Jehz. 4 - BUKO SIPUNENAN

Pasikat pasialougat laggai Jerusalem

¹ “Ekeu, togat sirimanua, ala sara bukku bata, galakake kamatam samba tularaninungan sara laggai, iate Jerusalem.

² Tularani laggai nenda kele ainia kabagat pasialougat: rioake sara irip bukku pasialougat, tabbuinungan polak sibailiu pasialougat, galakakenungan pusapougatda saladdu samba pagalaknungan pakeiet pasitukklu sigoilik laggai nenda.

³ Lepa alanungan sangate'te laba' samba rioake nenda katalagamui pasamba laggai nenda ibailiunia rupi laba', iageti ipoakenungan matam ka ipot laggai nenda, bailiu laggai nenda ai kabagat pasialougat, samba ekeu te masialounia. Nene te sibailiu pasikat ka muntogat Israel.

⁴ Perepake ekeu ka isit kaikatciunu samba Kuorakake te ukuman Israel katubum. Kipa burunia nuperep kisedda, ka burut nenda te nubairat ukumanda.

⁵ Kise te siteuakenenKu kekeu: Piga burunia ukuman muntogat Israel, kiseda igit gogoinia nubairat ukumanda, iate telungotu sibapulu ngagogoi.

⁶ Ke atukapplungan nulepaake gogoi nene, perepake ekeu minca karuangamincania, tapoi ka isit kaikattoetnu. Bairat le ukuman muntogat Jehuda epat pulu ngagogoi burunia; Kuteuake le kekeu sangagogoi kabagat sangarura.

⁷ Ipoake matam ka pasialougat Jerusalem samba teimutake takepnu katubunia samba pupatuptup nusaggangi laggai nenda.

⁸ Itco, Kuappra te ekeu pasamba tali, bailiu tamomoi nusoksokake tubum ka isit ka sara samba ka isit ka bagei teret nukappluake tetere pasialougat nenda.

⁹ Iageti minca alanungan gandum, jelai, kacang simabonan sabeu, kacang simabonan sigoiso, jawan samba sekoi samba kaunungannia kabagat sara pariok samba seunungannia nenda sibailiu komennu. Nenda komennu ka burut nuperep ka bebenu, iate telungotu sibapulu ngagogoi.

¹⁰ Komennu tuteteuake le kilonia, iate dua pulu syikal kabagat sangagogoi; kom nenda katetere siteuakenen.

¹¹ Beringan leu lo'nu tuteteuake le, seperenam hin iginia; lo nenda katetere siteuakenen.

¹² Kom roti nenda kele nukom roti jelai simamuine samba buita nurarak ka uddut simalolit sirimanua simagarak kamatatda.”

¹³ Panibonangan minca si Tuhan: “Kuriribbaiake te tai Israel katalagatda tai bangsa samba kisedda te rakom sedda rotitda kasitsitakenen.”

¹⁴ Oto alegikungannia: “Enaa, Tuhan Taikamanua, bulatnia te, ta'pei atukasitsitake aku samba barania sibau tubu peile aku teret kineiget tapei akukom simabubutek ele legei sikoman tarimeu samasabbak; samba leu tapei atuguru' ka ngungungku akkula simasisiop nene.”

¹⁵ Lepa kuanangan katubukku: “Itco, ke kisedda Kuobaake le nupakei tanai jaui sailit simalolit sirimanua samba rarak rotim ka uddutnia.”

¹⁶ Lepa nenda panibonangan katubukku: “Ale, togat sirimanua, bulatnia te, Kusubuake le geti panarengan komen ka Jerusalem. Rakokom te roti siteuakenen kilonia kabagat pukaranan baga; samba leu mulo le sia kabagat kirekat sitetreakenen kabagat patuat simasaigo.

¹⁷ Bule imagulai komenda samba lo samba sangamberitda ibailiu masaigo, bailiu masuburangan kabagat ukumanda.