiniakenenKu nulipputake sedda!”

⁷ Iageti ei aku ka bagat oinan Efrat, lepa gaigaikungannia samba alakungan akkik tenga nenda ka kudduat akulipputnakenia, tapoi akkik tenga nenda amamu'mu'an, ta'ananai kautania aponia pa'.

⁸ Lepa oi tiboiet Tuhan katubukku:

⁹ “Kasene le' ngangan Tuhan: Kisene te' geti Kuposaake pubuangan paatuat Jehuda samba Jerusalem.

¹⁰ Bangsa sikakatai nene, sitaioba masiarepi sangamberi tiboietKu, sioba masitut kelat paatuatnia samba masitut taikamanua bagei addean masipuneni samba manindou ka tubutda, ibailiu le' geti kele akkik tenga nene ta'anai kautania aponia pa'.

¹¹ Kalulut kele akkik tenga ituettet ka tengan sara sirimanua, kise te' sangamberi suku Israel samba sangamberi suku Jehuda Kuottotake ka tubuKu, kise te' ngangan Tuhan, bule sia nenda ibailiu paamian, onien, umunen samba abeuakenen kaKu. Tapoi sia nenda ta'raoba masiarepi.”

Tappaian anggur simararagat

¹² “Kua le' katubutda tiboiet nene: Kasenen le ngangan Tuhan Taikamanua Israel: Senen tappaiat anggur bui tatusunake pasamba anggur! Samba ke' rakua katubum: Kipangan le' takuagai simakolou, senen tappaiat bui tatusunake pasamba anggur”,

¹³ oto kua le' katubutda: Kasene le ngangan Tuhan: Bulatnia te' sangamberi sikukuddu ka laggai nene, Kususunanke geti pupupuineng: tai rimata sikukuddu kapurimataa David, tai imam, tai nabi samba sangamberi sipulalaggai ka Jerusalem.

¹⁴ Lepa Kupalulukluk le' geti sia senenda, pat katai, saukkui pasamba tatogania, kise te' ngangan Tuhan. Kususubuake le' geti sia ka tatat katet baga, tatat nunutut baga samba taiappeakenen.”

Paasekat samba palotokat

¹⁵ Arepake, tongiake piunu, bui' imabuak paatuatmui, aipoi amanibongan si Tuhan.

¹⁶ Latsatake le' si Tuhan Taikamanuam, kepei Igalaiake gogoi pugepgeman, kepei tusoksok rerem ka uddut sangamberi leleu sisaluki soibo, kele airangengena, toro tapoi Ibailiu le' mainep samba silinangannia bailiu magepgep.

¹⁷ Ke' ta'nuoba masiarepinia musou le' geti aku kakudduat simalipput kalulut pubuangan paatuatnu, mugorok samba mubaibai le' geti elukku, kalulut mungkuat biribiri Tuhan tuambit sibailiu lulupakenen.

¹⁸ Kua le' katubut rimata samba ka tubut inan rimata: “Puuddet le' kakudduat simakope repe', aipoi kirit pulatsananmui atugorosotnan barania ka ute'mui!”

¹⁹ Sangamberi laggai polak Negep atupatpatnakean matatbaliunia, samba berisara sirimanua sipasububuka. Sangamberi tai Jehuda atuambitnan sia ka pasiribbaiat, tuambit ka bagat pasiribbaiat sangamberitda.

²⁰ Paingo le' matam, ale Jerusalem, samba itco le', ai sia sirimanua siooi sibara ka bare'! Kaipangannia mungkuat tarimeu siake katubum, kambing biribiri sibailiu pubebeunannu?

²¹ Aponia le' kuanennu, ke'bai tuakkatake sibailiu utenu sangamberi sirimanua nubailiuake sia umunakenen? Ta'pa' pubesikat le' geti masikupkupmake ekeu kele pagalaiat sara sinanalep sipususule'?

²² Samba ke'bai nuparere' kapatuatnu, “Angoi sangamberinia nene iorak aku?” Kalulut iginia puseleatnu le' iageti tungangaake le' buttet komaknu samba tuelet le' ekeu!

²³ Moi leu pa' rasili kulitda tai Etiopia, ele harimau simagurik isili guriknia? Kipangan pa' momoi nugalaikam simaeru, ale sangamberi sirimanua simaubui tubu mugalai sikatai?

²⁴ Kupasabu le' geti kam kele pagat bera' iboroiakenia rusa sibara simatangeu.

²⁵ Nenda te' enungan puririmanum, rubeiatnu sikireKu addeatnu, kise te' ngangan Tuhan, kalulut anukalipogingan Aku, samba anukatonemingan sipatataju.

²⁶ Aku leuet masibukkaiake geti puttet komaknu pat aili ka matam, bailiu matoilangan keikeietnu.

²⁷ Akuitcoan paelenannu samba katsim puoloman tubum kasitsitakenen, ka uddut sangamberi leleu samba ka sangamberi su'su', Akuitcoan paraboatnu bulat sikatai nenda. Paan te' kekeu, ale Jerusalem, pigangan le' ujunia pat bailiu numalina?