Jer. 10 - BUKO SIPUNENAN

Taikamanua sipuririmanua samba sabulungan

¹ Arepake le' tiboiet sinegeakenen Tuhan katubumui, ale muntogat Israel

² Kise' le ngangan Tuhan: Ba' ubui tubum kele muparaboat sangamberi bangsa, ba' maloloto ka sangamberi toggaiat ka manua, kenanen bai sangamberi bangsa maloto katubunia.

³ Aipoi kailaakenenda sangamberi bangsa iate pusiboboi. Ta'pa' sabulungan nenda loina sitaddetra sirimanua sibara kabakkat se'se, sigalai kabei siagai mugalai masipae loina?

⁴ Rapalaingenia sirimanua pasamba mas samba perak; Raparonnia sirimanua pasamba pamanta samba panoko, bule bui imagulu.

⁵ Sabulungan nenda makere le' kele tubut sirimanua ka mone attimun, ta'momoi ipanibo, bui ta'raakkatnakenia sirimanua, aipoi ta'momoi ipubakkou. Ba' maloloto katubunia, aipoi sabulungan nenda ta'momoi igalai sikatai, masigalai simaeru leu ta'momoi.”

⁶ Ta'anai simakere kele Ekeu, ale Tuhan! Ekeu sita'puteterat, Mabeu Ekeu samba oniM mabau kalulut gegem.

⁷ Kasei pa' ta'maloto katubuM, ale Rimata sangamberi bangsa? Bulatnia, katubuM le' siripokatnia paraboat kele nene: Kalulut katalagat sangamberi sirimanua simaagai katalagat tai bangsa samba katalagat tai rimatada, ta'anai simakere kele Ekeu!

⁸ Sangamberinia sabulungan nenda sitaiagai paatuat samba sitaimaagai le'; enungan sibara ka taikamanua nenda siboboi le' kalulut nia sarat loina le. –

⁹ Perak tuambit sibara ka Tersis, samba mas sibara Ufas; sabulungan nenda sigalai kabei sirimanua samba sigalai kebei mugailai mas. Bibiletnia sibara ka komak sima surou samba simasuat laiket, sangamberinia sigalai sirimanua siagai mugalai komak. –

¹⁰ Tapoi si Tuhan iate Taikamanua sineseat, Nia le' Taikamanua si puririmanua samba Rimata siataitatata'. Ngeungeu polak kalulut goluNia, samba sangamberi bangsa geti ta'raom goluNia.

¹¹ Kasenen le' nukukua kam katubutda: taikamanua sitaigalai manua samba polak tutataake geti ka polak samba kapolou manua nene.”

¹² Tuhan le' sipasigagalai polak ka gegeNia, sipasiririo polak ka agai paatuatNia, samba sipasinganganang manua ka agai paatuatNia.

¹³ Ke' bai Ipaarep ngangaNia, pugongnangan nau oinan ka manua, Isakaiake le' tanai rusa barania ka tutut polak, Igalai le' bila' pasamba urat, samba belaakenangan rusa sibara kakudduat pangoirikatNia.

¹⁴ Senen sirimanua sitaiagai paatuat, sitaanai puaagai' samba senen siagai mugalai mas ibailiu maila, kalulut tularat sigalainia. Aipoi tularat siuruakenennia nenda iate patajuat le' ta'anai enga katubunia,

¹⁵ Sangamberinia iate siboboi, galaiet sibailiu gegeiet le', samba mamatei geti kateteret tuukum.

¹⁶ Ta'kele kasedda Nia ibailiu rubeiat Jakob, aipoiNia le' sigalai sangamberinia, samba Israel iate suku bakkatNia; oniNia iate Tuhan sebaot!

Jehuda ibailiu matangeu

¹⁷ Ambit le' sangamberi bibiletnu sibara ka laggai nene, ale sangamberi sirimanua sikuddu kabagat ka bagat tubobokko!

¹⁸ Aipoi kasene le' ngangan Tuhan: “Bulatnia te', sangaminca nene Kuriribbaiake le' geti sipulaggai ka laggai nene, samba Kuokkip le' geti sia, bule raagaiakenia.” –

¹⁹ Paan te' kaku kalulut oringenku, maujuku ta'mamale! Kupaatu: “Oh, nene te' sara simakope besi bui ta'kubairat!”

²⁰ Sapouku amakataian, samba sangamberi seserenia atakkian. Tatogaku amutuituian ka tubuku, ta'ananai: ta'ananai sipasiririoake sopouku samba sipasinganganangake tabboku. –

²¹ Bulatnia, sangamberi sipasijago aibailiuan asitaimagai. Ta'ara tiddou enungan kai Tuhan. Kalulut nenda ta'amaangka bagatda samba sangamberi tarimeu jagoetda musabu le'.

²² Maarep le' sara katuareman, ngangania: Babara te' geti pulamaugat sabeu sibara ka polak ka isit ka bare', addeat masibailiuake sangamberi laggai Jehuda ibailiu matangeu, ibailiu le' kudduat pulippunan sangamberi jo'jot leleu.

²³ Kuagai le', ale Tuhan, sirimanua ta'anai gege masiteuake enungannia samba sirimanua sipuenung ta'anai gege masitoiliake bakkounia.

²⁴ Liso le' aku ale Tuhan, tapoi ka simaroipo. Bui ka guluNu, bule bui Numateiake aku!

²⁵ Uruake le' oloi guluNu ka tubut sangamberi bangsa sitaiagai Ekeu, ka tubut sangamberi muntogat sitasogaiake oniM: Aipoi arakomman si Jakob samba arasapruakeannia, samba pukudduanannia aibailiaun siragatat.