Jehz. 34 - BUKO SIPUNENAN

Tuhan , Sipasijago Israel sipulelelek, masisaggangi sipasijago sikatai

¹ Iageti oi tiboiet Tuhan katubukku:

² “Ale togat sirimanua, pupatuptup masisagangi sangamberi sipasijago Israel, pupatuptup samba kua katubutda, ka sangamberi sipasijago nenda: Kise te tiboiet Tuhan Taikamanua: Paan te kam sangamberi sipasijago Israel, sijago tubunia sarania! Ta pa bulat biribiri le jagoetda sipasijajago nenda”

³ Nunanam le kam suat tottotnia, bulunia nugalai kam leppei, simamo'mo ja'jamuiannia, tapoi biribiri nenda ta anujago kam.

⁴ Simasaggo ta anuparon kam, simabesi' ta anulaggek kam, sibara mauju ta anuappra kam, simapepepe ta anutoiliake kam, simapepepe ta anugaba kam, tapoi anupaperaki le kam kabagat golu simakope.

⁵ Kalulut nenda pasaragainangan sia, kalulut taanai sipasijago, samba bailiunangan sia komen senengamata tarimeu ka leleu. Masaragainangan biribiriKu

⁶ samba mapepenangan ka sangamberi leleu samba ka sangamberi tinambu simabuak; bulatnia, ka sangaliot polak nenda masaragai le biribiriKu, berisara sipasikeli sia ele sigaba sia.

⁷ Kalulut nenda, ale sangamberi sipasijago, kise te tiboiet Tuhan:

⁸ Kalulut Aku sipuririmanua, kise te tiboiet Tuhan Taikamanua, bulatnia, kalulut biribiriKu aibailiu kukuret samba komen senengamata tarimeu ka leleu, kalulut tatania sipasijajago. Kalulut sipasijajago ta arapasikeli biribiriKu, tapoi arajago le tubutda –

⁹ kalulut nenda, ale kam sipasijajago, kise te tiboiet Tuhan:

¹⁰ Kise te tiboiet Tuhan Taikamanua: Ibailiu le geti Aku saggak sipasijago nenda samba Kutitiddou te minca biribiriKu katubutda. Kuariake le sia rajago biribiriKu. Sipasijago nenda taan maririuiru rajago tubutda; Kubelaake le biribiriKu ka ngungunda, bailiu taan mariuriu ibailiu sia komenda.

¹¹ Kalulut kise te tiboiet Tuhan Taikamanua: Bulatnia Aku te masipasikekeli samba masigagaba biribiriKu.

¹² Kele sara sipasijago igaba biribirinia kateteret imasaragai biribiri ka mungkuatnia, kisedda te Kugaba biribiriKu samba Kuarauake sia ka sangamberi kudduat, ka kudduat aitusaragaiake sia kateteret simatinobut samba ka gogoi simagepgep.

¹³ Kuambit le sia geti rabela katalagatda tai bangsa samba masiruruake sia baratda ka sangamberi laggai samba masiambit sia ka polakra. Jagokungan leu sia ka uddut leleu sangamberi Israel, ka sangamberi bagat oinan samba ka sangamberi kudduat ka polak nenda.

¹⁴ Jagokungan leu sia ka polak simaturuturu simaeru samba ka uddut sangamberi leleu Israel simabuak sedda kudduat pumoneannia; merep le sia geti sedda ka kudduat pumonean simaeru samba turuturu simaeru ibailiu le geti komenda ka uddut sangamberi leleu Israel.

¹⁵ Aku le geti masijajago biribiriKu samba obaakekungan raperep, kise te tiboiet Tuhan Taikamanua.

¹⁶ Gabakungan leu simapepepe, toiliakekungan leu simalilimai, apprakkungan sipumauju, ronakekungan simabesi', samba leu pasikelikungan simamo'mo samba simaron tubu; jagokungan leu sia bulat simakolou.

¹⁷ Samba kam ale biribiriKu, kise te tiboiet Tuhan Taikamanua: Bulatnia, Ibailiu le geti Aku sipasiukum katalagat biribiri pasamba biribiri, samba biribiri simanteu pasamba leu kambing simanteu.

¹⁸ Ta'pei pa iaaili kakam, nusappruake kam polak simaturuturu bulat simaeru? Bulat nupapeperaki pa kam polak simaturuturu bagei? Ta' pei pa iaaili nulo kam oinan simalatsat? Bulatnia leu pa nukau kam reremui masilimoake oinan sipulelegei nenda?

¹⁹ Buita ikom pa biribiriKu turuturu siperakat samba masilo oinan silimoakenen rerem?

²⁰ Kalulut nenda, kise te tiboiet Tuhan Taikamanua katubutda. Bulatnia te Aku le geti ibailiu sipasiukum katalagat biribiri simamo'mo ka biribiri simakainang;

²¹ kalulut sangamberi sitaioi tubu nutukkluake kam pasamba peleppemui samba ta'tamui samba sukkaiakemuiannia pasamba banmui, bailiu lajaumuian sia ka ujat geli,

²² oto Kuropake le geti biribiriKu, bule bui' ibailiu sia minca kukuret samba ibailiu le geti Aku sipasiukum biribiri pasamba biribiri.

²³ Kuudetake le geti sara sipasijago sia, sijago sia, iate si David, paguguletKu; jagonangan leu sia, samba bailiunangan leu sijago sia.

²⁴ Aku, Tuhan, ibailiu le geti Taikamanuanda samba paguguletKu si David ibailiu le geti rimata katalagatda. Aku, Tuhan, masikua.

²⁵ Kubaraake le geti palelengan paabanan katubutda samba sappruakekungan tarimeu simasabbak ka polak nenda, bailiu oinangan rakuddu ka polak simalio kabagat sanang samba aban samba oinangan leu raperep ka bakkat loina.

²⁶ Kubailiuake le sia samba sangamberi kabebet leleuKu bailiunangannia panukanan. Belekakekungan urat ka gogoi kabelekatnia; nenda iate urat sibaraake panukanan.

²⁷ Sangamberi loina ka mone pubuanangan samba polak nenda akenangan leu bua. Murimanua le sia kabagat sanang ka polak nenda. Agairangan getinia, Aku te Tuhan, kateteret Kubakbakake loina bairanenda samba masibelaake sia kakabeira sirimanua sipaguguleni sia.

²⁸ Taan ibabailiu sia rauraugetda tai bangsa samba taan itatarakkup sia tarimeu simasabbak, bailiu pukuddurangan kabagat sanang samba taan igege'geake sia aponia pa.

²⁹ Kugalai le geti ka sia sara mone pusanangan, bailiu ka polak nenda berisara sirimanua simamatei kalulut laje samba taan rababairat puailaat sibaraakenenda tai bangsa.

³⁰ Agairangan getinia Aku Tuhan, Taikamanunda, masipaalei sia samba sia muntogat Israel, iate paamianKu, kise te tiboiet Tuhan Taikamanua.

³¹ Kam iate biribiriKu, biribiri jagoetKu, samba Aku iate Taikamanuamui, kise te tiboiet Tuhan Taikamanua.”