Jehz. 45 - BUKO SIPUNENAN

Panguruat sikokoi, rubeiat kupkumen laggai – Rubeiat rimata

¹ “Kateteret nuparubei kam laggai nenda ibailiunia bakkat ikemenmui ka enungan pauktuk, buita nukokoiake sangamata sibara ka polak nenda ibailiunia panguruat sikokoi simasipunenan kai Tuhan, nantania rua pulu lima eto samba lionia rua pulu ngaribu eto. Sangaliot polak kabagat pasongan nene iate sipunenan.

² Sibara ka polak nene buita tutarekake addeat kudduat sipunenan, sara siepat tukdak simananta samba lionia limangotu ngaeto samba sibokkonia ai polak simalio, lionia lima pulu ngaeto.

³ Ka kupkumen silepa kire nene, kireki' le' sangarubeiat nantania rua pulu lima ngaeto samba lionia pulu ribu ngaeto: sedda te kudduat sipunenan, samba rubeiat nene iate bulat sipunenan.

⁴ Nene iate rubeiat sipunenan sibara ka polak nenda samba ibailiu kudduatda tai imam sigalaiake panindougat ini iate rubeiat simapunenan, siooi masilegreake tubu masipasikeli si Tuhan. Nenda te kudduat pulalemanda samba ibailiu le' kupkumen sipunenan addeat kudduat sipunenan.

⁵ Rua pulu lima ngaeto nantania samba pulu ribu ngaeto lionia buita ibailiu bakkat da tai Lewi sipupasikelat mugalai ka Uma Sipunenan, nenda te kupkumen laggainia, kudduatda.

⁶ Ekeu sibakkat laggai buita nuteuake: lima ribu ngaeto lionia samba ruapulu lima ribu ngaeto nantania, sipasosong ka panguruat sikokoi sipunenan nenda. Nenda te addeat sangamberi suku Israel.

⁷ Pagalaiat rubeiat rimata nenda buita bara ka isit ka sikaleleu samba ka isit ka sikalaut ka panguruat sikokoi sipunenan samba bakkat laggai nenda, nenda pasongan ka rua rubeiat nenda. Ka isit sikaleleu buita sege ka pasongan sikaleleu, samba ka isit kasikalaut buita sege ka pasongan sikalaut. Oto nantania buita makere ka nantat rubeiat muntogat Israel, iate barania ka pasongan sikaleleu teret ka pasongan sikalaut laggai nenda.

⁸ Nenda te' ibailiu bakkatnia ka polak Israel. Sangamberi rimatat Israel ta'an rapaoreiji paamianKu. Rakau le geti laggai nenda katubut muntogat Israel siripokat sangamberi sukutda.”

Pasikelat paamian Tuhan samba galaiakenen rimata

⁹ Kasene le' tiboiet Tuhan Taikamanua: “Paan nenda, ale tai rimata Israel, areuake le' pugegege samba paoret, tapoi galaiake le puroipoat samba pubulanan. Ariake pukakatai situituiake paamianKu ka pulak bakkatda, kise tiboiet Tuhan Taikamanua.

¹⁰ Pasikilo, efa samba bat simaeru le mateu katubum.

¹¹ Siripokatnia efa samba batr aikirekatnia simakere tupakire, bailiu sangabat bagania seperpulu homer, samba sanga efa iate seperpulu homer leuet, oto siripokat homer le' kirekat nenda tupakire.

¹² Kakam sangasykal simateunia makere ka rua pulu gera, lima syikal iate lima syikal samba pulu syikal iate pulu syikal samba lima pulu syikal iate sangamina.

¹³ Nene te panguruat sikokoi buita nupanguruatake: seperenem efa sibara ka sangahomer gandum samba seperenem efa sibara ka sangahomer jelai.

¹⁴ Siteuakenen pagalaiat tula: seperpulu bat sibara ka sangakor, sangakor iate makere le' pulungabat.

¹⁵ Sangamuneng togat biribiri sibara ka senen ruangotu ngamuneng bakkat muntogat Israel. Sangamberinia nenda addeat buluakenen sitattatakenen, buluakenen rarangen samba buluakenen pasiarau addeat masigalaiake paabanan ka sia, kise te' tiboiet Tuhan Taikamanua.

¹⁶ Sangamberi sakalaggaiat buita masipanguruatake panguruat sikokoi nene katubut rimata Israel.

¹⁷ Rimata le' mupasikelat pagalaiat buluakenen rarangen, buluakenen sitattatakenen, buluakenen siuruakenen ka gogoi punen sabeu, laggo sibau, gogoi Sabat samba ka senen punen sabeu ka muntogat Israel. Nia le' geti masiparatek buluakenen pasiposat jo, buluakenen sitattatakenen, buluakenen rarangen samba buluakenen pasiarau addeat masigalaiake paabanan ka muntogat Israel.”

Panguruat ka punen sabeu

¹⁸ Kasene le' tiboiet Tuhan Taikamanua: “ka laggo siboiki, ka gogoi siboiki laggo nenda, ala sangamuneng jaui simanteu sibau tubu simaeru tubu samba palina kudduat sipunenan nenda.

¹⁹ Imam buita iala goiso logau buluakenen pasiposat jo samba masilokotakenia ka sangamberi arigit Uma Sipunenan samba ka epat tukdak ai paoggangan sibokko kudduat pasibuluat samba ka sangamberi arigit matat baliu gugurukat laibokat baga.

²⁰ Kise te nugagalaiake ka gogoi siboiki laggo sikapitu ka sirimanua sigalai jo ka taipapaliket baga samba taiaagaiet. Kabagat nene anugalaiakean paabanan ka Uma Sipunenan.

²¹ Ka laggo siboiki, ka gogoi sikapulu epat nenda buita nupunenake kam gogoi punen Paskah, buita nukom kam roti sitasioman pitungagogoi ujunia.

²² Ka gogoi nenda rimata buita ipatarek jaui simanteu sibailiu buluakenen pasiposat jo kalulut nia samba kalulut sakalaggaiat.

²³ Pitungagogoi ujunia punen sabeu nenda buita igalai buluakenen rarangen kai Tuhan: senen gogoi pitungamuneng jaui simanteu samba pitungamuneng biribiri simanteu simaeru tubu samba buluakenen pasiposat jo senen gogoi sangamuneng kambing simanteu.

²⁴ Sibailiu buluakenen sitatattatakenen buita ipatarek sangaefa tepung pasamba sangamuneng jaui samba sangaefa tepung pasamba sangamuneng biribiri simanteu samba tula sangahin addeat sangaefa.

²⁵ Ka laggo sikapitu, ka gogoi pulu lima laggo nenda, iate ka gogoi punen, buita igalai kele nene pitungagogoi ujunia: buluakenen pasipasat jo, buluakenen rarangen, buluakenen sitattatakenen samba tula.