Jehz. 46 - BUKO SIPUNENAN

¹ Kasene le tiboiet Tuhan Taikamanua: Matat baliu gugurukat laibokat ka baga simattai ka isit sikalaut buita tupatpatake le' enemngagogoi ujunia, tapoi ka gogoi Sabat buita tubukaake le'.

² Rimata nenda tuguru barania ka uja masienungi kudduat gugurukat samba murio kabe'bet arigit gugurukat nenda. Teteret nenda leuet tai imam airapatatarek buluakenen rarangen samba buluakenen pasiaraugat rimata nenda samba murekkuk manidou le nia ka taggat matat baliu gugurukat nenda, lepa belania minca. Matatbaliu gugurukat nenda ta'momoi tupatpatake teret kasoibokat.

³ Sakalaggaiat leu buita murekkuk manindou sia ka matat Tuhan ka matatbaliu gugurukat nenda ka gogoi Sabat samba laggo sibau.

⁴ Buluakenen rarangen panguruatakenen rimata nenda kai Tuhan ka gogoi Sabat iate enemngamuneng biribiri simaeru tubu samba sangamuneng biribiri simanteu simaeru tubu.

⁵ Buluakenen sitattatakenen sibara ka biribiri simanteu bui tatugalai pasamba sangaefa tepung, tapoi buluakenen sitattatakenen sibara ka biribiri bagei siripot siooi katubunia, samba tula sangahin addeat sangaefa.

⁶ Ka laggo sibau buita tupanguruatnake sangamuneng jaui sibau tubu simanteu simalina, samba enemngamuneng biribiri samba sangamuneng biribiri simanteu simalina.

⁷ Sibailiu buluakenen sitattatakenen buita igalai sangaefa tepung pasamba sangamuneng jaui samba sangaefa pasamba sangamuneng biribiri simanteu, tapoi buluakenan sitattatakenen sibara ka biribiri bagei siripot siooi katubunia, samba tula sangahin addeat sangaefa.

⁸ Ke' tuguru rimata ka baga, buita tugurunia masienungi kudduat simalio samba sedda leuet ibebela.

⁹ Tapoi sipulalaggai katetere punen, mariuriu le' raparuru' kamatat Tuhan, samba tuguru masienungi matatbaliu ka bare' addeat murekkuk manindou, edangannia rabela masienungi matatbaliu gugurukat ka kaiaman, samba situguguru masienungi matat baliu ka kaiaman eddangannia rabela masienungi matat baliu gugurukat ka bare'. Bui itoili sara sirimanua masienungi matatbaliu katugurukatnia, tapoi senesenda buita bela ka matatbaliu gugurukat ka matania.

¹⁰ Pagalaiat rimata nenda, tuguru le nia pasamba sia samba bela pasamba sia.

¹¹ Ka gogoi punen sabeu samba sangamberi punen sabeu buita mariuriu ibara buluakenen sitattatakenen, iate sangaefa tepung tugalai pasamba sangamuneng biribiri sianteu, tapoi buluakenen sitattatakenen sibara ka biribiri bagei siripokat siooi katubunia, samba tula sangahin addeat sangaefa.

¹² Ke' itarekngake rimata buluakenen kateubaga ele buluakenen katuaraugat kateubaga kai Tuhan, oto sirimanua buita ibukaake matatbaliu gugurukat ka isit kasikalaut addeatnia samba ipanguruatake le geti buluakenen rarangennia samba buluakenen katuaraugatnia nenda kele sigalaiakenennia ka gogoi Sabat. Lepa geti belania samba lepat ibela ka matatbaliu gugurukat buita tupatpatake.

¹³ Senen gogoi buita igalai biribiri sipururura sangarura samba simalina sibailiu buluakenen rarangen kai Tuhan, senen simansep buita igalaiake.

¹⁴ Bagei, senen gogoi buita ipanguruatake buluakenen sitattatakenen seperenem efa tepung pasamba tula sepertelu hin addeat masipagalu tepung simaeru nenda. Nenda te' buluakenen sitattatakenen kai Tuhan, samba siteuakenen nenda mariuriu teret buruburu.

¹⁵ Kise te' buita rapanguruatake biribiri samba buluakenen sitattatakenen samba tula senen gogoi sibailiu buluakenen rarangen simariuriu.

¹⁶ Kasene le' tiboiet Tuhan Taikamanua: Ke' iake rimata nenda sara akenen sibara ka bakkat ikemennia katubut sara togania, oto nenda bailiu bakkat togania, samba bakkat nene ibailiu ikemenra.

¹⁷ Ke' ikau kaunennia sibara ka bakkat ikemennia katubut sara paguguletnia, oto nenda ibailiu le' bakkatnia teret rura katubelaiat, lepa buita itoiliake minca katubut rimata nenda; sarat tatogat rimata nenda le' momoi masiikepake bakkat ikemennia.

¹⁸ Bui iala rimata nenda sara sibara ka bakkat ikemenda taikauma, bailiu tuareurangan ka bakkatda, sarat sibara ka bakkatnia le momoi ipaikep ka tatogania bule bui berisara ka sapaamianKu tuareuake ka bakkatnia.”

Kudduat pasiseu sangamberi buluakenen

¹⁹ Lepa ambitnangan aku ka matat baliu ka tugurukat ka be'bet matatbaliu gugurukat ka bili addeatra tai imam ka isit ka bare kudduat sipunenan, bulatnia, sedda ka rubeiat bulat sikaleleu ai sara kudduat.

²⁰ Kuanangan katubukku: “Sene te kudduatda tai imam masiseu buluakenen pasitebui sele' samba buluakenen pasiposa jo samba masilabo' buluakenen tattatakenen, samba ta'momoi raambitnia ka laibokat ka uja, kalulut nenda bule bui' rasipunenanake uman Tuhan.”

²¹ Lepa geti paaleinangan aku ka laibokat ka uja samba obaakenangan kuei ka epat tukdak laibokat nenda, bulatnia, ka senen tukdak laibokat nenda aipei le' laibokat bagei.

²² Ka epat tukdak laibokat nenda ai laibokat sigoiso, epat pulu ngaeto nantania samba telu pulu ngaeto lionia, kaepatnia makere kirekatnia.

²³ Sibokko ka epat laibokat sigoiso nenda ai irip bukku samba sigoilik ka rubeiat ka repet irip bukku nenda tugalai kudduat paneukat.

²⁴ Kuanangan katubukku: “Nene te' purusuat kudduat paneukat, kudduat paneukatda sipugagalai ka Uma Sipunenan raseu buluakenen ja'jaket paamian Tuhan.”