Jer. 1 - BUKO SIPUNENAN

¹ Nene le' tiboiet Jeremia togat Hilkia, sibara kamuntogat imam sibara ka laggai Anatot ka kupkumen Benjamin.

² Ka siburu teterenia Josia togat Amon rimata Jehuda, kabagat rura sikapulu telu barania kapuparentaatnia oi tiboiet Tuhan kai Jeremia.

³ Oi leu et tiboiet nenda kateterenia si Joyakim togat Josia, rimata Jehuda teret pangampulat rura sikapulusara kateterenia si Zedekia togat Josia, rimata Jehuda, pat ambitrangan sipulaggai ka Jerusalem ka kudduat katurubbaiat ka bagat laggo si kalima.

Tusogai samba tukoinianke si Jeremia

⁴ Oi tiboiet Tuhan kaku, ngangania:

⁵ “Kepei Kugalai ekeu ka suruket inam, Akuagaian ekeu, kepei mutu'tu matam, Aku sausauan samba Aku pusipunenanakeaan eku, Aku uddetnakean ekeu sibailiu nabi ka sangamberi bangsa.”

⁶ Iageti alegikungannia: “Ale Tuhan Taikamanua! Bulatnia ta'maagai aku manibo' aipoi aku nene mabau peile tubukku.”

⁷ Tapoi panibonangan si Tuhan kaku: “Bui nukua: Aku nene mabau peile tubuku, tapoi katubut kasei pa' Kukoiniake ekeu, bui ta mei ekeu, samba kenanen aponia pa' Kuparentaake katubum, bui ta nusegeake.

⁸ Bui numaloto katubutda, aipoi Kupaalei le geti ekeu addeat masibelaake ekeu, kise le' ngangan Tuhan.”

⁹ Lepa totoiakenangan kabeiNia samba rapenangan ngungungku; panibonangan si Tuhan kaku: “Bulatnia, Kugagalakake' sangamberi tiboietKu ka ngungum.

¹⁰ Agai le' ka gogoi nene Kuuddetnake ekeu ka sangamberi bangsa samba sangamberi purimataat addeat masiburau samba masibukkatnake, masipakatai samba masiguiluake, addeat masigalai samba masiurep.”

¹¹ Lepa nenda oi tiboiet Tuhan katubukku, ngangania: “Aponia anuitco, ale Jeremia?” Alegikungan, “Aku itco sangaran loina badam.”

¹² Lepa kuanangan si Tuhan kaku: “Maeru pasiitconu, aipoi matarek Aku masigalaiake tiboietKu.”

¹³ Lepa oi tiboiet Tuhan katubukku sikaruania, ngangania: “Aponia siitconu?” Alegikungan, “Aku itco sara pario aigogokgok; kabaraiatnia ka isit ka bare'.”

¹⁴ Lepa kuanangan si Tuhan kaku: “Barania ka bare mugogolu te' geti pugejaat baga oraknangan sangamberi sipulaggai ka laggai nene.

¹⁵ Aipoi bulatnia te, Kusogai le' sangamberi purimataan ka isit ka bare, kise te' tiboiet Tuhan, momoi te' geti sia samba rioakerangan purimataatda senen senenda ka ngungun sangamberi matatbaliu gugurukat Jerusalem, kalegeret sangamberi iripnia sigoiliknia samba kalegeret sangamberi laggai ka Jehuda.

¹⁶ Kubebeleake le geti ukumKu ka sia, kalulut sangamberi jotda, aipoi arakaddiuakean Aku, ka pasilalabora buluaken katubut taikamanau bagei samba manindou ka sigalai kabeinia.

¹⁷ Tapoi ekeu nene, kau le' numatarek, suru samba segeake' le' katubutda sangamberi siparentaakenenKu katubum. Bui' numaloto katubutda samba bule' bui Kukau ekeu muloto kamatatda.

¹⁸ Pagalaiat Aku, bulatnia ka gogoi nene Kubailiuake le' ekeu laggai simaron, ibailiu arigi laba' samba ibailiu irip tembaga masisaggangi sangamberi laggai nene, masiasoli tai rimata Jehuda samba sikebbukat laggainia, masiasoli tai imamnia samba taikauman laggai nene.

¹⁹ Rasaggangi le' geti ekeu, tapoi ta' te' geti momoi rakalaake ekeu, aipoi Kupaalei le' ekeu addeat masibelaake' ekeu, kise te' tiboiet Tuhan.”