Jehz. 36 - BUKO SIPUNENAN

Pasibaugat Israel

¹ “Ale ekeu, togat sirimanua, pusibalaat le' pagalaiat sangamberi leleu Israel samba kua le': Ale sangamberi leleu Israel, arepmaka tiboiet Tuhan!

² Kasene le' tiboiet Tuhan Taikamanua: Kalulut saggak nenda masitiboi pagalaiat kam: Sura'! Sangamberi tinambu siburu' aibailiuan bakkatta.

³ Kalulut nenda pusibalat le' samba kua: Kasene le' tiboiet Tuhan Taikamanua: kalulut sibulatnia saggak sigoilik ekeu ibailiuake ekeu simatangeu samba masikiddi ekeu, bule ibailiu ekeu bakkat sangamberi bangsa sipulelegei, samba kalulut ibailiu le ekeu tiboiet sirimanua samba mareirei ratiboinia.

⁴ Kalulut nenda, ale sangamberi leleu Israel, arepmake tiboiet Tuhan Taikamanua katubut sangamberi leleu samba sangamberi tinambu, sangamberi polou bagat oinan samba sangamberi peleu, katubut sangamberi siragatat simatangeu samba sangamberi kupkumen laggai sikaddiuakenen, raurauget samba geigeiet sangamberi bangsa sipulelegei ka bebenia.

⁵ Kalulut nenda kasene le' tiboiet Tuhan Taikamanua: Maninibo le' Aku ka obengan tu'tu bagaKu masisaggangi sangamberi bangsa sipulelegei samba masisaggangi sangaliot Edom, siteuake polakKu ibailiu bakkatnia sialei angkat baga samba gegegei, pat polakKu nenda bakkatinangannia samba sapru turaurau.

⁶ Pusibalat le pagalaiat polak Israel samba kua le ka sangamberi leleu samba kasangamberi tinambu, ka sangamberi polou bagat oinan, samba sangamberi peleu: Kasene le' tiboiet Tuhan Taikamanua: Bulatnia, maninibo le' Aku ka golut tutut bagaKu, kalulut anubairatnan kam puailaat sibaraakenen sangamberi bangsa.

⁷ Kasene le' tiboiet Tuhan Taikamanua: Musuppa le Aku, sangamberi bangsa ka be'be'nu bulat rababairat le' puailaatda.

⁸ Iageti kam, sangamberi leleu Israel, mututu'tu le' geti minca samba akenangan geti bua addeat ka paamianKu Israel, aipoi totoili le geti sia simaruei.

⁹ Maeru le geti minca paatuatKu samba Kumamattai geti kam samba tugalai le kam samba leu tukarapmake.

¹⁰ Kugalai le' maigi sirimanua ka tubum, iate sangamberi muntogat Israel. Sangamberi laggai nukudduiji le' kam minca samba sangamberi siragatat tugalai le' minca.

¹¹ Kugalai le' geti maigi sirimanua samba tarimeu ka tubum. Ituppai le igitda samba mupunuteteu. Kugalai le' geti nukudduji kam minca kele siboiki samba mugalai simaeru bele pei siburu. Agaimuiannia Aku te' Tuhan.

¹² Kugalai le' geti ipagejek sirimanua katubum iate paamianKu Israel, rakudduiji le' geti ekeu samba ekeu ibailiu le' geti bakkat ikemenda samba ta'an Nususubuake sia.

¹³ Kasene le' tiboiet Tuhan Taikamanua: Kalulut rakua le' sirimanua pagalaiat ekeu: Nukom le' sirimanua samba nusubuake le bangsam,

¹⁴ kalulut nenda ta'an nukokom minca sirimanua samba ta'aan nususubuake minca bangsam, kise te' tiboiet Tuhan Taikamanua.

¹⁵ Ta'an Kuobaake ratiboi sirimanua puailaat sibaraakenen sangamberi bangsa ke tubum samba ta'an nubabairat minca paasakat sangamberi bangsa samba ta'an nususubuake minca bangsam. Kise te' tiboiet Tuhan Taikamanua.”

¹⁶ Ia geti oi tiboiet Tuhan katubukku:

¹⁷ “Ale togat sirimanua, kateteret arakuddu samuntogat Israel ka polakra, palolitrangannia pasamba galai tubutra. Galai tubutra makere kele lolit komak suat tubu ka mataKu.

¹⁸ Ia geti Kubelaake le' goluKu katubutda kalulut logau siuruakenenda ka polak nenda, beringan polak nenda rapalolit le' pasamba sabulunganda.

¹⁹ Kupasasaragai le' sia ka talagat sangamberi bangsa, bailiunangan ramasaragai ka sangamberi laggai. Kuukum le sia siripot paraboatda.

²⁰ Kaipa le'raoi ka talagat sangamberi bangsa, rapalolit le oningKu sipunenan, ka pasailukat sirimanua. Rakua sia nene paamian Tuhan, tapoi bui tabela le' sia ka polakNia.

²¹ Mabesi le paatuatKu kalulut oningKu sipunenan sipalolit muntogat Israel ka talagat sangamberi bangsa, kabaraiatda.

²² Kua le ka muntogat Israel: Kasenen le' tiboiet Tuhan Taikamanua: Ta' kalulut kam Akugalaiake nene, ale muntogat Israel, tapoi kelulut oningku sipunenan sipalolitmui ka talagat sangamberi bangsa kabaraiatmui.

²³ Kupuneni le' geti oningKu sabeu sipalolit ka talagat sangamberi bangsa, samba sipalolitmui ka talagatda. Agairangannia geti sangamberi bangsa, Aku te' Tuhan. Kise te' tiboiet Tuhan Taikamanua, kaipa geti iaili teterenia Kupakoinong pusisipunenanKu katubum kamatat sangamberi bangsa.

²⁴ Kuala le' geti kam ka talagat sangamberi bangsa samba Kururuake kam ka sangaliot laggai samba Kuambit le' geti kam minca ka polakmui.

²⁵ Kuuruake le' geti katubumui oinan simagirau, sipalina kam geti, ka sangamberi pulololitmui samba Kupalilina le' geti kam ka sangamberi sabulunganmui.

²⁶ Kuake le' geti katubum paatuat sibau, ketsat sibau kabagat paatuatnu samba Kuareuake le' geti katubum kelat paatuat samba Kuake le' katubum patuat pureretdet.

²⁷ Kuake le' geti KetsatKu ipukuddu kabagat paatuatnu. Kugalai le' geti nupurimanua kam siripot siteuakenenKu, masiukkaake samba masigalaiake sangamberi surukatKu.

²⁸ Mukuddu le' geti kam kabagat laggai sikauKu ka tai kebbukatmui. Bailiunangan kam geti paamianKu samba Aku ibailiu geti Taikamanuamui.

²⁹ Kubebelaake le' ekeu ka sangamberi jo pulololit. Kututu'tuake le' geti gandum samba igiakekungannia, Ta'an Kubabaraake geti minca pulajeat katubumui.

³⁰ Kupaiigi leu buat kajum samba buat monem, bule ta'an nubabairat lolit pulajeat ka talagat sangamberi bangsa.

³¹ Nurerepdep le' geti kam paroboatmui sikatai samba sangamberi sigalaimui sitaimeru. Maimun geti bagam masiitco tubum kelulut sangamberi puseleat samba sangamberi galai tubum sikatai.

³² Ta' kalulut kam Akugalaiake nene, kise te tiboiet Tuhan Taikamanua, agai le' nenda. Kau numaila samba eddangannia tupakaila ekeu kalulut paraboatnu, ale muntogat Israel.

³³ Kasene le' tiboiet Tuhan Taikamanua: Ka gogoi nene Kupalina le' ekeu ka sangamberi puseleatnu. Kugalai le' sangamberi laggai nukudduiji minca samba sangamberi siragatatnia tugalai le' minca.

³⁴ Polak sioreakenen simagarak nene tugagalai le' geti minca, bule ta'an mariruriu imagarak ka matat sangamberi sirimanua situsasabau ka matam.

³⁵ Bailoknia kuarangan: Polak sioreakenen simagarak nene ibailiu le' kele mone Eden samba laggai simararagat, saingere samba tata', kineiget tukudduiji samba ibailiu kudduat simaron.

³⁶ Sangamberi bangsa sipukukuddu, sibabara ka be'bemui raagai le geti, Aku te' Tuhan, sipasigagalai minca simakakatai samba sipasiurep minca polak simagarak. Aku, Tuhan, sipasikukua samba masigagalai.

³⁷ Kasene le' tiboiet Tuhan Taikamanua: Kabagat nene leu Kukiddi le', bule muntogat Israel masitiddou katubukKu aponia Kugagalaiake katubutda, iate masituppai igitda kele mungkuat sirimanua simigi.

³⁸ Kele sangamberi biribiri panguruatakenen sipunenan, samba makere le' sangamberi biribiri Jerusalem kateteret punennia, kisedda te sangamberi laggai simararagat sun le mungkuat sirimanua simigi. Kisedda te' raagainia, Aku te' Tuhan.”