Jehz. 7 - BUKO SIPUNENAN

Aailina kalepakat Jerusalem

¹ Iageti panibonangan si Tuhan katubukku,

² “Ekeu, togat sirimanua, kua: Kise te tiboiet Tuhan Taikamanua ka polak Israel! Atukapplungan! Atukapplungan ka epat tu'tut polak

³ Kineneiget aiailingan kalepakatnu samba Kupiliake le geti golukKu katubum samba Kuukum le geti ekeu siripot paraboatnu samba kulumunake le geti katubum sangamberi jo sigalaiakenennu.

⁴ Ta te Kupunununtuki ekeu baga samba ta Kuagai katet baga, tapoi Kulumunake le geti katubum siripot paraboatnu samba sangamberi kasitsitakenen sigalaiakenennu tuorakngake le geti katubum. Iageti agaimuiannia, Aku te Tuhan.

⁵ Kise te tiboiet Tuhan Taikamanua: Itco, momoi te simareirei pugejaat baga!

⁶ Amoian kalepakat, amoian kalepakatnu, kele itusuru isaggangi ekeu, itco kaooinia!

⁷ Moi le geti pugejaat baga katubum, ale sikudduiji laggai! Amoian teterenia, aiailingan teterenia! Gogoi pulaumaugat, ta mupokpok gorat baga ka sangamberi leleu.

⁸ Kineneiget bulat simaruei Kupiliake le golukKu katubum samba masibelaake oloi golukKu katubum, Kuukum le geti ekeu siripot paraboatnu samba masilumunake katubum sangamberi kasitsitakenen sigalaiakenennu.

⁹ Ta te Kupunununtuki ekeu baga samba ta Kuagai katet baga; Kulumunake le geti katubum siripot paraboatnu samba sangamberi kasitsitakenen sigalaiakenennu tuorakake le katubum. Iageti againungan getinia, Aku, Tuhan le, sipasisubuake.

¹⁰ Itco, bulatnia moi le gogoinia: iorak le kam pugejaat baga, musinula le pukakatai, makokope le ron pubuangan patuat.

¹¹ Pukakatai makokope le imararat, sibailiu pasisopo sangamberi jo. Taanai gogoira sipulelegei, ele sibara ka igit sibabaratda ele ka pukayoatnia; beringan laingen tubunia leu sasappru le.

¹² Amoian teterenia, gogoinia amalegrengan! Eddangan ta ipuangka baga sipasisasaki, eddangan ta ipureureu baga sipasisasakiake, kalulut oloi golu tuorakake ka sangamberi pulamaugatda.

¹³ Kalulut sipasisasakiake taan totoilinia ka sakiakenennia, kenanen aipeile sia katalagatda sirimanua sipuririmanua, kalulut oloi golu tuorakake ka sangamberi pulamaugatda samba taan momoi itukeraake, samba berisara sirimanua momoi ironake puririmanuania kalulut puseleatnia.

¹⁴ Nauake kam pipiau samba tarekake kam senengamata aponia pa! Tapoi berisara sirimanua siei pasaggak, kalulut oloi golu tuorakake ka sangamberi pulamaugatda.

¹⁵ Lanjau ai ka ujat laggai, besi' simasappo samba pulajeat ai kabaga. Kasei sikuddu ka uja matei le nia ka lanjau, samba kasei sikuddu kabagat laggai matei le nia kalulut pulajeat samba besi' simasappo.

¹⁶ Samba kenanen ai situarau katalagatda, mukuddu le sia geti ka sangamberi leleu kele uma' limendeu ka sangamberi su'su, sangamberinia mukatci, senesenenda kalulut puseleatnia.

¹⁷ Sangamberi kabei tuulei samba sangamberi sirimanua bela oinannia kalulut loto.

¹⁸ Rakomakake le komak pureureugat baga, isaluki le sia katugegekat, sangamberitda tata le puailaatda samba tukuilu le sangamberi ute' sibailiu toggaiat pureureugat baga.

¹⁹ Turibbaiake le perakra uja samba masra tuaddeake le simalolit. Ta iaarauake sia mas samba perakra ka gogoi pasiukuman Tuhan. Ta te maektek sia kalulutnia samba ta tuguguru kabagat balugura. Kalulut pagalaiat nenda ibailiu le katusoksonganda, sibeleake sia kabagat puseleat.

²⁰ Rapalainge le tubutda pasamba mas samba perak samba erunia pulaingean nene siabbit sia kabagat pubuangan patuat. Sibara ka mas samba perak nenda ragalai le tularat bulungan sikatai samba sabulunganda kasitsitakenen; kalulut nenda mas samba perakra Kubailiuake le katuailaatda.

²¹ Kubailiuake le getinia rauraugetda sirimanua siooiake samba ibailiu alaketda sirimanua sikatai ka polak nene, samba sia nene te masipalololit.

²² Kupisikake le matakKu katubutda samba sipasiraraurau nene palolitrangan geti umangKu simakeppu saki nene; tugururangan geti kabagania samba palolitrangannia,

²³ samba subuakerangannia. Kalulut laggai nenda masun le utak logau samba laggai nenda masun le pukakatai.

²⁴ Kuobaake le raoi tai bangsa bulat sikatai samba tai bangsa nene alarangan leu lalepda ibailiunia bakkatda. Kukappluake le pubuangan patuatda, sibaraake puroronda nenda, samba palolitrangan geti sangamberi kudduat sipunenanda.

²⁵ Moi le pulotokat, samba gabarangan katuaraugat, tapoi taanai.

²⁶ Moi le simareirei pugejaat baga, makakranangan leu sangamberi katuareman. Rakiddi le geti sara pamoilianan nabi, tata le geti panganturat imam samba ngantoman sibara ka sikebbukat laggai.

²⁷ Mureureu baga le Rimata, samba saute isaluki le sia katugegekat samba kabeira sangamberi sikudduiji laggai nenda ibailiu le masaggo kalulut loto. Kugalaiake le geti katubutda kele siripot paraboatda samba Kuukum le sia geti kele siripot rapasiukum. Samba agairangan getinia Aku te Tuhan.”