Jehz. 32 - BUKO SIPUNENAN

Urai sougeri pagalaiat Parao

¹ Ka rura sikapulurua, ka laggo sikapulurua, ka gogoi sikasara laggo nenda, oi tiboiet Tuhan katubukku:

² “Ale togat sirimanua, tiboake sara sougeri pagalaiat si Parao, rimata Misir samba kua katubunia: Nukereake le tubum ka singa sibau tubu katalagatda tai bangsa. Tapoi ekeu kele sikoinan ka koat; sangamberi bagat oinannu nugalai le imabubut, nulimoake le oinannia pasamba rere samba muantat kabagat lotit bagat oinannia.

³ Kise te tiboiet Tuhan Taikamanua: Kubele le jarik masijarik ekeu kabagat mungkuatda tai bangsa simigi, samba masiakkatake ekeu kabagat jarikKu.

⁴ Kulisoake le ekeu ka polak, Kuribbaiake le ekeu ka polak simalio. Samba Kukoiniake le ka uddutnu ituleu senengamata uma' ka tei manua, pasamba akkulania Kuektekake le sangamberi tarimeu sangaliot polak.

⁵ Akkulanu Kuobaake le imasaragai ka uddut leleu, Kusunake le sangamberi su'su pasamba tolatnu.

⁶ Polak Kukau lonia logaunu sipuguguruk, bulatnia, sangamberi leleu samba sopak oinan masun le geti logau.

⁷ Kateteret Kusubuake ekeu, Kupatpatake le manua samba panyanyatnia Kugalai le matinobut. Matat sulu katabbo le geti pasamba tanai rusa samba laggo, patonia ta tutotoroake.

⁸ Sangamberi siputotoro ka manua Kugepgepake le geti kalulut ekeu. Pugepgeman Kubaraake ka polaknu, kise te tiboiet Tuhan Taikamanua.

⁹ Kupasaigo le patuat bangsa simigi, ke Kuambit ekeu sibailiu tangsiakenen katalagatda tai bangsa, ka sangamberi laggai sitaiagaietnu.

¹⁰ Kugalai le ratuge'ge maigi bangsa raitco ekeu, samba tai rimatania mugeret tubu le geti masiitco ekeu, ke Kusaiokake lanjauKu kamatatda. Mugeret tubu le sia, simariuriu, senesenenda kalulut purimanuaiatnia, ka gogoi kalepakatnu.

¹¹ Kalulut kise te tiboiet Tuhan Taikamanua: Moi le geti lanjau rimata Babel katubum.

¹² Kugalai le geti sirimanua simigi sipasitutut ekeu mutagguilu kalulut lanjaura simagege pasaggak, sangamberitda bulat sikatai katalagatda tai bangsa. Kubakbakake le puukkanan tubut Misir samba sirimanua simigi sipasitututnia sangamberitda tusubuake.

¹³ Sangamberi tarimeunia Kusubuake le geti sibara kabebet bagat oinan sabeu; taan ililimoake minca reret sirimanua samba kabagania taanai tarimeu sipuattat.

¹⁴ Oto Kulatsatake le oinannia, Kugalai le sangamberi bagat oinannia muguruk kele tula, kise te tiboiet Tuhan Taikamanua.

¹⁵ Kateteret Kubailiuake Misir simatangeu, sappru leuet senengamata kabagat laggai samba sangamberi sikudduijinia sappru Kusubuakenia, agairangan getinia Aku te Tuhan.

¹⁶ Nene te sougeri bulat uraiakenen; rauraiake le; rauraiake le geti katubut Misir samba ka sangamberi taikaumania simigi, kise te tiboiet Tuhan Taikamanua.”

¹⁷ Ka rura sikapulurua, ka laggo siboiki, ka gogoi sikapulu lima laggo nenda, oi tiboiet Tuhan katubukku:

¹⁸ “Ale togat sirimanua, paarepake sara sougeri, ekeu pasamba tainanalep bangsa simaagai, pagalaiat sirimanua simigi ka Misir samba gorosotake sia ka polak bulat ka tei raailiake situgogorosot ka ngaliu ratei.

¹⁹ Nuaddeake pa tubum simalainge tubu? Gorosotakem ekeu samba perepake ekeu pasamba sirimanua sitaipususunat!

²⁰ Mutagguilu le sia katalagat sirimanua simamatei simateiakenen ka lanjau samba mugailak le sangamberi taikaumannia pasambania.

²¹ Sangamberi sirimanua sipuute simaron tubu pasamba sipasirorop sia ratiboi le pagalaiat nia katalagat laggaira taikabaga: Atugorosotnan samba amugailaan sia, sirimanua sitaipususunat nenda, simateiakenen ka lanjau.

²² Sedda tai Asyur pasamba sangamberi sipatadde katubunia, matei le sia ka lanjau, rateira ai ka sangaliot kudduatda.

²³ Rateira tuteuake ka rubeiat bulat kabaga ka lobok samba mungkuat sipasitutut sia ai ka sangaliot rateira; oto sangamberitda simamatei, mutagguilu kalulut lanjau, sibaraake pulotokat ka polakda sirimanua sipuririmanua.

²⁴ Sedda tai Elam samba sangamberi taikaumania ka sangaliot rateinia, sangamberitda simateiakenen, mutagguilu kalulut lanjau. Sia nene sitaipususunat tugorosot ka polak bulat ka tei, sibaraake pulotokat ka laggaira sirimanua sipuririmanua. Rabairat le puailaatda pasamba sirimanua situgogorosot ka ngaliu ratei.

²⁵ Katalagatda sirimanua simamatei simateiakenen tutarekake paratenia pasamba taikaumania simigi ka sangaliot rateinia; sangamberitda sirimanua sitaipususunat, matei kalulut lanjau. Kalulut pulotokatda aibaraakean laggaira sirimanua sipuririmanua, samba rabairat le puailaatda pasamba sirimanua situgogorosot ka ngaliu ratei; ragalakake le sia katalagatda sirimanua simateiakenen.

²⁶ Sedda si Mesekh samba Tubal pasamba sangamberi taikaumania simigi ka sangaliot rateinia; sangamberitda sirimanua sitaipususunat, matei kalulut lanjau, kalulut pulotokatda aibaraakean ka laggaira sirimanua sipuririmanua

²⁷ Ta ararateiake sia pasamba saladdu simagege simamatei kateteret siburu, situgogorosot ka laggaira taikabaga pasamba senengamata pamatei pasaggaknia, lanjaunia ragalakake sirimanua ka tei utenia pasamba korabbira tugalakake ka uddut tolatda; kalulut pulotokat katubutda saladdu simagege nenda masisaluki laggaira sirimanua sipuririmanua.

²⁸ Tugaila le ekeu katalagatda sirimanua sitaipususunat pasamba sirimanua simamatei ka lanjau.

²⁹ Sedda Edom, sangamberi rimatania samba sangamberi sautenia, sigalakakenen kabebet sirimanua simamatei simateiakenen ka lanjau, kenanen maron sia; turateiake sia kabebet sirimanua sitaipususunat samba kabebet sirimanua situgogorosot ka ngaliu ratei.

³⁰ Sedda sangamberi saute sibara ka bare, sangamberitda, sangamberi tai Sidon, kabagat aila ratugorosot kabebet sirimanua simamatei simateiakenen, kenanen kabagat puroronnia rabaraake pulotokat katubutda; turateiake le sia sitaipususunat kabebera sirimanua simamatei simateiakenen ka lanjau samba rabairat le puailaatda pasamba sirimanua situgogorosot ka ngaliu ratei.

³¹ Iitco te geti sia si Parao sangamberitda samba maangka te bagania ka purimanuaiatda sirimanua simigi sipasitututnia. Si Parao matei ka lanjau pasamba sangamberi saladdunia, kise te tiboiet Tuhan Taikamanua.

³² Kalulut aibaraake pulotokat ka laggaira sirimanua sipuririmanua, oto turateiake nia katalagat sirimanua sitaipususunat, kabebet sirimanua simamatei ka lanjau. Si Parao pasamba sirimanua simigi sipasitututnia, kise te tiboiet Tuhan Taikamanua.”