Jehz. 37 - BUKO SIPUNENAN

Katusuruat Israel

¹ Lepa salukinangan aku geget Tuhan samba ambitnangan aku ka uja kapaneiteiat KetsatNia samba uddetnakenangan aku ka talagat peleu, samba peleu nene sun le sangamberi tolat.

² Ambitnangan aku masibokko masiitco sangamberi tolat nenda samba bulatnia, bulat maigi le simasasaragai ka peleu nenda, itco, sangamberi tolat nenda bulat magarak.

³ Lepa kuananganNia ka tubukku: “Ale togat sirimanua, momoi leu turimanuaake minca sangamberi tolat nene?” Alegikungannia: “Ale Tuhan Taikamanua, Ekeu le' siagainia!”

⁴ Ia geti tiboietNia katubukku: “Pusibalat le' pagalaiat sangamberi tolat nene samba kua le' katubunia: Ale sangamberi tolat simagarak, arepmake tiboiet Tuhan!

⁵ Kasene le' tiboiet Tuhan Taikamanua katubut sangamberi tolat nene: Kuake le enga purimanuaiat katubumui, nupurimanua kam minca.

⁶ Kuake le' sangamberi ungat ka tubumui samba masitu'tu'ake akkula ka tubumui. Kusabbungi le' geti ekeu kulit samba masiake katubumui enga purimanuaiat, bule nupurimanua kam minca. Samba agaimuian getinia, Aku te Tuhan.”

⁷ Lepa pusibalatkungan kele siparentaakenen katubukku, kele ailepa akupusibalat, maarepnangan nganga, bulat, sara nau korou tolat, samba sangamberi tolat nenda paaili sara ka sisara.

⁸ Kateteret ai kupuleleleknia, itco, sangamberi ungat ai samba akkula mutu'tu katubunia, lepa sabbunginangannia kulit, tapoi ta' pei amuenga sia.

⁹ TiboietNia katubukku: “Pusibalat le ka enga nenda, pusibalat le', ale togat sirimanua, samba kua le ka enga purimanuaiat nenda: Kasene le' tiboiet Tuhan Taikamanua: Ale enga purimanuaiat, konan le' ka epat matat rusa, samba puboroi le' katubut sangamberi sirimanua simateiakenen nene, bule rapurimanua minca.”

¹⁰ Lepa pusibalatkungan kele siparentaakenenNia katubukku. Enga purimanuaiat nenda tuguru' katubutda, pat purimanuandangan minca. Paperarangan rerenia, sara saladdu simakope beunan.

¹¹ TiboietNia katubukku: “Ale togat sirimanua, sangamberi tolat nene iate sangamberi muntogat Israel. Bulat, sia le' amasikua: Sangamberi tolatmai amagarakngan, pukakaronanmai amapepengan, samba amalimaian kai.

¹² Kalulut nenda, pusibalat le' samba kua katubutda: Kasene le tiboiet Tuhan Taikamanua: Bulat, Akunga'ngaakean sangamberi ratei samba Akusuruakean ekeu, ale paamianKu, kabagat ratei, samba Kuambit le kam ka polak Israel.

¹³ Nuagai le' geti kam, Aku te' Tuhan, kateteret Akunga'ngaake sangamberi ratei samba Aku suruake kam, ale paamianKu Israel.

¹⁴ Kuake le' geti KetsatKu katubum, bailiu purimanuanungan minca. Kuobaake le' geti nupukuddu kam ka polakmui. Agaimuian getinia, Aku, Tuhan, sipasikukua samba sipasigagalainia, kise te tiboiet Tuhan.”

Tusaraake minca purimataat Israel samba Jehuda

¹⁵ Lepa geti oi tiboiet Tuhan katubukku:

¹⁶ “Ale ekeu togat sirimanua, ala' le sangatippu lapri samba surat ka uddutnia: Addeat Jehuda samba sangamberi Israel sipusasara katubunia. Lepa geti ala' le' lapri bagei samba surat ka uddutnia: Laprit Josep, laprit Efraim samba sangamberi muntogat Israel sipusasara ka tubunia.

¹⁷ Patadde le' karuania ibailiunia sara lapri, samba karuania ibailiunia sara ka kakabeinu.

¹⁸ Oto ke' parere bai saalei sabangsam katubum: Ta' pa' matarek ekeu masipaagai ka tubumai, aponia katukoloubat nene,

¹⁹ kua le' katubutda: Kasene le' tiboiet Tuhan Taikamanua: Kuala le' laprit Josep, ka kabei Efraim, pasamba sangamberi suku Israel sipusasara ka tubunia samba masilakkeake ka laprit Jehuda samba Kubailiuake le' geti sia sara lapri, samba bailiunangan sia sara kakabeiKu.

²⁰ Ainuukkake sangamberi lapri sinuratnu ka kabeinu ka matatda nenda,

²¹ kua le' katubunia: Kasene le' tiboiet Tuhan Taikamanua: Bulat, Kuala le' tai Israel ka talagat sangamberi bangsa, kaipa raei. Kururu'ake le' geti sia ka sangamberi matat rusa samba Kuambit le sia ka polakra.

²² Kubabailiuake le' geti sia sara bangsa ka polakra, ka uddut sangamberi leleu Israel, sara rimata masiparenta sia sangamberitda, ta'an ibabailiu sia minca rua bangsa samba ta'an tuparurubei sia minca ibailiu rua purimataat.

²³ Ta'an rapalolit tubutda pasamba tularat sabulunganda samba sabulunganda kasitsitnakenen ele sangamberi pasisasabaura. Tapoi Kubebelaake le' geti sia ka sangamberi pinasabaura sibaraake jotda, samba masipalina sia, pat bailiunangan sia paamianKu samba Aku ibailiu le' geti Taikamanuania.

²⁴ Oto paguguletKu si David ibailiu le geti rimatania, ka sangamberitda bara le sara sipasijago. Murimanua le' geti sia siripokat sangamberi enungan galaiakenenKu samba masigalaiake sangamberi siteuakenenKu kabagat topit.

²⁵ Mukuddu le' geti sia ka polak sikauKu ka paguguletKu si Jakob, kaipa arakuddu taikebbukatda, bulatnia, sia, tatogatda ele sapunuteteura mukuddu le geti sedda teret buruburu. PaguguletKu si David ibailiu le rimatatda teret buruburu.

²⁶ Kubabaraake le' geti palelengan paabanan pasamba sia, samba nenda ibailiu le' geti palelengan simatom pasamba sia. Kupanukani le' geti sia, Kugalai le' ramaigi samba Kukau le kudduat sipunenanKu ka takagatda teret buruburu.

²⁷ Babara te geti pukudduananKu katubutda samba Aku geti ibailiu le' Taikamanuanda samba sia ibailiu le' geti paamianKu.

²⁸ Ia geti sangamberi bangsa agairangannia, Aku, Tuhan, masipuneni Israel, kateteret kudduat sipunenanKu ai ka talagatda teret buruburu.”