Jehz. 39 - BUKO SIPUNENAN

¹ Ekeu, togat sirimanua, pusibalat le masisaggangi Gog samba kua: Kasene le' tiboiet Tuhan Taikamanua: Itco, ibailiu le geti Aku saggaknu, ale Gog rimata sabeu laggai Mesekh samba Tubal.

² Kutitiktik samba Kupalulu le' ekeu samba masiambit ekeu baram bulat ka bare' samba ambitkungan ekeu ka sangamberi leleu Israel.

³ Kubo'bo le geti kabei sikatsiunu bailiu bele rourounu samba masigalai ibele sangamberi silogui kakabei sikattoetnu.

⁴ Ka uddut sangamberi leleu Israel mutagguilu le ekeu pasamba sangamberi saladdum, tai bangsa sipaalei ekeu, samba Kukau le ekeu katubut senengamata pauma' uma' simasakbak samba katubut sangamberi tarimeu simasakbak ibailiu komennia.

⁵ Mutagguil le geti ekeu ka su'su', aipoi Aku le amasikua, kise te' ngangan Tuhan Taikamanua.

⁶ Kubabaraake le obengan ka Magog samba ka sangamberi sirimanua sikukuddu ka kupkumen puriringan laggai ka kolou puririmanua, samba agairangan geti nia, Aku te Tuhan.

⁷ Kupakoinong le oningKu sipunenan ka talagat paamianKu Israel. Ta'an Kuoobaake oningKu sipunenan tukasitsitnake, bailiu sangamberi bangsa masiagai geti, Aku te Tuhan, bulat Sipunenan ka Israel.

⁸ Bulatnia, momoi samba muaaili le', iate gogoi sitiboakenenKu.

⁹ Sikukuddu ka sangamberi laggai Israel bela le' geti samba masiobekake obengan pasamba masilabo sangamberi panarengan pamatei Gog, iate korabbi sigoiso samba sabeu, rourou samba silogui, tutura' liliso samba simuine bakkat, samba laborangannia ujunia pitungaruara.

¹⁰ Ta'araala loina sibara ka bakkat se'se' ele masibekka loina purusu ka se'se', Aipoi raobekngake le geti obengan nenda pasamba panarengan pamatei nenda. Raparauraugi le sangamberi sirimanua sipararaurau samba masipagaugaubi sangamberi sirimanua sipagagaugaubi sia, kise te ngangan Tuhan Taikamanua.

¹¹ Ia geti ka gogoi nenda, Kukau le geti katubut Gog sara kudduat, kaipa turateiakenia geti ka Israel, iate ka peleu Putalipokat ka isit sikalaut ka koat samba ratei nenda masikekre sangamberi sirimanua siputatalipo'. Sedda te' geti turateiake si Gog pasamba sangamberi siberikabaga sipasitututnia samba kudduat nenda tuoniake Peleu Gog.

¹² Rarateiake sia samuntogat Israel ujunia pitungalaggo, bule rapalina polak nenda.

¹³ Sangamberi silaggaiji laggai mei masirateiakenia samba pagalaiat nenda masibailiuake tuabeuake sia ka gogoi Kupatoila pulatsananKu, kise te' ngangan Tuhan Taikamanua.

¹⁴ Piga pa' sirimanua tukokoiake simariuriu masigejengi sangalio polak nenda masirateiake sangamberi sirimanua simasasaragai ka polak, kabagat pinaatu masipalinania. Lepa aitukapplu si pitungalaggo nenda, pulelekrangan polak nenda.

¹⁵ Ke' bai ragejenginia samba sara sirimanua masisese sangate'te' tolat sirimanua, Iageti bui taigalakake bukku ka be'benia sibailiu toggaiat teret rarateiakenia sipasiraratei ka Peleu Gog.

¹⁶ Samba ai leuet onin laggai Hamona, kalulut nenda palinarangan polak nenda.

¹⁷ Ekeu, togat sirimanua, kasene le tiboiet Tuhan Taikamanua: Kua ka senengamata pauma'uma' samba ka senengamata tarimeu simasakbak: Ruruake kam samba konan kam, paruru kam baramui ka senen matat rusa ka pukoman buluakenen sibaraakenenKu kakam, iate sara pukoman buluakenen sabeu ka uddut leleu Israel, nukokom geti akkula samba nulolo geti kam logau.

¹⁸ Akkulara tai saladdu simagege nukokom geti kam samba logaura sautet polak nulolo geti kam, sia sangamberitda kele biribiri simanteu, togat biribiri, kambing simanteu samba jaui simanteu, samba tarimeu simo'moakenen sibara ka Basan.

¹⁹ Nukokom geti kam tabe pat ektek samba mulo logau pat puinengnangan ekeu ka pukoman buluakenen sibaraakenenKu kekeu.

²⁰ Bailiunangan geti maengtek ekeu ka pukomanKu pasamba komen, kuro samba sipasiaambitnia, saladdu simagege samba sangamberi sirimanua sipasasaggak, kise te tiboiet Tuhan Taikamanua.

²¹ Kugalai le geti geget pulatsananKu katubut sangamberi bangsa samba sia sangamberitda masiitco geti ukuman sibeleakenKu samba masiitco geti kabeiKu masibo'bo' sia.

²² Raagai geti tai Israel, Aku te' Tuhan, Taikamanuanra, barania gogoi nenda samba ka sangantania.

²³ Raagai geti sangamberi bangsa, kalulut puseselenia muntogat Israel bui tamei sia kabagat katuribbaiat, aipoi ta'amatopit sia katubukKu, Kulipputake le' pumataatKu katubutda. Kukakau le sia kakabeira tai saggakra samba sia sangamberitda matei mutagguilu kalulut lanjau.

²⁴ Kugalaiake le katubutda siripot pulololitda samba pinasabaura.

²⁵ Kalulut nenda kasene le tiboiet Tuhan Taikamanua: Kineiget, Kutotoiliake geti puririmanuan Jakob, masipununtuki baga sangamberi muntogat Israel samba bara tutut bagaKu masiparon oningKu sipunenan.

²⁶ Rakalipogi geti lolitda samba sangamberi taimatopitda, sigalaiakenenda katubukKu, ke'bai amukuddungan sia minca ka polakra kabagat kolou puririmanua samba ta'tuge'ge sia kalulut aponia pa',

²⁷ samba ke' bai Akuambitnan sia minca baratda ka talagat sangamberi bangsa samba masiruruake sia baratda ka polakda taisaggakda samba kateteret Akupatoila pusisipunenanKu katubutda ka matat sangamberi bangsa simigi.

²⁸ Raagei le geti, Aku te' Tuhan, Taikamanuanda, sipasiambit sia kabagat katuribbaiat ka talagat sangamberi bangsa samba masiruruake sia minca ka polakda samba ta'Kuobaake berisara sirimanua katalagatda mukuddu sedda.

²⁹ T'aan Kupalilipput minca pumataatKu katubutda, ke'bai Kuuruake KetsatKu katubut muntogat Israel, kise te tiboiet Tuhan Taikamanua.”