Jehz. 38 - BUKO SIPUNENAN

Tiboiet Tuhan pagalaiat rimata Gog ka polak Magog

¹ Oi tiboiet Tuhan katubukku:

² “Ale togat sirimanua, ipoake le' matam katubut Gog ka polak Magog, iate rimata siabeu laggai Mesekh samba Tubal samba pusibalat masisaggangi sia.

³ Samba kua: Kasene le' tiboiet Tuhan Taikamanua: Itco, ibailiu le' geti Aku saggaknu, ale Gog rimata siabeu laggai Mesekh samba Tubal.

⁴ Kutiktik le' geti ekeu samba kaukungan ratsat ka baklam samba ambikungan ekeu bela pasamba sangamberi saladdum, iate saladdu sipukukuro', sangamberitda muleppei simakapplu. Sara parurukat sirimanua simigi pasamba korabbi sabeu samba sigoiso samba sangamberitda masiukkaake lanjau.

⁵ Tai Persia, Etiopia, samba Put masipaalei sia samba sangamberitda sibara korabbi samba tutu pasaggak;

⁶ tai Gomer pasamba sangamberi saladdunia, Bet-Togarma sibara ka bare' pasamba saladdunia, maigi bangsa sipaalei ekeu.

⁷ Nupagaja' samba Nupatarek tubum pasamba sangamberi mungkuat sirimanua sitaddeake tubunia kekeu samba kau ibailiu ekeu sisakkeri sia.

⁸ Ka gogoi sibabara bara le geti kekeu parenta, ka gogoi sibabara oi ekeu ka sara laggai sigalai minca, kalepekat atumasusu kalulut pasaggangan. Nuailiake le' sara bangsa sitaddeakenen sibara katalagat sirimanua simigi ka uddut leleu Israel, amaburuan ibailiu siragatat. Bangsa nene atuambitnan bela ka talagat sangamberi bangsa samba sangamberitda mukuddu kabagat erut puririmanua.

⁹ Tuottou le' ekeu kele rusa talabari samba moi kele tanai rusa isakkeri sangamberi polak, ekeu pasamba sangamberi saladdum samba maigi bangsa sipaalei ekeu.

¹⁰ Kasene le' tiboiet Tuhan Taikamanua: Ka gogoi nenda bara ka paatuatnu samba galainungan pinatu sikatai.

¹¹ Kuanungan: Moi le geti Aku masisaggangi polak, laggai sitairip samba masiailiake sangamberi sirimanua sipuririmanua simasanang samba sikukuddu simakolou puririmanua. Sangamberitda mukuddu sita'irip ele sita'lelekre samba sita'matabbaliu gugurukat.

¹² Mupaatuat le' ekeu paraurau, masipaalaki samba masitotoiake kabeinu ka sangamberi siragatat sikudduijiet minca samba masisaggangi paamianKu sipatadde sibara ka sangamberi bangsa. Aian tarimeura samba bibilet pukayoatda samba mukuddu le sia ka saisai polak.

¹³ Laggai Syeba samba Dedan pasamba sangamberi sipananaki bibilet, laggai Tarsis pasamba sipasisasakiake manibo le geti katubum: Taleu masiraurau samba masiruruake sipatatadde katubum le nuoi, masipaalaki samba masiambit perak samba mas, masiambit tarimeu samba bibilet pukayoat samba masigalaiake pasirauraugat bulat sabeu?

¹⁴ Lulut nenda, pusibalat le', ale togat sirimanua samba kua katubut Gog: Kasene le' tiboiet Tuhan Taikamanua: Kateteret paamianKu Israel ai sia mukuddu kabagat kolou puririmanua, kateteret nenda te nuoi,

¹⁵ samba nuoi baram ka kudduatnu bulat kabare', ekeu pasamba maigi bangsa sipaalei ekeu. Sia sangamberitda sipukukuro', sara mungkuat sabeu samba saladdu simaron.

¹⁶ Tusuru le' Ekeu masisaggangi paamianKu Israel kele tanai rusa sisakkeri sanganberi polak. Ka gogoi sibabara muaili le pagalaiat nenda. Kuambit le' geti ekeu masisaggangi polakKu, bule sangamberi bangsa masiagai Aku, kateteret Akupakoinong pusisipunenanKu katubum ka matatda, ale Gog.

¹⁷ Kasene le' tiboiet Tuhan Taikamanua: Ta pa pagalaiat ekeu le Akupanibo ka gogoi siburu ka paneiteiatda sapaguguletKu, iate tai nabi Israel, sipururura musibalat kateteret nenda. Kuambi le geti ekeu masisaggangi paamianKu.

¹⁸ Kateteret nenda, kateteret aioi si Gog masisaggangi polak Israel, kise te' tiboiet Tuhan Taikamanua, bebela te oloi goluKu. Ka goluKu,

¹⁹ kabagat tu'tut bagaKu samba ka obengan goluKu maninibo geti Aku: Ka gogoi nenda bulat muaaili te'ngeungeu polak simaron ka polak Israel.

²⁰ Paibaiba ka koat, pauma'uma' ka tei manua, patarimeutarimeu leleu, senengamata tarimeu sipugugurui ka polak samba sangamberi sirimanua ka polak geti mugeret tubu masiitco pumataatKu. Mabukkat le sangamberi leleu, samba maibu le geti sangamberi igrit leleu samba senen irip mabukkat le kapolak.

²¹ Kusogai le' geti senengamata katuge'ge'kat katubut Gog, kise te tiboiet Tuhan Taikamanua, bailiu lanjau sara sirimanua oraknangan sabagei.

²² Kuukum le' geti nia pasamba besi' simasappo samba logau simapipili. Kubebeleake le' geti urat simatirit, urat es, obengan samba urat balerang ka utenia samba ka ute'ra saladdunia samba kautet sangamberi bangsa sipaalei sia.

²³ Kupakokoinong le' geti puaabeuKu samba pusisipunenanKu samba masipatoila tubu ka matat sangamberi bangsa simigi, agairanganNia, Aku iate Tuhan.