Jehz. 48 - BUKO SIPUNENAN

¹ Nene te' onin muntogat nenda: Bulat ka bare': barania ka koat pat aili ka Hetlon, ka enungan gugurukat ka Hamat, Hazar-Enon, pat aili ka kupkumen laggai Damsyik, sipalelegre ka Hamat, sikuddu ka isit ka bare'nia, barania ka pasongan ka isit ka sikalaut teret ka pasongan ka isit ka sikaleleu ai rubeiat Dan.

² Mupasongan ka kupkumen Dan, barania ka pasongan ka isit ka sikalaut tetet ka pasongan ka isit ka sikaleleu, ai rubeiat Asyer.

³ Mupasongan ka kupkumen Asyer, barania ka pasongan ka isit ka sikalaut tetet ka pasongan ka isit ka sikaleleu, ai rubeiat Naftali.

⁴ Mupasongan ka kupkumen Naftali, barania ka pasongan ka isit ka sikalaut tetet ka pasongan ka isit ka sikaleleu, ai rubeiat Manasye.

⁵ Mupasongan ka kupkumen Manasye, barania ka pasongan ka isit ka sikalaut tetet kapasongan ka isit ka sikaleleu, ai rubeiat Efraim.

⁶ Mupasongan ka kupkumen Efraim, barania ka pasongan ka isit ka sikalaut tetet ka pasongan ka isit ka sikaleleu, ai rubeiat Ruben.

⁷ Mupasongan ka kupkumen Ruben, barania ka pasongan ka isit ka sikalaut tetet ka pasongan ka isit ka sikaleleu, ai rubeiat Jehuda.

⁸ Mupasongan ka kupkumen Jehuda, barania ka pasongan ka isit ka sikalaut teret pasongan ka isit ka sikalaleu, ai panguruat sikokoi buitanukokoiake kam, iate rua pulu lima ribu eto lionia, samba nantania makere lenantat karubeiat sisara, iate barania ka pasongan ka isit ka sikalaut teret pasongan ka isit ka sikaleleu, samba ka talagania ai kudduat sipunenan.

⁹ Rubeiat panguruat sikokoi buita nukokoiake kam kai Tuhan, nantania rua pulu lima ribu ngaeto samba lionia rua pulu ribu ngaeto.

¹⁰ Rubeiatda sangamberi sirimanua nene te panguruat sikokoi sipunenan nenda. Rubeiatda tai imam iate nantania ka bare' samba sikaiaman rua pulu lima ribu ngaeto, samba lionia ka sikalaut samba ka sikaleleu pulu ribu ngaeto. Ka talagania makoinong ai kudduat sipunenan Tuhan.

¹¹ Nene te' rubeiatda tai imam, atupuneningan, iate muntogat Zadok, sipupasikelat kamatakKu samba ta'amapepe sia ka bagat katupepeatda tai Israel, kele tai Lewi.

¹² Nene iate rubeiat sikokoi ka sia sibara ka polak sikokoiakenen, sara pagalaiat bulat sipunenan, pasong ka rubeiatda tai Lewi.

¹³ Rubeiatda tai Lewi iate makere ka kupkumenda tai imam, nantania rua pulu lima ribu ngaeto samba lionia pulu ribu ngaeto. Oto sangamberinia iate: nantania rua pulu lima ribu ngaeto samba lionia rua pulu ribu ngaeto.

¹⁴ Ta'momoi rasakiake beri goiso sibara sedda ele masipasiliakenia. Ta'momoi raipaikepake bulat simaeru ka laggai nenda ka sirimanua sabagei, aipoi nenda masipunenan le kai Tuhan.

¹⁵ Sipulelegei sibara ka lionia, iate lima ribu ngaetongan le', sipasosong ka rua pulu lima ribu ngaeto nenda iate ta'masipunenan, tapoi nenda addeat pakeiet ka kupkumen laggai sibailiu pulaggaiat samba polak pumonean.

¹⁶ Kirekatnia iate kasene: isit ka bare' samba ka kaiaman: epat ribu limangotu ngaeto, isit ka bare samba ka sikaleleu: leuet epat ribu limangotu ngaeto.

¹⁷ Sigolik kupkumen laggai nenda ai polak simalio, ka isit ka bare' samba ka kaiaman ruangotu lima pulu ngaeto, samba ka isit ka sikalaut samba ka sikaleleu ruangotu lima pulu ngaeto leuet.

¹⁸ Sipulelegei sibara ka nantania, simakere ka panguruat sikokoi sipunenan nenda, iate pulungaribu ngaeto ka isit ka sikalaut samba pulungaribu ngaeto ka isit ka sikaleleu samba buania iate komenda sipugagalai ka kupkumen laggai nenda.

¹⁹ Sangamberi sipugagalai nene, siooi sibara ka sangamberi muntogat Israel, sipasigagalai.

²⁰ Sangamberi panguruat sikokoi nenda iate rua pulu lima ribu ngaeto ngaminca rua pulu lima ribu ngaeto. Ka tubut epat tukdak buitanukokoiake panguruat sikokoi sipunenan nenda bakkat laggai nenda.

²¹ Legeinia iate bakkat rimata, iate ka isit ka sikalaut samba ka sikaleleu sibara ka panguruat sikokoi sipunenan samba bakkat kupkumen laggai nenda, samba pasong ka si rua pulu lima ribu ngaeto nenda, ka sikalaut teret ka pasongan sikalaut samba ka sikaleleu teret ka pasongan sikaleleu samba makere ka rubeiatda muntogat bagei, iate addeat kai rimata. Ka talagat rubeiat nenda iate panguruat sikokoi sipunenan samba Uma Sipunenan.

²² Bakkatda tai Lewi samba bakkat kupkumen laggai nenda, mukuddu le' ka talagat bakkat rimata nenda, oto ilaptip kupkumen Jehuda samba Benjamin iate rubeiat rimata.

²³ Pagalaiat muntogat bagei: barania ka pasongan ka isit sikalaut teret ka pasongan sikaleleu, ai rubeiat Benjamin.

²⁴ Pasongan ka kupkumen Benjamin, barania ka pasongan ka isit ka sikalaut tetet kapasongan ka isit ka sikaleleu, ai rubeiat Simeon.

²⁵ Pasongan ka kupkumen Simeon, barania ka pasongan ka isit ka sikalaut tetet kapasongan ka isit ka sikaleleu, ai rubeiat Isakhar.

²⁶ Pasongan ka kupkumen Isakhat, barania ka pasongan ka isit ka sikalaut tetet kapasongan ka isit ka sikaleleu, ai rubeiat Zebulon.

²⁷ Pasongan ka kupkumen Zebulon, barania ka pasongan ka isit ka sikalaut tetet kapasongan ka isit ka sikaleleu, ai rubeiat Gad.

²⁸ Pasongan kupkumen Gad ka isit ka kaiaman iate sibara ka Tamar teret ka bubuaket oinan Meriba ka be'bet Kadesh, riuriu ka bagat oinan Misir, riuriu ka koat sabau.

²⁹ Nene te' laggai bulat rubeiakenenmui ibailiu bakkat ikemenmui ka talagat samuntogat Israel. Nenda te' sangamberi rubeiatda, kise te tiboiet Tuhan Taikamanua.”

Kupkumen laggai sipunenan

³⁰ “Nene te' sangamberi matatbaliu kabelaiat ka kupkumen laggai nenda: ka be'be isit ka bare, kirekatnia iate epat ribu limangotu ngaeto,

³¹ ai telu matat baliu gugurukat, iate matatbaliu gugurukat Ruben, matatbaliu gugurukat Jehuda samba matatbaliu gugurukat Lewi. Aipoi sangamberi matatbaliu gugurukat ka kupkumen laggai nenda tukua siripokat oninda samuntogat Israel.

³² Ka bebe ka isit ka sikalaut, kirekatnia epet ribu limangotu ngaeto, ai leuet teleu matatbaliu gugurukat, iate matatbaliu gugurukat Josep, matatbaliu gugurukat Benjamin samba matatbaliu gugurukat Dan.

³³ Ka bebe ka isit ka kaiaman, kirekatnia epet ribu limangotu ngaeto, ai leuet teleu matatbaliu gugurukat, iate matatbaliu gugurukat Simeon, matatbaliu gugurukat Isakhar samba matatbaliu gugurukat Zebulon.

³⁴ Ka bebe ka isit ka sikaleleu, kirekatnia epet ribu limangotu eto, ai leuet teleu matatbaliu gugurukat, iate matatbaliu gugurukat Gad, matatbaliu gugurukat Asyer samba matatbaliu gugurukat Naftali.

³⁵ Oto sangalio kupkumen laggai nenda iate pulu balu ribu ngaeto. Barania ka gogoi nenda onin kupkumen laggai nenda iate: Tuhan MOI SEDDA.”