Jehz. 44 - BUKO SIPUNENAN

Matat baliu gugurukat situpapatpat

¹ Lepa geti ambitnangan aku minca ka matat baliu gugurukat ka uja ka kudduat sipunenan, simattai ka sikalaut, gugurukat nene aitupapatpat.

² Lepa panibonangan si Tuhan katubukku: “Matat baliu gugurukat nene kau le mariuriu tupatpat, buita itubuka samba bui ibara berisara sirimanua situguguru sedda, aipoi Tuhan, Taikamanuan Israel, aigurukingannia, kalulut nenda gugurukat buita mariuriu le itupatpat.

³ Sarat rimata le momoi mukuddu sedda mukom komen ka matat Tuhan. Rimata nenda tuguru masienungi kudduat gugurukat samba bela le' getinia sedda.”

Enungan pagalaiat panindougat samba tai imam

⁴ Lepa ambitnangan aku ka matat baliu gugurukat ka bare' ka matat Uma Sipunenan, itcokungan, bulatnia uman Tuhan sun le pulatsanan Tuhan, oto purekkukungan manindou.

⁵ Panibonangan si Tuhan katubukku: “Ale togat sirimanua, lelekake simakolou, itco le sipulelek samba arepmake le simakolou sangamberi sitiboakenenKu katubum pagalaiat enung galaiakenen ka uman Tuhan samba pagalaiat sangamberi surukatNia. Lelekake simakolou kasei momoi tuguru kabagania, samba kasei tatuobaake tuguru ka kudduat sipunenan.

⁶ Kua le' katubut muntogat simakela paatuat, iate muntogat Israel: Kasene le' tiboiet Tuhan Taikamanua: Teret senean te' galai tubum sikatai nenda, ale muntogat Israel,

⁷ siobaake sangamberi siooiake, iate sirimanua sitaipasisunat paatuat ele akklulania tuguru ka kudduat sipunenanKu samba ka oijananda nenda masipalolit teteremui masipanguruatnake komenKu, iate tabe' samba logau. Kapasigagalaiake kele nenda nupasabau le kam palelenganKu ka sangamberi galai tubumui sikatai.

⁸ Ta'anupasikeli sangamberi bibiletKu sipunenan samba nusausau le sia masipasikeli pasikelietnu katubukKu ka kudduat sipunenanKu.

⁹ Kalulut nenda kasene le tiboiet Tuhan Taikamanua: Berisara sirimanua siooiake sitaisunat paatuat samba akkulania, momoi tuguru ka kudduat sipunenanKu, senen sirimanua siooiake sikuddu ka talagat tai Isarel.

¹⁰ Tapoi tai Lewi situaareu katubukKu kateteret ta aramatopit katubukKu ka pasitutut sabulunganda, rasilo ke geti ukumanda.

¹¹ Ka kudduat sipunenanKu, sia le abara pasikelat masijago sangamberi matatbaliu Uma Sipunenan samba mupasikelat masipasikeli kabagat Uma Sipunenan; sia te' masija'ja'ja buluakenen rarangen samba buluakenen ja'jaket ka bangsa nenda samba mupasikelat ka bangsa nenda.

¹² Kalulut arapasikelingan bangsa nenda ka matat sabulunganda, kamatat muntogat Israel aibailiuan katusoksongan, sibailiuiake sia masele. Musuppa le' aku pagalaiat sia, kise te' tiboiet Tuhan Taikamanua, rabairat le' geti ukumanda saratda.

¹³ Ta' aralegeri Aku addeat masigalaiake puukuket imam ka matakKu ele masilegeri sangamberi bibiletKu sipunenan ele sangamberi panguruat bulat sipunenan, rabairat le puailaatda kalulut galai tubutda sikatai.

¹⁴ Kuuddetake le sia mupasikelat ka Uma Sipunenan samba masigalaiake sangamberi pasikelat sipaipo sedda samba masigalaiake sangamberi galaiakenen sedda.

¹⁵ Tapoi pagalaiat sangamberi imamda tai Lewi sibara ka muntogat Zadok sigalaiake puukuket ka kudduat sipunenanKu kateteret aramalimai tai Israel katubukKu, sia le masilegreake tubu katubukKu masigalaiake panindougat samba mupasikelat ka matakKu masipanguruatake katubukKu tabe samba logau, kise te tiboiet Tuhan Taikamanua.

¹⁶ Sia le geti tuguguru ka kudduat sipunenanKu samba masilelegeri mejaKu addeat masigalaiake panindougat samba ragalaiake le geti puukuketnia ka mataKu.

¹⁷ Oto ke' raoba tuguru ka matat baliu gugurukat laibokat ka baga, bui taraleppeiake leppei simaalit baga, ta' momoi raleppeiake bulut biribiri kateteret ai sia mupasikelat ka matat baliu gugurukat laibokat ka baga ele kateteret airagagalaiake panindougat ka Uma Sipunenan.

¹⁸ Bui tarapakei le sorot ute simaalit baga samba sokkit simaalit baga, tapoi bui rapakei akkik tenga sibaraake attinang.

¹⁹ Kateteret arabela ka laibokat ka uja masiailiake paamian Tuhan nenda, buita ragolok bibiletda sipakeira kabagat aragalaiake panindougat samba masikoiriakenia ka bili' sipunenan, lepa geti leppeiakerangan leppei bagei, bule paamian nenda bui ibailiu sipunenan, kalulut aiorak sia bibiletda tai imam nenda.

²⁰ Alaira ta'momoi tusapu ele tuobaake iputu'tu simananta, tapoi buita tusapu imatete'.

²¹ Tai imam ta'momoi mulo anggur, ke'raoba tuguru ka laibokat ka baga.

²² Silumang ele sinanalep silumang bui raalania sikalalepra, tapoi buita siokko sibara kamuntogat Israel le, ele sara silumangakenen imam le momoi tuala'.

²³ Bui taragelaiake le' paamianKu pagalaiat pabaggeiat sipunenan samba ta' sipunenan samba masipaagai katubutda pabaggeiat simalolit samba simalina.

²⁴ Kabagat sara pakarotda buita ragalaiake galaiakenen sibailiu sipasiukum samba buita masiukum sia siripot enungan galaiakenenKu, buita raomennake surukatKu samba siteuakenenKu ka gogoi punenKu samba masisuru' gogoi SabatKu.

²⁵ Ta' momoi raitco sirimanua simamatei kalulut ibailiu malolit le sia. Sarat tubu simamatei ukkuinia ele inania, togania simanteu ele sinanalep, kebbut baginia simanteu, kebbut baginia sinanalep sitapei amutalimou, momoi le rapalolit tubutda.

²⁶ Lepat pasilinakatnia buita iadde pitunga gogoi,

²⁷ ka gogoi aituguru ka kudduat sipunenan, ka laibokat ka baga, addeat masigalaiake panindougat ka kudduat sipunenan, buita ipanguruatake buluakenen pasiposat jonia, kise te' tiboiet Tuhan Taikamanua.

²⁸ Ta'anai rubeiatda ka pubabakkat ikemen, aipoi Aku le' sibakkat ikemennia, bui' nukaunia katubutda polak bakkat ka Israel, kalulut Aku le sibakkat sia.

²⁹ Panguruat, buluakenen pasiposat jo samba buluakenen panebui sele', buita sia le masikokom samba sangamberi sikokoiakenen ka polak Israel iate rubeiatda.

³⁰ Bulat simaeru sibara ka bua siboiki samba sangamberi panguruat sikokoi sabara kaipa pa, sibara ka sangamberi panguruat sikokoimui iate rubeiatda tai imam, bulat simaeru sibara ka tapung jelainu, buita nukau katubut imam bule bara panukanan ka sangamberi lalepnu.

³¹ Sangamberi uma' ele tarimeu simamatei ele sibailiu legei sikukrut tarimeu simasakbak bui' ikomnia imam.”