Jehz. 33 - BUKO SIPUNENAN

TIPPU 33-48 PATUPTUMAN KARONIET SIBAU KA ISRAEL Puukuket Jehezkiel sibailiu sipasijago

¹ Iageti oi tiboiet Tuhan katubukku:

² “Ale togat sirimanua, panibo ka saaleinu sabangsam samba kua katubutda: Ke Kubaraake lanjau ka sara laggai samba sikudduiji laggai, lepa alarangan sara katalagattda samba bailiuakerangannia sijago sia

³ samba sipasijago nenda masiitco ioi lanjau nenda ka laggainia, lepa nauakenangan pipiau masiparepdep bangsania.

⁴ Ke ai sara sirimanua bulat sipasiarep nau sangkakakala nenda, tapoi ta ioba tuparepdepnia, bailiu kalepat ioi lanjau nenda tutataakenia, logaunia iorak le nia sarania.

⁵ Aiarepman nau pipiau, tapoi ta ioba tuparepdepnia, logaunia iorak le nia sarania. Ke ioba tuparedepnia, iarauake le engania.

⁶ Tapoi ke sipasijago, aiitco aioi lanjau nenda, tapoi ta ainauake pipiau bailiu ta arasilo parepdeman bangsania. Kalulut nenda kalepat aioi lanjau nenda sara katalagatda tumateiake, sirimanua nenda tumateiake kabagat puseleatnia, tapoi Kutiddou le silit engania ka sipasijago nenda.

⁷ Ekeu togat sirimanua, Kubailiuake le ekeu sipasijago muntogat Israel. Ke nuarep sara tiboiet sibara Kaku, parepdep sia kalulut oningKu.

⁸ Ke manibo Aku katubut sirimanua sikatai: Ale sirimanua sikatai, bulat matei le ekeu! samba ta anukua aponia pa nuparepdep sirimanua sikatai nenda bule ibauake patuatnia, matei le sirimanua sikatai nenda kabagat puseleatnia, tapoi kutiddou le silit engania katubum.

⁹ Ke nuparepdep sirimanua sikatai nenda bule ibauake patuatnia, tapoi ta ioba ibauake patuatnia, matei le nia kabagat puseleatnia, tapoi anuarauakean engam.

¹⁰ Ekeu togat sirimanua, kua ka muntogat Israel: Kam masikua kise: Pinasabaumai samba jomai akubairatan kai samba kalulut nenda makataimaian; kipa ioi imariuriu kupurimanua kai?

¹¹ Kua katubutda: Kalulut Aku sipuririmanua, kise te tiboiet Tuhan Taikamanua, ta ioba bagakKu ka kamateiatda sirimanua sikatai, tapoi Kuoba le ibauake patuatnia sirimanua sikatai bule ipurimanua. Bauake kam patuatmui, bauake kam patuatmui ka purimanuaiatmui sikatai nenda! Angoian le numamatei kam, ale muntogat Israel?

¹² Ekeu togat sirimanua, kua ka saaleinu sabangsam: Pubulanan sirimanua simatopit ta iarauakenia, kateteret ibele ka pinasabau samba pukakatai sirimanua sikatai ta sibaraake katusoksongannia, kateteret ibauake patuatnia ka pukakatainia; samba sirimanua simatopit tamomoi ipurimanua kabagat pubulananannia, kateteret igalaiake jo.

¹³ Ke manibo Aku ka sirimanua simatopit: Bulat muririmanua te ekeu! tapoi ikaroake le pubulanannia samba igalaiake le patajuat, sangamberi pubulanan sigalainia ta tuaddeake, samba buita mateinia kabagat patajuatnia sigalaiakenennia.

¹⁴ Ke manibo Aku ka sirimanua sikatai: Bulat matei le ekeu! tapoi bauakenangan patuatnia ka jonia samba galaiakenangan puroipoat samba pubulanan,

¹⁵ sirimanua sikatai nenda masitoiliake bibilet sibaleakenenda sirimanua, luluinangan silit sirauraunia, tutnakenangan sangamberi surukat siake purimanuaiat, bailiu taan igagalaiake minca patajuat, kalulut nenda bulat murimanua le nia, taan mamateinia.

¹⁶ Sangamberi jo sigalaiakenennia taan turerepdep; aigalaiakean puroipoat samba pubulanan, oto bulat murimanua le nia.

¹⁷ Tapoi saaleinu sabangsam masikua: Ta aisese sigalai Tuhan! Tapoi bulat siripokatnia sigalaira le ta aisese.

¹⁸ Ke ikaddiuake pubulanannia sirimanua simatopit samba igalaiake patajuat, kalulut nenda bulat matei le nia.

¹⁹ Bailoknia, ke ibauake patuatnia sirimanua sikatai ka pukakatainia samba igalaiake puroipoat samba pubulanan, kalulut nenda bulat murimanua le nia.

²⁰ Tapoi nukua le kam: Ta aisese sigalai Tuhan! Kuukum te kam, senemui siripot paraboatmui, ale muntogat Israel.”

Katuagaiat katukataikat Jerusalem

²¹ Ka rura sikapulusara ka lepat katuribbaiat, ka laggo sikapulu, ka gogoi sikalima laggo nenda, oi sara sirimanua situaarau sibara ka Jerusalem samba kuanangan: “Arakupkupakean laggai nenda!”

²² Sinoibo kepei moi sirimanua situarau nenda salukinangan aku geget Tuhan samba simanseman kepei moi sirimanua situarau nenda bukanangan ngungungku si Tuhan samba agaikungan leuet manibo.

Israel mukela patuat ka laggira samba ka kudduat katuribbaiat

²³ Lepa oi tiboiet Tuhan katubukku:

²⁴ “Ale togat sirimanua, sangamberi sirimanua sikuddu ka simararagat nene, iate ka polak Israel, masikua kise: Si Abraham iate sarania le, kateteret aisese polak nene ibailiu bakkatnia, tapoi sita maigi, oto polak nene tuake ka sita ibailiunia bakkatta.

²⁵ Kalulut nenda kua katubutda: Kise te tiboiet Tuhan Taikamanua: Nukom le kam akkula pasamba logaunia, itcomuian leu sabulunganmui samba piliakemuian logau, mariuriu pa ibailiu bakkatmui polak nene?

²⁶ Mukaronan le kam ka lanjaumui, nugalai kam sikatai samba senesenemui masipalolit sinanalepda saleimui, mariuriu pa ibailiunia bakkkatmui polak nene?

²⁷ Kua kise katubutda: Kise te tiboiet Tuhan Taikamanua. Kalulut Aku sipuririmanua, sangamberi sirimanua sikuddu ka simararagat matei le geti sia ka lanjau, samba sangamberi sirimanua sikuddu ka polak simalio Kubailiuake le sibailiu komen tarimeu simalia samba sangamberi sirimanua sikuddu kabagat ngaliu samba kudduat simaron iorak le sia geti besi' simasappo.

²⁸ Kugalai le geti polak nene imasusu samba imatangeu, samba ukkat tubunia, sibaraake puroronnia, tulepaake le. Matatangeu te sangamberi leleu Israel, bailiu berisara sirimanua sienunginia.

²⁹ Samba agairangan getinia, Aku le Tuhan, kateteret Kugalai polak nene imasusu samba imatangeu, kalulut sangamberi paraboatda sikatai, sigalaiakenenda.

³⁰ Samba ekeu togat sirimanua, sangamberi saaleinu sabangsam patibo le sia ratiboi ekeu kabebet irip samba matatbaliu sangamberi lalep samba masikua ka pasasambatda, ka senesenen saaleira. Konan samba arep kam, aponia sikuat Tuhan!

³¹ Moi le sia katubum kele rurukat siberikabaga samba mukuddu kamatam sibailiu paamianKu, arepirangan leu aponia sikuakku, tapoi ta aragalaiake; ngungunda sun le tiboiet punununtut baga, tapoi patuatda masikukru puuktungan simalolit.

³² Bulatnia, raaddeake le ekeu kele sara sirimanua siuraiake punununtut baga ka nganga simaeru, samba siagai mukecapi. Raarepi le aponia sikuam, tapoi bulat ta ragagalaiake.

³³ Ke moi pagalaiat nenda, samba bulatnia momoi te!, Agairangan getinia, sara nabi ai katalagatda.”