Jehz. 6 - BUKO SIPUNENAN

Patuptuman masisaggangi sangamberi leleu Israel

¹ Iageti oi tiboiet Tuhan katubukku:

² “Ale togat sirimanua, ipoake matam ka sangamberi leleu Israel samba pupatuptup nusaggangi sia!

³ Kua: Ale sangamberi leleu Israel, arepake tiboiet Tuhan Taikamanua! Kise te tiboiet Tuhan Taikamanua ka sangamberi leleu samba tinambu, ka sangamberi sopak oinan samba su'su: Bulatnia te, Kubaraake le geti pasaggangan katalagamui samba Kusubuake le geti sangamberi kudduat pasibuluijiatmui.

⁴ Sangamberi kudduat pasibuluijiatmui ibailiu le geti matangeu samba tupakatai le geti sangamberi kumanyangmui; Kubeleake le geti sangamberi taikaumam simamatei kamatat sangamberi bulungannu.

⁵ Kuribbaiake le geti sangamberi tubutda tai Israel simamatei kamatat sangamberi bulunganda samba masisaragaiake sangamberi tolatmui ka sangaliot kudduat pasibuluijiatmui.

⁶ Kaipa le nukuddu kam, sangamberi laggaimui ibailiu le geti karagatat samba sangamberi tinambu pasibuluijiatmui ibailiu le geti matangeu, bule sangamberi kudduat pasibuluajiatmui tupakatai samba tukaddiuake imatangeu, sangamberi bulungamui tububuake samba tutataake, sangamberi kumanyangmui tuanauake samba sangamberi sigalai kabeimui tusappruake.

⁷ Samba sangamberi taikaumam simamatei mutagguilu le geti katalagamui samba agaimuiannia geti, Aku te Tuhan.

⁸ Tapoi iletalaga, iate situaarau ka lanjau, Kuobaake le rapurimanua katalagatda tai bangsa, ke iaili teterenia tusaragaiake kam ka sangamberi laggai nenda.

⁹ Sedda te, katalagat sangamberi bangsa, kaipa aituabbit sia itutangsiake, sangamberi sirimanua situaarau katalagamui rarepdep le Aku, kateteret Kutoiliake minca patuatda sipaelet nenda, situaareu katubukKu samba sipisikake matatda, simariuriu paelet ka pasitutut sabulunganda. Samba maimun le geti bagatda masiitco pukakatai sigalaiakenenda samba masiitco sangamberi kasitsitakenen sigalaiakenenda.

¹⁰ Samba agairangan te getinia, Aku te Tuhan samba ta nganga siboboi, Ke manibo Aku Kuorakngake pugejaat baga katubutda.”

¹¹ Kise te tiboiet Tuhan Taikamanua: “Pupokpok kam samba teddaake kam reremui ka polak samba sogaake: Jago kam! Kalulut sangamberi jo samba pukakatai sigalaiakenen muntogat Israel, matei le sia ka lanjau, pulajeat samba besi' simasappo.

¹² Sikuddu ka reunan matei le sia kalulut besi' simasappo, sikuddu ka legre mutagguilu le sia kalulut lanjau samba situaarau samba leu sipuririmanua matei le geti kalulut pulajeat. Kisedda te Kubelaake golukKu katubutda.

¹³ Samba agaimuian getinia, Aku te Tuhan, kateteret iputagguilu sangamberi sirimanua simamatei katalagat sangamberi bulunganda ka sangaliot kudduat pasibuluatda, ka senen tinambu simabuak samba ka sangamberi uddut leleu, ka senen tei loina simalibbut samba ka senen loina sokut simaigi ran, ka kudduat araabbit buluakenen panguruat simasingin ka sangamberi bulunganda.

¹⁴ Kutotoiake le geti kabeiKu masisaggangi sia samba leu polakda, kaipa le rakuddu, Kubailiuake le imaanau samba matangeu barania ka kudduat simatangeu pat aili ka Ribla samba agairangan getinia, Aku te Tuhan.”