Jehz. 43 - BUKO SIPUNENAN

Tuhan toili ka Uma Sipunenan kabagat pulatsanan

¹ Lepa ambitnangan aku ka matat baliu gugurukat, iate matat baliu gugurukat simattai ka isit sikalaut.

² Bulatnia, pulatsanan Taikamanuan Israel moi le' barania ka isit sikalaut samba maarepnangan nau kele oinan purupugat sipugogong samba polak mutoro kalulut pulatsananNia.

³ Siitcoku iate kele siitcoku kateteret kaoijananNia masisubuake laggai nenda samba kele siitcoku ka be'bet bagat oinan Kebar, oto purekkukkungan.

⁴ Beringan pulatsanan Tuhan tuguru le' ka bagat Uma Sipunenan masienungi matat baliu gugurukat simattai ka isit sikalaut.

⁵ Ketsat nenda akkatakenangan samba ambitnangan aku la laibokat ka baga, bulatnia, Uma Sipunenan nenda sun le pulatsanan Tuhan.

⁶ Lepa arepkungannia Ipanibo katubukku barania ka bagat Uma Sipunenan, sirimanua sipasikikire Uma Sipunenan nenda murio ka be'beku,

⁷ kuananganNia katubukku: “Ale togat sirimanua, nene te kudduat uddenan purimataatKu samba nene te kudduat peraket rerekKu; sene' te geti Kukukuddu katalagatda tai Israel teret buruburu samba muntogat Israel ta'an rapalololit oningKu sipunenan; sia samba leuet tai rimatatda, pasamba puoloman tubutda ele pasamba sangamberi tubut rimatatda simamatei;

⁸ samba leu ta' ragagalakake taggat matat baliura ka be'bet taggat matat baliuKu ele masirioake sangamberi arigit matat baliura ka be'bet arigit matat baliuKu', baliu sarat rupingan le sipasaraake Aku katubutda. Rapalolit le' oningKu sipunenan pasamba sangamberi galai tubutda sikatai, oto kalulut nenda Kumateiake le sia kabagat oloi goluKu.

⁹ Kineiget, raareuake le geti taimatopitda samba sangamberi tubu rimatatda simamatei ka tubukKu samba mukuddu le geti Aku ka talagatda teret buruburu.

¹⁰ Oto ekeu, ale togat sirimanua, pakolou le katubut muntogat Israel pagalaiat Uma Sipunenan nene, kipa katugalaiat Uma Sipunenan nene, bule ibailiu ramaila masiitco sangamberi puseleatda.

¹¹ Ke ai ailatda masiitco senen sigalaiakenenda, galai le' tularat Uma Sipunenan, sangamberi parubeiatnia, sangamberi matat baliu kabelaiat samba katugurukat samba sangamberi tularat tubunia. Paagai le' katubutda sangamberi siteuakenenNia samba surukatnia samba suratake nenda ka matatda, bule ragalaiake kabagat topit sangamberi surukatnia samba siteuakenenNia.

¹² Nene te siteuakenen pagalaiat Uma Sipunenan nenda: sangamberi kupkumen ka tu'tut leleu nenda iate bulat sipunenan. Bulatnia, nene te' siteuakenen pagalaiat Uma Sipunenan nenda.”

Sangamberi pasikire' kudduat pasibuluat samba panukanannia

¹³ Nene te kirekat kudduat pasibuluat nenda ka bagat eto, iate eto sisangatakep kabei mananta pei le ka ngaeto simaturere: sopaknia iate sangaeto kerunia samba sangaeto lionia samba sangalio sopak nenda ai be'benia buaknia sangaremang. Nene te buak kudduat pasibuluat nenda:

¹⁴ barania ka sopak ka bagat polak teret kapolu bulat karepe iate rua ngaeto samba liot polou simabokko nenda iate sangaeto. Barania ka polou simabokko bulat karepe teret polou simabokko ka pata ai epet ngaeto samba liot polou simabokko nenda sangaeto leuet.

¹⁵ Kudduat purakaat nenda iate buaknia epat ngaeto samba ka kudduat purakaat nenda muto'to' ka pata epat ban.

¹⁶ Kudduat purakaat nenda nantania pulu rua ngaeto samba lionia pulu rua ngaeto, oto epat tukdaknia.

¹⁷ Polou sigoilik purakaat nenda nantania pulu epat ngaeto samba lionia puluepat ngaeto, oto epat tukdak leuet. Sigoilik kudduat pasibuluat nenda ai epat sopak, sangaeto lionia samba sigoilik sopak nenda ai be'benia, sitengaeto lionia. Orat kudduat pasibuluat nenda iate isit sikalaut.

¹⁸ Lepa panibonangan katubukku: “Ale togat sirimanua, kasene le tiboiet Tuhan Taikamanua: Kasene le' siteuakenen pagalaiat kudduat pasibuluat nenda: Kateteret ilepa tugalai samba kepei tupanguruatnake buluakenen silabo ka uddutnia samba masisubuiake logau katubunia,

¹⁹ kau le ka tai imamda tai Lewi sibara ka muntogat Zadok sangamuneng jaui simanteu sibau tubu addeat buluakenen pasiposat jo, aipoi sia le momoi masilegreake tubu katubukKu masigalaiake panindougat, kise te tiboiet Tuhan Taikamanua.

²⁰ Ala' le goiso ka logau nenda samba lokotake nenda ka epat ban kudduat pasibuluat nenda samba ka epat tukdak sopak simabokko nenda samba ka sangaliot be'benia; kise te nupalina kudduat pasibuluat nenda samba nubaraake paabanan katubunia.

²¹ Ala le jaui simanteu addeat buluakenen pasiposat jo nenda samba buita ralabo le nia sirimanua ka kudduat siteuakenen kabe'bet Uma Sipunenan, ka uja kudduat sipunenan.

²² Ka gogoi sikarua buita nupanguruatake sangamuneng kambing simanteu simaeru tubu sibailiu buluakenen pasiposat jo samba buita rapalina le' sirimanua kudduat pasibulat nenda kele aitupalina pasamba jaui simanteu.

²³ Lepat nugalaiake pasilinakat nenda, buita nupanguruatake sangamuneng jaui simanteu sibau tubu simaeru tubu samba sangamuneng biribiri simanteu ka talagat sangamberi biribiri, simaeru tubu.

²⁴ Buita nuambitnia ka matat Tuhan. Tai imam buita rakarapake garam ka uddutnia samba masipanguruatakenia sibailiu buluakenen sirarak kai Tuhan.

²⁵ Ujut pitunga gogoi buita nupatarek senen gogoi sangamuneng kambing sibailiu buluakenen pasiposat jo, buita nupatarek leuet sangamuneng jaui simanteu sibau tubu samba biribiri simanteu sibara ka talagat sangamberi biribiri, simaeru tubu.

²⁶ Pitungagogoi buita ragalai paabanan ka kudduat pesibuluat nenda samba masipalinania, kise te' tusukatnake kudduat pasibuluat nenda.

²⁷ Lepat aitukapplu gogoi nenda, ia geti ka gogoi sikabalu samba sanganantania tai imam le geti masigagalai sangamberi buluakenen rarangenmui samba sangamberi buluakenen katuaraugatmui ka uddut kudduat pasibuluat nenda samba makiliunangan bagaKu katubumui, kise te' tiboiet Tuhan Taikamanua.”