Jehz. 8 - BUKO SIPUNENAN

Bulungan kaksitsitakenen sikuddu ka uman Taikamanua

¹ Ka rura sikaenem, ka laggo sikaenem, ka gogoi sikalima ka laggo nenda, kateteret aiaku mukukuddu ka lalepku sambamai sikebbukat laggai Jehuda, salukinangan aku sedda geget Tuhan Taikamanua,

² samba silokungan pamoilianan: bulatnia, ai amakoinong kele sara sirimanua simanteu, barania ka tengania pat aili ka repe makoinong kele obengan, ka tengania ka pata makoinong kele toro, kele perunggu simakirisau.

³ Totoiakenangan sara kele kabei samba ukkaakenangan alaiku. Lepa akktakenangan aku Ketcat nenda ka paoggangan manua samba polak samba abbitnangan aku ka pamoilianan sipunenan ka Jerusalem kabebet matatbaliu pulaibokat kabaga simatai ka bare, sibara bulungan tutut baga, sibaraake tutut baga nenda.

⁴ Itco, makoinongnangan sedda pulatsanan Taikamanuan Israel, kele pamoilinanan siitcoku ka su'su nenda.

⁵ Kuanangan katubukku: “Ale togat sirimanua, itco ka bare!” Itcokungan ka bare, bulatnia, ka isit bare matatbaliu kudduat pasibuluat, kabebet enungan gugurukat, ai bulungan tutut baga nenda.

⁶ Kuanangan katubukku: “Ale togat sirimanua, anuitcoan leu aponia sigalaiakenenda, galajet kasitsitakenen bulat siabeu, sigalaiakenenda muntogat Israel sene, bailiu areuakekungan tubukKu ka kudduat sipunenanKu? Nuiitco te geti sangamberi sikatai sigalaiakenenda bulat siabeu peile.”

⁷ Samba abbitnangan aku ka matatbaliu pugeratat, itcokungan, bulatnia, ai sara lobok kabagat iripnia.

⁸ Kuanangan katubukku: “Ale togat sirimanua, beuake lobok ka irip nenda!” Lepat akubeuake lobok nenda, itco, ai sara matatbaliu.

⁹ Kuanangan katubukku: “Guruake ekeu samba itco sangamberi kasitsitakenen sikatai sigalaiakenenda sene.”

¹⁰ Lepa tugurukungan samba itcokungan, bulatnia, senengamata tularat tarimeu sipugugurui samba tarimeu bagei kasitsitakenen samba sangamberi tularat bulunganda muntogat Israel ai ka sangaliot rupinia.

¹¹ Samba kamatania murio pitu pulu sia sikebbukatda samuntogat Israel, pasamba si Jaazanya togat Safan katalagatda. Senenda masiukkaake tutungan kumanyang kakabeira, samba singin kujuk kumanyang nenda tusakai kapata.

¹² TiboietNia katubukku: “Nuitco leu, ale togat sirimanua, aponia ragagalai sikebbukat laggai muntogat Israel kabagat pugepgeman, senesenen kabagat bilik kudduat tularatda? kalulut rakua le: Taanai iitco sita si Tuhan; aikaddiuakean polak nene si Tuhan.”

¹³ Kuanangannia minca: “Nuiitco te geti sangamberi sikatai bulat siabeu sigalaiakenenda.”

¹⁴ Lepa abbitnangan aku kabebet matatbaliu uman Tuhan ka isit bare, bulatnia, ai sedda tainanalep sipasisosoibi bulungan Tamus.

¹⁵ Kuanangan katubukku: “Ale togat sirimanua, anuitcoan leu aponia ragagalai? Nuiitco peile te bulat siabeu sangamberi sikatai bele peile ka nene.”

¹⁶ Iageti ambitnangan aku ka pugeratat kabagat uman Tuhan; bulatnia, kabebet enungan gugurukat ka uman Tuhan, ka paoggangan bilik sabeu Uma Sipunenan samba kudduat pasibuluijiat ai rua pulu lima sia taimanteu, siteitei uman Tuhan samba simatai ka kabelekat sulu samba ai sia murerekkuk ka ipot matatsulu ka isit kabelaiat sulu.

¹⁷ Lepa kuanangan katubukku: “Anuitcoan leu nenda, ale togat sirimanua? Pakaroat sigoiso pa nenda ka muntogat Jehuda, ragalaiake sangamberi galajet sikatai sene, rasunake polak nene ka pukakatai simakope samba kabagat nenda rabesiki le patuatKu simariuriu? Bulatnia, muparaboat le sia sitaimateu kamatakKu.

¹⁸ Kalulut nenda Kulumunake le geti kabagat goluKu. Ta te manununtu bagakKu samba ta Kuagai katet baga. Samba kenanen musoga sia katubukKu ka nganga sabeu, ta Kuarepi sia.”