Jehz. 40 - BUKO SIPUNENAN

Tippu 40–48 PASIITCO PAGALAIAT RURA SIBAU Sangamberi matat baliu gugurukat samba sangamberi laibokat Uma Sipunenen sibau

¹ Ka rura sikarua pulu lima pasat aturibbaiake kai, iate ka panandaat rura, ka gogoi sikapulu laggo nenda. Ka rura sika pulu epat pasat atukalaake laggai nenda, ka gogoi nenda leuet ge'get Tuhan masisaluki aku samba Iambit le aku,

² kabagat sangamberi pasiitco sibara kai Tuhan ka polak Israel samba kudduakenangan aku ka uddut sara leleu simakope buak. Ka uddut leleu nenda ka matakku ai simakere kele laggai.

³ Sedda te' Iambit aku. Itco, ai sara sirimanua ituitco kele tembaga samba ka kabeinia ai tali simaalit pasamba tutura pasikire, murio le nia ka matat baliu gugurukat.

⁴ Panibonangan sirimanua nenda katubukku: “Ale togat sirimanua, itco le simakolou samba arepmake sipulelek. Lelekngake simakolou sangamberinia sipatoilaku katubum, lulut nenda te aituambit ekeu sene, bule kupatoila sangamberinia katubum. Paagai le sangamberinia siitconu katubut muntogat Israel.”

⁵ Itco, ka ujat uma nenda ai irip, sigoilik sangalio uma nenda. Ka kabei sirimanua nenda ai tutura pasikire', nantania enem ngaeto. Ngaeto nene sangatakep kabei mananta peile ngaeto simaturere. Ikireki le irip nenda, keppunia sangatutura samba buaknia sangatutura.

⁶ Ia geti segenia ka matat baliu gugurukat simattai ka sikalaut samba sakaijinangannia, kirekinangan taggat matat gugurukat nenda; sangatutura lionia.

⁷ Lepa geti kirekinangan bili' pujagoat: nantania sangatutura samba lionia sangatutura. Paoggangan rua bili' pujagoat iate lima ngangaeto. Taggat matat baliu isit ka baga ka bebet kudduat gugurukat nenda iate sangatutura.

⁸ Lepa geti kirekinangan kudduat gugurukat nenda; balu ngangaeto,

⁹ samba arigit iripnia rua ngangaeto samba kuddut nenda ai ka isit ka baga.

¹⁰ Pagalaiat sangamberi bili' pujagoat ka matat baliu gugurukat ka isit ka sikalaut nenda ai telu bili ka senen tukdaknia. Katelunia makere kirekatnia samba ka rua arigit irip samba ka rua tukdaknia makere kirekatnia.

¹¹ Lepa kirekinangan lobok matat baliu gugurukat nenda: lionia ka isit ka baga iate pulu ngaeto, samba lionia ka isit ka uja pulu telu ngaeto.

¹² Ka rubeiat ka matat bili nenda ai pasikekre, lionia sangaeto samba kasedda leuet kirekat kekre ka sila bagei. Beunan bili' pujagoat nenda iate enem ngaeto ka ruangasilania.

¹³ Lepa kirekinangan matat baliu gugurukat nenda barania ka rupi ka isit ka teitei bili' pujagoat teret ka teitei rupit pujagoat bagei, siailiake karua matat baliu sakkerat nenda: lionia rua pulu lima ngaeto.

¹⁴ Kirekinangan leuet kudduat gugurukat nenda: rua pulu ngaeto samba sigoilik kudduat gugurukat nenda iate laibokat.

¹⁵ Barania ka matat baliu gugurukat ka uja teret ka kudduat gugurukat ka isit ka baga: lima pulu ngaeto.

¹⁶ Sigoilik matat baliu gugurukat ka isit ka baga nenda ai jandela pasamba komak kekre, iate ka sangamberi bili' pujagoat samba ka sangamberi arigit irip samba kasedda leuet ka kudduat gugurukat. Ka sangamberi arigit irip nenda tusurat tularat loinat korma.

¹⁷ Lepa ambitnangan aku ka laibokat ka uja, bulatnia, sigoilik laibokat nenda ai bili', iginia telu pulu. Sangamberi bili' nenda tugalai ka uddut bukku.

¹⁸ Bukku bagat uma nenda ai ka be'bet sangamberi matat baliu gugurukat masitut nantania. Nenda iate bagat uma ka repa.

¹⁹ Lepa geti kirekinangan liot laibokat nenda barania ka isit ka bagat matat baliu gugurukat ka repe' teret ka isit ujat matat baliu gugurukat ka baga: sangotu ngaeto. Lepa puenungnangan ka matakku masiailiake ka bare'

²⁰ Bulatnia, ai matat baliu gugurukat simattai ka bare', ka laibokat ka uja. Kirekinangan nantania samba lionia.

²¹ Bili' pujagoatnia, telu kasila'-telu kasila', sangamberi arigit irip samba kuddut gugurukatnia iate makere kirekatnia matat baliu gugurukat siboiki: lima pulu ngaeto nantania samba lionia rua pulu lima ngaeto.

²² Sangamberi jandelania, kudduat gugurukatnia samba sangamberi tularat loinat kormania makere leuet kirekatnia ka matat baliu gugurukat simattai ka sikalaut. Sirimanua momoi ratusakai sedda masienungi orat sipitungataka' samba kudduat gugurukat ka isit ka baga.

²³ Ka laibokat baga ai sara matat baliu gugurukat simattai ka matat baliu gugurukat ka bare' makere le nia kele matat baliu gugurukat ka sikalaut, kirekinangan barania ka matat baliu gugurukat teret ka matat baliu gugurukat: sangotu ngaeto.

²⁴ Lepa geti ambitnangan aku masiailiake ka kaiaman, bulatnia, ai sara matat baliu gugurukat simattai ka kaiaman, kirekinangan sangamberi bili' pujagoatnia, sangamberi arigit iripnia samba kuddut gugurukat, kirekatnia makere le ka bagei.

²⁵ Sigoilik matat baliu gugurukat nenda samba kudduat gugurukatnia ai jandela, simakere ka bagei nantat matat baliu gugurukat nenda lima pulu ngaeto samba lionia rua pulu lima ngaeto.

²⁶ Orat tuei sedda iate pitungataka', samba kudduat gugurukatnia ai ka isit ka baga. Ka matat baliu gugurukat nenda leuet, ka sangamberi arigit iripnia, tusurat tularat paloinatloinat korma, sangaloina ka isit sene' samba sangaloina ka isit sedda.

²⁷ Ka rubeiat ka kaiaman laibokat ka baga ai leuet matat baliu gugurukat, kirekinangan barania ka matat baliu gugurukat teret matat baliu gugurukat ka rubeiat ka kaiaman: sangotu ngaeto.

²⁸ Lepa ambitnangan aku ka laibokat ka baga sienungi matat baliu gugurukat ka kaiaman samba kirekinangan matat baliu nenda, kirekatnia makere le' ka bagei.

²⁹ Sangamberi bili' pujagoatnia, sangamberi arigit iripnia samba kudduat gugurukatnia, kirekatnia makere le ka bagei. Sigoilik matat baliu gugurukat nenda samba kudduat gugurukatnia ai jandela, nantat matat baliu gugurukat nenda lima pulu ngaeto samba lionia rua pulu lima ngaeto.

³⁰ Sangalionia ai kudduat gugurukat, nantania rua pulu lima ngaeto samba lionia lima ngaeto.

³¹ Kudduat gugurukatnia iate ka silat laibokat ka uja samba ka sangamberi arigit iripnia tusurat tularat paloinatloinat korma samba oratnia ka pata ai balungataka'.

³² Lepa ambitnangan aku ka isit sikalaut laibokat ka baga samba kirekinangan matat baliu gugurukat sedda samba kirekatnia makere le ka bagei.

³³ Sangamberi bili' pujagoatnia, sangamberi arigit iripnia samba kudduat gugurukatnia, kirekatnia makere le ka bagei. Sigoilik matat baliu gugurukat nenda samba kudduat gugurukatnia ai jandela, nantat matat baliu gugurukat nenda lima pulu ngaeto samba lionia rua pulu lima ngaeto.

³⁴ Kudduat gugurukatnia iate ka silat laibokat ka uja samba sangamberi arigit iripnia tusurat tularat paloinatloinat korma, saigit sene samba saigit sedda, samba oratnia ka pata ai balungataka'.

³⁵ Lepa geti ambitnangan aku ka matat baliu gugurukat ka bare samba kirekinangan. Kirekatnia makere le' ka bagei.

³⁶ Sangamberi bili' pujagoatnia, sangamberi arigit iripnia samba kudduat gugurukatnia, kirakatnia makere le ka bagei. Sangaliot matat baliu gugurukat nenda samba kudduat gugurukatnia ai jandela, nantat matat baliu gugurukat nenda lima pulu ngaeto samba lionia rua pulu lima ngaeto.

³⁷ Kudduat gugurukatnia iate ka silat laibokat ka uja samba sangamberi arigit iripnia tusurat tularat paloinatloinat korma, saigit sene samba saigit sedda, samba oratnia ka pata ai balungataka'.

³⁸ Ai leuet sara bili', matat baliunia ka kudduat gugurukat samba sedda sirimanua masibui buluakenen sirarak.

³⁹ Kabagat kudduat gugurukat nenda ai rua meja ka isit sene samba rua meja ka isit sedda, kudduat pasija'jakat buluakenen rarangen, buluakenen pasiposat jo samba pasitebui puseleat.

⁴⁰ Ka isit kai katciu kudduat gugurukat, ka isit ka uja, ai rua meja, samba kabebet ka isit kattoet kudduat gugurukat nenda ai leuet rua meja.

⁴¹ Oto ka matat baliu gugurukat nenda ai epat meja saigit sene samba epat saigit sedda, sangamberinia sedda balu meja addeat kudduat pasija'jakat buluakenen.

⁴² Ai leuet minca epat meja kudduat buluakenen rarangen, sigalai sibara ka bukku sipae'. Nantania sara sitengaeto, lionia sara sitenga eto samba buaknia sangaeto. Sedda tugalakake pugalai pasija'jat buluakenen rarangen samba buluakenen ja'jaket.

⁴³ Sangaliot bagat bili' nenda tupattaake panangkut nantania sangatakep kabei, samba ka uddut sangamberi meja nenda tugalakake akkula buluakenen.

⁴⁴ Lepa ambitnangan aku ka laibokat ka baga, bulatnia, sedda ai rua bili', iate sara ke be'bet matat baliu gugurukat ka bare' samba matania simattai ka kaiaman, sara minca ka be'bet matat baliu gugurukat ka kaiaman samba matania simattai ka bare'.

⁴⁵ Kuanangan katubukku: “Bili' nene, matania simattai ka kaiaman, iate rubeiatda tai imam sipugagalai ka Uma Sipunenan,,

⁴⁶ samba bili' matania simattai ka bare', iate rubeiatda tai imam sipugagalai ka kudduat pasibuluat; sia nene iate muntogat Sadok samba sarat rubeiat nene sibara ka muntogat Lewi momoi masipalegre tubu kai Tuhan addeat masigalaiake panindougat.”

⁴⁷ Lepa kirekinangan laibokat ka baga: siepat tukdak, nantania sangotu ngaeto samba lionia sangotu ngaeto; kudduat pasibuluat ai kamatat Uma Sipunenan.

Uma Sipunenan sibau

⁴⁸ Lepa ambitnangan aku ka kudduat Uma Sipunenan samba kirekinangan sangamberi arigit iripnia: keppunia lima ngaeto saigit sene' samba lima ngaeto saigit sedda; liot matat baliu nenda pulu epat ngaeto samba senen rupit be'benia telu ngaeto.

⁴⁹ Nantat kudduat Uma Sipunenan nenda iate rua pulu ngaeto samba lionia pulu rua ngaeto. Sirimanua momoi ratusakai sedda masienungi orat sipulu taka' samba ka be'bet ka rua arigit irip nenda ai rua arigi, sara saigit sene samba sara saigit sedda.