Jehz. 5 - BUKO SIPUNENAN

¹ Samba ekeu, togat sirimanua, ala sara lanjau simalauru samba pakei nenda sibailiu pasisaput alai; pakei nenda sibailiu pasisapu ka sipasisasapu alai samba bulut ngungum; lepa alanungan sara pasikilo samba parubeinungan alainu.

² Sepertelu buita nulaboake ka obengan katalagat laggai nenda ka lepat itukapplu pasialougat laggai Jerusalem; sepertelu buita nuala samba tippu pasamba lanjau nenda sangalionia; samba sepertelu minca saragaiake ka rusa, samba oppatkungan geti lanjau kateiteira.

³ Buita nuala goiso alainu nenda samba tabutnungannia kabagat taiming komaknu.

⁴ Samba leu minca buita nuala katubunia, ribbaiake ka obengan samba kasakakenia sedda; sedda te ibabara obengan sipasilabo sangamberi muntogat Israel. Samba kua kamatatda:

⁵ Kise te tiboit Tuhan Taikamanua: Nene te Jerusalem! Katalagat sangamberi bangsa Kugalakngakenia samba ka sibokkonia ai sangamberi laggaira.

⁶ Aipasabauan sangamberi surukatKu bele peile kataira sangamberi bangsa samba ka sangamberi siteuakenenKu maeru peile sangamberi laggai kabebenia; kalulut ta arasilo sangamberi surukatKu samba paraboatda ta siripot ka sangamberi siteuakenenKu.

⁷ Kalulut nenda kise te tiboiet Tuhan Taikamanua: Kalulut bulat makope katainu bele peile sangamberi bangsa kabebenu samba paraboatnu ta siripotnia ka sangamberi siteuakenenKu samba ta anugalaiake sangamberi surukatKu, sarapei anugalaiake le sangamberi surukatda tai bangsa kabebenu,

⁸ kalulut nenda kise te tiboiet Tuhan Taikamanua: Itco, Aku, bulatnia ibailiu le geti Aku saggaknu samba Kuorakngake le geti ukuman katubum kamatatda tai bangsa.

⁹ Kalulut sangamberi sigalaiakenennu sikatai Kugalaiake le geti katubum sitapei Akugalaiake samba taan Kugagalaike minca.

¹⁰ Kalulut nenda, sangamberi saukkui katalagmui rakom le geti tatogatda samba tatoga rakom le geti saukkuira samba Kuorakngake le geti ukuman katubum, oto sangamberi sipulelegei peile katubum Kusaragaiake le geti ka sangamberi matat rusa.

¹¹ Kalulut nenda, Aku sipuririmanua, kise te tiboiet Tuhan Taikamanua, bulatnia te, kalulut anupalolit poi kudduat sipunenanKu kabagat sangamberi bulungannu kasitsitakenen samba sangamberi sigalaiakenennu sikatai, Aku le geti masibubukkatake ekeu. Ta te Kupunununtuki ekeu baga samba ta Kuagai katet baga.

¹² Matei le geti sepertelu katalagmui kalulut besi' simasappo samba matei kalulut laje katalagamui; sepertelu matei le geti ka lanjaura sikuddu kabebemui; samba sepertelu minca Kusaragaiake le geti ka sangamberi matat rusa samba Kuoppat le geti lanjau kateiteira.

¹³ Kubelaake le geti golukKu katubutda, bailiu masanangnangan patuatKu simaoloi samba masegenangan bagakKu; samba agairangan getinia, Aku te Tuhan sipasikukua kabagat tu'tut bagakKu, kateteret Kubelaake golukKu katubutda.

¹⁴ Kugalai le geti ekeu ibailiu siragatat samba asaket katalagat sangamberi bangsa kabebenu kamatatda sirimanua situsasabau katubum.

¹⁵ Ibailiu le geti ekeu asaket samba loloiet, ibailiu repdemen samba sara kalotoakenenda tai bangsa kabebenu, kateteret Kuorakngake ukuman katubum kabagat golu samba kabagat lilippat sigalu golu, Aku, Tuhan, sipasikukua.

¹⁶ Kateteret Kubaraake pulajeat sabeu, sipasisubuake, samba Kubaraake le nia isubuake kam, kateteret Kuronnake pangoringan pulajeat katubumui samba Ku sappruake komen sikoiriakenenmui.

¹⁷ Kubaraake le geti pulajeat kakam samba sangamberi tarimeu simasabbak katalagamui, sisappruake geti tatogamui; maron le geti besi' simasappo samba muguruk le geti logau katalagamui samba kubaraake le geti lanjau katubumui, Aku, Tuhan, sipasikukua.”