Jer. 12 - BUKO SIPUNENAN

Ngungut Jeremia samba alegiat Taikamanua

¹ Kerenangan sineseat le' Ekeu, ale Tuhan, ke' kipa bai kupaukleake Ekeu! Tapoi kuoba' le' patibo pasamba Ekeu pagalaiat puroipoat: Angoi sangamberi sirimanua sikatai maeru puririmanuan, makolou puririmanuan sangamberi sitaimatopit?

² Nubailiuake le' sia mutu'tu, samba sia leuet muungat, mutu'tu le sia simakolou samba mubua leuet. Kerenangan mariuriu le' ai le Ekeu ka ngungunda, tapoi mareunan sibara ka paatuatda.

³ Ale Tuhan, Nuagai le' aku, Nuitco le' aku, samba Nusibo le' kipa paatuatku ka tubuM. Girit le' sia rabela kele sabiribiri ja'jaket, samba kokoiake le' sia ka gogoi pasija'jakat. –

⁴ Pigangan le' ujunia imagarak laggai nene, samba imalaju se'senia ka sangamberi su'su'? Kalulut pukakatai sikudduijinia, sangamberi tarimeu samba sangamberi uma' tata, aipoi arapaatungan le': Ta'iitco galai tubutta!”

⁵ “Ke' apabalauan ekeu pasamba sirimanua sipuenung rere samba atusaggoijingan ekeu, kipa iooi nupatakai ka kuro? Samba ke' ka laggai simaaban ta' masasanang ekeu, aponia le' nugalai geti ka bakkat se'se' kabagat oinan Jordan?

⁶ Aipoi sangamberi sasainam samba muntogatnu, sia leuet masigalai masipajo ekeu; sia leuet simakere kateiteinu. Ba' kakatonemi sia, kenanen bai tiboietda mananam katubum.

⁷ Akukaddiuakeaan kudduatKu, aturibbaiakeaan laggai sibailiu bakkatKu; Aku kauan simakiliu bagaKu, kakabei saggaknia.

⁸ Laggai bakkatKu aibailiuan kele singa ka bakkat se'se kaKu murou' le' nia simakope itakai iasoli Aku, lulunia Kupulagakinia baga.

⁹ LaggaiKu aibailiuan kele uma' kaKu sangamberi uma' simasakbak masipurutnia. Kauan, rurake le' sangamberi tarimeu ka su'su, ambit le' addeat masisapruakenia!

¹⁰ Maigi le' sipasijago amasipakai monen anggurKu, masipaperaki sangamberi polakKu, samba ragalai le' polak simakiliu bagaKu bailiu su'su simatangeu.

¹¹ Bulatnia, arabailiuakeannia simatangeu, matangeu le' polak nenda mureureubaga kamataKu! Matangeu le' kineiget sangamberi laggai nenda, tapoi ta'anai sirimanua sipuletseinia.

¹² Amoian sipakatainia masigejengi sangamberi leleu simagarak ka simatangeu; aipoi lanjau Tuhan mugolu masikom barania katutut laggai sara ka tutut laggai bagei; ta'anai aban kasangamberi sipuririmanua.

¹³ Arakarapakean gandum, tapoi aramonei iate rui le'; amabesian tubutda, tapoi besit tubutda ta'anai lulunia; maaila le' sia kalulut buat sigalaira, kalulut golut Tuhan sipujujulu.”

¹⁴ Kasene le' ngangan Tuhan: “Pagalaiat sangamberi pabebeakenenKu sikatai sipakatai laggai sikauKu sibailiu bakkat ikepakenen paamianKu Israel. Kububurau le geti sia ka polakda samba Kububurau le' muntogat Jehuda ka talagatda.

¹⁵ Tapoi lepat Kuburau sia, iageti Kupununtuki baga le' geti sia minca. Kutotiliake le' geti sia senenda ka laggainia.

¹⁶ Samba ke'bai bulat sibulatnia ragelai enungan puririmanuan paamianKu bailiu pusupparangan ka oningKu, ‘Kai Tuhan sipuririmanua,’ kele siboiki ragelaiake paamianKu musuppa kai Baal, Iageti sia leu turioake ka talagat paamianKu.

¹⁷ Tapoi ke'taraoba masiarepake, oto bulat Kububurauan le' geti sia samba masimateiake bangsa kele kisedda, kise te nganang Tuhan.”