Jehz. 31 - BUKO SIPUNENAN

Si Parao tupasikatake sibailiu loinat pinilok sitadde

¹ Ka rura sikapulusara, ka laggo sikatelu, ka gogoi sikasara laggo nenda, oi tiboiet Tuhan katubukku:

² “Ale togat sirimanua, kua katubut Parao, rimata Misir samba ka seberikabaga sipasitututnnia: Kabagt puaabeunu kasei momoi sipakereake ekeu?

³ Itco, Kukereake le ekeu ka loina pinilok ka Libanon, simasun rubania simaeru samba buluk bulat simalibbut; siputu'tu bulat simabuak, buttetnia pat aili ka manua.

⁴ Sangamberi bagat oinan masibailiuakenia imabeu koat simalio masibailiuakenia imabuak; masigalai ipuguruk oinannia masibokko baruknia nenda; samba masibelaake sangamberi pugurungan ka senengamata loina sibabara ka polak simalio.

⁵ Oto kalulut nenda putu'tukatnia bulat mabuak bele peile ka senengamata loina ka polak simalio; rannia bailiu maigi, sangamberi rubania ibailiu mananta kalulut oinan siooi sipususukkra.

⁶ Ka rannia mukuddu murumun senengamata uma' ka tei manua, ka tei rubania senengamata tarimeu ka bakkat loina, masitu'tuake matat togania; samba sangamberi bangsa sabeu mukuddu mukunem ka teinia.

⁷ Malaingenia kalulut beunannia samba kalulut rubania simananta; kalulut ungatnia sipulalalak pat aili ka oinan sipususukkra.

⁸ Sangamberi loinat pinilok ka monen Taikamanua taanai sioi sipakereakenia, kisedda leu loina sanobar tamomoi tupakerake ka rannia, samba loina berangan tamomoi tukereake ka rubannia. Senengamata loina ka monen Taikamanua taanai sioi tupakereakenia pagalaiat pulaingeannia.

⁹ Kugalai le nia bulat imalainge pasamba sangamberi rubania bulat simareret. Ka mone Eden, ka monen Taikamanua senengamata loina matu'tu baga katubunia.

¹⁰ Kalulut nenda kise te tiboiet Tuhan Taikamanua: Kalulut mutu'tu le nia simabuak samba buttetnia musumbulat pat aili ka manua samba bailiunangannia simabuak patuat kalulut buaknia,

¹¹ oto Akusaragaiakeannia ka kabei sara sirimanua sibara gege katalagat bangsa, bule igalaiake katubunia siripot ka pukakatainia; Kukekle le nia.

¹² Sangamberi sirimanua siooiake, iate bulat sikatai katalagat bangsa, ratadde le nia samba galakrangannia; ka uddut sangamberi leleu samba ka sangamberi su'su ibele rubania samba ka sangamberi sopak oinan laggai nenda imabakbak rannia, sangamberi bangsa ka polak putuituirangan ka teinia samba taipuukurangannia.

¹³ Ka uddut loinania simabubukkat nenda tuleu senengamata uma' ka tei manua samba katalagat rubania pukuddunangan senengamata tarimeu ka leleu.

¹⁴ Ipuaili sangamberinia nene bule sangamberi loina kabebet oinan bui; ibuakake tubunia, buttetnia bui' ipuottou pat aili ka manua, bule loina sabeu buttet, iate sangamberi sipotpot simigi oinan, bui' imariuriu ipurio kabagat puukkanannia; kalulut sangamberitda atukauan sia ka kamateiat, kabagat polak bulat ka tei, katalagat togat sirimanua situgogorosot ka ngaliu ratei.

¹⁵ Kise te tiboiet Tuhan Taikamanua: Ka gogoi itugorosot ka laggaira taikabaga, Kugalai le koat simalio ipureureu baga kalulut nia. Kukekre le sangamberi bagat oinannia, bailiu ebat oinannia tukekreake. Samba kalulut nia Kugalai le leleu Libanon muleppei pureureugat baga samba masigalai imalaju sangamberi loina ka leleu.

¹⁶ Masiarep juluk kabelekatnia Kugalai le sangamberi bangsa mugeret tubu, kateteret Kugorosotakenia ka laggaira taikabaga, masiailiake sia situgogorosot ka ngaliu ratei. Senengamata loina monen Eden ipusuibi le bagatda ka polak bulat ka tei, iate loina sipili samba bulat simaeru bele peile sibara ka Libanon, sipasipotpot oinan simigi.

¹⁷ Sia leuet tugorosot pasambania ka laggaira taikabaga, iate ka sirimanua simamatei simateiakenen ka lanjau, samba sia sipukukunem ka teinia katalagatda tai bangsa matei leuet sia.

¹⁸ Oto katubut kasei momoi tupakereake ekeu katalagat loina ka monen Eden kabagat pulatsanan samba puaabeu? Tugorosotake le ekeu ka polak bulat katei pasamba sangamberi loina ka monen Eden samba mugaila le ekeu katalagatda sirimanua sitaipususunat pasamba sirimanua simamatei simateiakenen ka lanjau. Nenda te si Parao pasamba sangamberi siberikabaga sipasitututnia, kisedda te tiboiet Tuhan Taikamanua.”