Jehz. 35 - BUKO SIPUNENAN

Golut Tuhan ka leleu Seir

¹ Iaget oi tiboiet Tuhan katubukku:

² “Ale togat sirimanua, ipoake matam ka leleu Seir, pupatuptup masisagganginia

³ samba kua katubunia: Kise te tiboiet Tuhan Taikamanua: Ibailiu le geti Aku saggaknu, ale leleu Seir samba Kutotoiake te kabeiKu masisaggangi ekeu samba masibailiuake ekeu masubu samba leu simatangeu.

⁴ Kubabailiuake te sangamberi laggai karagatat samba ekeu ibailiu le geti simatangeu, samba againungan geti, Aku te Tuhan.

⁵ Kalulut kabagat patuatnu putaiooba sipurereddenan samba nuobaake tai Israel ibailiu komen lanjau ka gogoira sitaimaeru, babara teterenia pangampulat pasiukuman,

⁶ kalulut nenda, kalulut Aku sipuiririmanua, kise te tiboiet Tuhan Taikamanua. Kubailiuake le geti ekeu logau samba ikukru le geti ekeu logau. Kalulut masele ekeu anupiliake logau, oto ikukru le geti ekeu logau.

⁷ Kubailiuake le geti imasubu leleu Seir samba simatangeu samba masisappruake sangamberi sirimanua sipugegejek.

⁸ Kusunake le geti leleunia sangamberi sirimanua simateiakenen. Ka leleunu, ka su'sunu samba sangamberi bagat oinannu mutugguilu le geti sangamberi sirimanua simamatei ka lanjau.

⁹ Kubailiuake le ekeu geti simatangeu teret buruburu samba laggainu taan tukukudduiji. Samba againungan getinia, Aku te Tuhan.

¹⁰ Kalulut nenda kuanungan: Karua bangsa nenda samba karua laggai nenda ibailiu le geti bakkatku samba tababakkati le, bulatnia ai sedda si Tuhan.

¹¹ Kalulut nenda, Aku sipuririmanua, kise te tiboiet Tuhan Taikamanua, Kugalaiake le geti katubum kele sigalaiakenennu katubutda kabagat golu samba tu'tut bagam, sibara ka lagat bagam katubutda; samba kupatotoila te tubukKu katubum kateteret kupasiukum ekeu.

¹² Againungan getinia, Aku te Tuhan, masiarep sangamberi paloloiatnu sikuam masisaggangi sangamberi leleu Israel, kise: Sangamberi leleu aibailiuan simatangeu samba tuake katubutta ibailiunia komenta.

¹³ Kalulut nenda nuabeuake le tubum katubukKu kabagat tiboietnu samba bulat maigi sikuam katubukKu. Akuarepman.

¹⁴ Kise te tiboiet Tuhan Taikamanua: Muangka baga le geti sangaliot polak kateteret Kubailiuake ekeu simatangeu

¹⁵ Kele nupuangka baga pagalaiat bakkat ikepakenen muntogat Israel, sibailiu simatangeu, kisedda te Kugagalaiake katubum, ibailu le geti ekeu simatangeu, ale leleu Seir samba ekeu, sangaliot Edom kabagat sangalionia. Agairangan getinia sangamberitda, Aku te Tuhan.”